ການຊຳລະແບບດິຈິຕອລ ເປັນຫົວໃຈໃນການປັບຕົວຂອງແຜນສ້າງເສດຖະກິດ

  ທ່ານ ສຸລິສັກ ທໍານຸວົງ ຫົວໜ້າກົມຄຸ້ມຄອງລະບົບການຊໍາລະ (ຄລຊ) ທະນາຄານແຫ່ງ ສປປ ລາວ (ທຫລ) ໄດ້ໃຫ້ວ່າ: ກົມ ຄລຊ ເປັນເສນາທິການໃຫ້ຄະນະຜູ້ວ່າການ ທຫລ ກ່ຽວກັບການກຳນົດນະໂຍບາຍ, ຕິດຕາມກວດກາ ແລະພັດທະນາລະບົບການຊຳລະ, ເຄື່ອງມືການຊຳລະເພື່ອເອື້ອອຳນວຍໃຫ້ແກ່ການປະຕິບັດນະໂຍບາຍເງິນຕາ ແລະການຮັກສາສະຖຽນລະພາບທາງດ້ານການເງິນ ແລະມີໜ້າທີ່ຕົ້ນຕໍໃນການຄົ້ນຄວ້າ, ສ້າງ, ປັບປຸງບັນດານະໂຍບາຍ, ແຜນຍຸດທະສາດ ແລະລະບຽບການຕ່າງໆທີ່ຕິດພັນກັບວຽກງານການຊຳລະໃຫ້ແທດເໝາະ ແລະ ສອດຄ່ອງກັບສາກົນໃນແຕ່ລະໄລຍະ; ຄຸ້ມຄອງ ແລະ ຕິດຕາມກວດກາລະບົບການຊຳລະ, ຜູ້ເຂົ້າຮ່ວມໃນລະບົບການຊຳລະໃນການຈັດຕັ້ງປະຕິບັດບັນດາຫຼັກການ,ມາດຕະຖານແລະລະບຽບການຕ່າງໆ ໃຫ້ສອດຄ່ອງຕາມລະບຽບກົດໝາຍຂອງ ສປປ ລາວ; ໂຄສະນາ, ເຜີຍ ແຜ່ ແລະ ໃຫ້ຄວາມຮູ້ແກ່ສັງຄົມກ່ຽວກັບນະໂຍບາຍ, ແຜນຍຸດທະສາດ ແລະ ການເຄື່ອນໄຫວວຽກງານທີ່ຕິດພັນກັບລະບົບການຊຳລະໂດຍຜ່ານພາຫະນະສື່ມວນຊົນ ແລະ ຮູບການຕ່າງໆຕາມຄວາມເໝາະສົມ; ປະສານກັບບັນດາກົມ/ທຽບເທົ່າຂອງ ທຫລ, ທະນາຄານທຸລະກິດ, ສະຖາບັນການເງິນຈຸລະພາກ, ການຈັດຕັ້ງລັດ ແລະພາກສ່ວນທີ່ກ່ຽວຂ້ອງທັງພາຍໃນປະເທດ ແລະຕ່າງປະເທດເພື່ອຍົກສູງຄຸນນະພາບວຽກງານການຄຸ້ມຄອງລະບົບການຊຳລະຂອງ ສປປ ລາວ; ຄົ້ນຄວ້າ, ພິຈາລະນາແກ້ໄຂຂໍ້ຄັດແຍ່ງ ແລະ ບັນຫາຕ່າງໆລະຫວ່າງຜູ້ເຂົ້າຮ່ວມໃນລະບົບການຊຳລະ.

