ໄຊຍະມີຜູ້ຕິດເຊື້ອໄຂ້ຍຸງລາຍ 108 ກໍລະນີ

  ທຽບໃສ່ປີ 2019 ຜ່ານມາການລະບາດໄຂ້ຍຸງລາຍປີນີ້ແມ່ນມີທ່າອ່ຽງເພີ່ມຂຶ້ນໃນການແຜ່ລະບາດລາມກວ້າງ ແລະຮຸນແຮງໂດຍອີງໃສ່ຂໍ້ມູນຄົນເຈັບທີ່ມາກວດພົບເປັນໄຂ້ຍຸງລາຍ ແລະນອນໂຮງໝໍແຂວງມີເຖິງ 76 ກໍລະນີ ແລະເສຍຊີວິດ 1 ກໍລະນີ ພະຍາດໄດ້ເລີ່ມລະບາດແຕ່ຫົວປີຊຶ່ງເລີ່ມແຕ່ຕົ້ນເດືອນມັງກອນ ປີ 2020 ເປັນຕົ້ນມາຄົນເຈັບນັບມື້ນັບເພີ່ມຂຶ້ນໃນດ້ານຈໍານວນຈາກຄົນໜຶ່ງໄປສູ່ຄົນອື່ນ ແລະຈາກບ້ານນີ້ໄປຫາບ້ານອື່ນທີ່ໃກ້ຄຽງຕໍ່ໆໄປທັ້ງໆ ທີ່ປີນີ້ຝົນຍັງວ່າບໍ່ທັນຕົກຫຼາຍ ແລະ ຍັງບໍ່ມີນໍ້າຂັງຫຼາຍຄືປີຜ່ານມາແຕ່ກົງກັນຂ້າມມີກໍລະນີ້ຄົນເຈັບໄຂ້ຍຸງລາຍເພີ່ມຂຶ້ນ ໃນທຸກໆມື້ຊຶ່ງເຫັນໄດ້ຈາກຂໍ້ມູນຄົນເຈັບໄຂ້ຍຸງລາຍມາກວດ ແລະນອນປິ່ນປົວຢູ່ໂຮງໝໍແຂວງໄຊຍະບູລີ.

  ທ່ານ ດຣ ຄູນສະຫວັດ ເສນາພັນ ອໍານວຍການໂຮງໝໍແຂວງໄດ້ເປີດເຜີຍຕໍ່ທີມຂ່າວແຂວງໄຊຍະບູລີໃນວັນທີ 19 ມິຖຸນາ2020 ນີ້ວ່າ: ນັບແຕ່ຕົ້ນເດືອນມັງກອນຮອດກາງເດືອນມິຖຸນາ 2020 ແຂວງໄຊຍະບູລີ ແມ່ນພົບຜູ້ເປັນພະຍາດໄຂ້ຍຸງລາຍທັງໝົດ 108 ກໍລະນີ, ເສຍຊີວິດ 1 ກໍລະນີ ໃນຈໍານວນ 31 ບ້ານ ໃນ 4 ເມືອງຄື: ເມືອງໄຊຍະບູລີ ມີ 78 ກໍລະ ນີ, ມີ 21 ບ້ານ, ເມືອງພຽງ 27 ກໍລະນີ, ເສຍຊີວິດ 1 ກໍລະນີ ມີ 5 ບ້ານ, ເມືອງບໍ່ແຕນ ມີ 2 ກໍລະນີ 1 ບ້ານ ແລະເມືອງໄຊສະຖານ 1 ກໍລະນີ 1 ບ້ານ, ສະເພາະໂຮງໝໍແຂວງແມ່ນມີຜູ້ມາກວດ ແລະນອນໂຮງໝໍມີທັງໝົດ 76 ກໍລະນີ ເຂົ້ານອນໂຮງໝໍປິ່ນປົວ 56 ກໍລະນີ ໃນນີ້ຄົນເຈັບມີອາການຮຸນແຮງ ແລະເສຍຊີວິດ 1 ກໍລະນີ, ອາການລະດັບປານກາງມີ 21 ກໍລະນີ ແລະອາການເບົາບາງ 54 ກໍລະນີ.

ທ່ານຍັງໃຫ້ຮູ້ຕື່ມວ່າພະຍາດໄຂ້ຍຸງລາຍເປັນພະຍາດທີ່ອັນຕະລາຍຕໍ່ຊີວິດຂອງຄົນເຮົາເພາະເປັນພະຍາດທີ່ບໍ່ມີວັກແຊັງປ້ອງກັນ, ບໍ່ມີຢາປິ່ນປົວສະເພາະເມື່ອເປັນພະຍາດນີ້ແລ້ວຖ້າບໍ່ໄດ້ຮັບການປິ່ນປົວວ່ອງໄວທັນເວລາ ແລະ ຖືກຕ້ອງຈະເຮັດໃຫ້ຄົນເສຍຊີວິດໄດ້ສິ່ງສໍາຄົນໃນການປ້ອງກັນໄຂ້ຍຸງລາຍຕ້ອງປະຕິບັດ 5 ປ ຄື: ປິດພາຊະນະທີ່ບັນຈຸນໍ້າໃນເຮືອນ ແລະ ນອກເຮືອນເພື່ອບໍ່ໃຫ້ຍຸງມາໄຂ່ໃສ່, ປ່ຽນນໍ້າ ແລະ ຜັດຖູພາຊະນະຖ້ານຕີນຕູ້, ໂຖດອກໄມ້ 2 ຄັ້ງຕໍ່ອາທິດ, ປ່ອຍປາຫາງນົກຍຸງໃສ່ພາຊະນະທີ່ບັນຈຸນໍ້າເພື່ອກິນໜອນນໍ້າຍຸງລາຍ, ປັບປຸງອະນາໄມບໍລິເວນທີ່ຢູ່ອາໄສທາງໃນ ແລະ ນອກເຮືອນໃຫ້ສະອາດໃນແຕ່ລະຄອບຄົວໃຫ້ມີການກວດກາ ແລະ ກໍາຈັດແຫຼ່ງແຜ່ພັນຂອງຍຸງລາຍເຊັ່ນ: ກະໂປະກະປ໋ອງ, ຢາງຕີນລົດເກົ່າອາທິດລະ 1 ຄັ້ງ ໃນຂອບເຂດທີ່ຢູ່ອາໄສຂອງຕົນປະຕິບັດ 5 ປ ໃຫ້ເປັນນິໄສ, ປະຕິບັດເປັນປະຈໍາທຸກໆອາທິດ ແລະຖ້າເປັນໄຂ້ໃຫ້ໄປປິ່ນປົວຢູ່ໂຮງໝໍ ຫຼືສຸກສາລາໃກ້ບ້ານທ່ານເມື່ອເຫັນແນວນີ້ຈຶ່ງສົມກັບຄໍາຂວັນທີ່ວ່າ “ບໍ່ມີໜອນນໍ້າບໍ່ມີຍຸງລາຍ, ບໍ່ມີຍຸງລາຍບໍ່ມີໄຂ້ເລືອດອອກ”.

_____________

ຂ່າວ: ບຸນທີ

แชร์