  ທ່ານ ສຸລິສັກ ທໍານຸວົງ ຫົວໜ້າກົມ ຄລຊ ແຈ້ງໃຫ້ຮູ້ວ່າ: ປະຈຸບັນ, ລະບົບການຊຳລະຂອງ ສປປ ລາວ ປະກອບດ້ວຍພື້ນຖານໂຄງລ່າງ (Financial Market Infrastructure: FMI) ມີ 2 ລະບົບຫຼັກຊຶ່ງມາຮອດປະຈຸບັນ, ມີຜູ້ໃຫ້ບໍລິການຊຳລະມີທັງໝົດ 47 ແຫ່ງ ໃນນີ້ທະນາຄານທຸລະກິດຈໍານວນ 42 ແຫ່ງ, ສະ ຖາບັນການເງິນທີ່ບໍ່ແມ່ນທະນາຄານ1 ແຫ່ງ ແລະນິຕິບຸກຄົນ 4 ແຫ່ງ ປະກອບມີຜູ້ໃຫ້ບໍລິການແຊັກ 38 ແຫ່ງ;ຜູ້ໃຫ້ບໍລິການບັດລວມທັງໝົດ 25ແຫ່ງ(ບັດATM ພາຍໃນ 1.622.379 ບັດ, ບັດ VISA ເດບິດ 64.109 ບັດ, ບັດ VISA ເຄຣດິດ 9.173 ບັດ); ຜູ້ໃຫ້ບໍລິການຊຳລະຜ່ານແອັບພຣິເຄຊັ່ນໂທລະສັບມືຖື 14 ແຫ່ງ; ຜູ້ໃຫ້ບໍລິການຜ່ານລະບົບການຊຳລະຂ້າມແດນ ໂດຍໃຊ້ເຕັກໂນໂລຊີ ບລັອກເຊນ 1 ແຫ່ງ; ຜູ້ໃຫ້ບໍລິການເງິນເອເລັກໂຕຣນິກ 5 ແຫ່ງ; ຜູ້ໃຫ້ບໍລິການໂອນເງິນຜ່ານລະບົບ SWIFT (29 ທະນາຄານ); ຜູ້ໃຫ້ບໍລິການໂອນເງິນດ່ວນຜ່ານMoney Gram ແລະ Western Union 16 ແຫ່ງ; ຜູ້ໃຫ້ບໍລິການຮັບໃຊ້ງົບປະມານແຫ່ງລັດມີທັງໝົດ 5 ແຫ່ງ, ໃນນີ້ຮັບໃຊ້ການເກັບລາຍຮັບງົບປະມານປະເພດອາກອນ, ພາສີທີ່ດິນ, ຄ່າທຳນຽມທາງ ແລະອື່ນໆ 5 ແຫ່ງ; ຮັບໃຊ້ການຄຸ້ມ ຄອງລາຍຈ່າຍ ແລະການເບີກຈ່າຍງົບປະມານ 4 ແຫ່ງ ລະບົບການຊໍາລະທັນສະໄໝເຮັດໃຫ້ລັດຖະບານ ສາມາດເກັບລາຍຮັບໄດ້ເພີ່ມຂຶ້ນຢ່າງເຫັນໄດ້ຈະແຈ້ງກວ່າໄລ ຍະຜ່ານມາ.

  ສະພາບການຄຸ້ມຄອງຜ່ານມາແມ່ນມີບັນດານິຕິກຳ ແລະໂຄງປະກອບການຈັດຕັ້ງທີ່ເຄື່ອນໄຫວວຽກງານຕິດພັນທີ່ມີລັກສະນະຄົບຖ້ວນສົມຄວນສາມາດຍາດໄດ້ຜົນສໍາເລັດດ້ວຍບາດກ້າວທີ່ໜັກແໜ້ນທັນສະໄໝກໍ່ຍ້ອນໄດ້ຮັບການຊີ້ນຳ-ນຳ ພາຢ່າງໃກ້ຊິດຈາກຂັ້ນເທິງເຮັດໃຫ້ການເຄື່ອນໄຫວວຽກງານຂອງກົມ ຄລຊ ມີຄວາມຄ່ອງຕົວຂຶ້ນເທື່ອລະກ້າວ, ມີການແບ່ງຄວາມຄວາມຮັບຜິດຊອບກັບບັນດາກົມພາຍໃນ ທຫລ ກ່ຽວກັບການຄຸ້ມຄອງວຽກງານການຊຳລະ, ມີການຄົ້ນຄວ້າ ແລະອອກນິຕິກຳລຸ່ມກົດໝາຍທີ່ກ່ຽວຂ້ອງເພື່ອເປັນບ່ອນອີງໃນການຄຸ້ມຄອງຜູ້ມີິສ່ວນຮ່ວມໃນລະບົບການຊຳລະ (ຜູ້ຄວບຄຸມລະບົບ, ຜູ້ໃຫ້ບໍລິການຊຳລະ ແລະ ຜູ້ໃຊ້ບໍລິການ) ເຮັດໃຫ້ການບໍລິການຊຳລະແກ່ສັງຄົມມີຄວາມກ້າວໜ້າຂຶ້ນເລື້ອຍໆ, ນອກນັ້ນ ຂອດການປະສານສົມທົບກັບພາກສ່ວນພາຍນອກທີ່ກ່ຽວຂ້ອງດ້ານວຽກງານການຊຳລະທັງພາກລັດ ແລະເອກະຊົນ, ພ້ອມດຽວກັນ ກໍ່ມີຂໍ້ຈຳກັດ ແລະສິ່ງທ້າທ້າຍຈໍານວນໜຶ່ງທີ່ຈະໄດ້ຮັບການແກ້ໄຂໃນຕໍ່ໜ້າ.

   ທ່ານຫົວໜ້າກົມ ຄລຊ ໄດ້ຢືນຢັນທິດທາງ ແລະນະໂຍບາຍການຄຸ້ມຄອງລະບົບການຊໍາລະໃນຕໍ່ໜ້າແນໃສ່ການຫັນໄປສູ່ Digital Economy ເທື່ອລະກ້າວດ້ວຍ ການສ້າງຍຸດທະສາດແຫ່ງຊາດວ່າດ້ວຍລະບົບການຊຳລະເພື່ອເປັນບ່ອນອີງໃຫ້ແກ່ການພັດທະນາລະບົບການຊຳລະໃຫ້ລວມສູນໂດຍການມີສ່ວນຮ່ວມຂອງບັນດາກະ ຊວງທີ່ກ່ຽວຂ້ອງເຮັດໃຫ້ການເກັບລາຍຮັບແລະຄຸ້ມຄອງລາຍຈ່າຍງົບປະມານຫັນໄປສູ່ການຊຳລະດິຈິຕອລມີປະສິດທິຜົນເພື່ອຫຼຸດຜ່ອນຈົນກ້າວໄປເຖິງລົບລ້າງການຮົ່ວໄຫຼຂອງການເກັບລາຍຮັບງົບປະມານ; ສະໜັບສະໜູນການຮັກສາສະຖຽນລະພາບເງິນຕາ,ຄວາມໝັ້ນຄົງຂອງສະຖາບັນການເງິນ ແລະລະບົບການຊຳລະໃຫ້ມີຄວາມໝັ້ນຄົງ, ປອດໄພ,ທັນສະໄໝ, ມີປະສິດທິຜົນ ແລະ ມີທາງເລືອກໃນການຊໍາລະທີ່ຫຼາກຫຼາຍທັງພາຍໃນ ແລະ ຂ້າມແດນ; ຊຸກຍູ້ການຄ້າແບບເອເລັກໂຕນິກ (E-Com merce) ພາຍໃນປະເທດ ແລະ ຂ້າມແດນພ້ອມທັງສົ່ງເສີມທຸລະກິດ SME ສົ່ງເສີມການເຂົ້າເຖິງການບໍລິການທາງການເງິນຜ່ານເຕັກໂນໂລຊີທາງການເງິນ (FinTech). ມີລະບົບຖານຂໍ້ມູນທີ່ສາມາດນຳໃຊ້ຮ່ວມກັນລະຫວ່າງພາກລັດ ແລະພາກເອກະຊົນ; ມີກົນໄກການປະສານງານກັນລະຫວ່າງພາກລັດ, ພາກເອກະຊົນເຮັດໃຫ້ລະບົບນິເວດການຊຳລະດິຈິຕອລມີຄວາມສົມບູນ.

  ທາງດ້ານພື້ນຖານໂຄງລ່າງທາງດ້ານເຕັກໂນໂລຊີຮັບປະກັນມີລະບົບການຊຳລະທີ່ຄົບຖ້ວນ, ໄດ້ມາດຕະຖານ, ສາມາດເຊື່ອມໃຊ້ຮ່ວມກັນເປັນຕົ້ນພັດທະນາລະບົບການຊຳລະແຫ່ງຊາດໃຫ້ລວມສູນເພື່ອຮອງຮັບທຸກທຸລະກຳທີ່ຮັບປະກັນທາງດ້ານເວລາ ແລະ ປະລິມານສາມາດເຊື່ອມໃຊ້ຮ່ວມກັນໃນປະເທດ, ພາກພື້ນ ແລະ ສາກົນ (Interoperable); ຊຸກຍູ້ໃຫ້ LAPNetກາຍເປັນພື້ນຖານໂຄງລ່າງລະບົບການຊຳລະທຸລະກຳຍ່ອຍຂອງປະເທດ; ຊຸກຍູ້ສົ່ງເສີມການນໍາໃຊ້ນະວັດຕະກໍາ, ຄົ້ນຄວ້າອອກອະນຸຍາດໃຫ້ມີຜູ້ໃຫ້ບໍລິການຊໍາລະທີ່ຫຼາກຫຼາຍເພື່ອຮັບປະກັນຜູ້ໃຊ້ບໍລິການຊຳລະ (End User) ໃຫ້ມີທາງເລືອກໃນການໃຊ້ບໍລິການທີ່ຫຼາກຫຼາຍ.

 ທາງດ້ານການຄຸ້ມຄອງ, ຕິດຕາມ, ກວດກາແມ່ນຮັບປະກັນໃຫ້ມີຜູ້ຄຸ້ມຄອງທີ່ມີຄວາມຊ່ຽວຊານ, ມີນິຕິກຳເປັນລະບົບ-ຄົບຊຸດເປັນຕົ້ນສ້າງຄວາມສາມາດໃຫ້ແກ່ບຸກຄະລາກອນທີ່ເຮັດໜ້າທີ່ໃນການຄຸ້ມຄອງ, ຕິດຕາມກວດກາລະບົບການຊຳລະ ແລະຜູ້ໃຫ້ບໍລິການຊຳລະ; ຄົ້ນຄວ້າສ້າງກອບການຄຸ້ມຄອງ (Supervisory Frame work) ທີ່ສອດຄ່ອງກັບພາກພື້ນແລະສາກົນລວມທັງບັນດາລະບຽບ ການ, ບົດແນະນຳ ແລະຄູ່ມືໃນການຕິດຕາມ, ກວດກາຜູ້ຄວບຄຸມລະບົບການຊຳລະທີ່ສຳຄັນ, ຜູ້ຄວບຄຸມລະບົບການຊຳລະຍ່ອຍ ແລະ ຜູ້ໃຫ້ບໍລິການຊຳລະທີ່ໄດ້ຮັບອະນຸຍາດຈາກ ທຫລ ແລະ ດ້ານກົນໄກຕ້ານ, ປ້ອງກັນ ແລະ ສະກັດກັ້ນປາກົດການຫຍໍ້ທໍ້ກ່ຽວກັບລະບົບການຊໍາລະແມ່ນຕິດຕາມການໂຄສະນາ, ລັກລອບໃຫ້ບໍລິການຊຳລະແບບບໍ່ຖືກກົດໝາຍ, ລວມທັງການແອບອ້າງຊື່ທະນາຄານທຸລະກິດໃນການເຮັດທຸລະກໍາທີ່ບໍ່ໄດ້ຮັບອະນຸຍາດເຊັ່ນ: ຊື້-ຂາຍເງິນຄຣິບໂຕ;ເອົາໃຈໃສ່ຄວາມປອດໄພທາງຄອມພິວເຕີ (Cyber Security) ແລະສະກັດກັ້ນຜູ້ໃຫ້ບໍລິການຊໍາລະທີ່ບໍ່ໄດ້ຮັບອະນຸຍາດເຊັ່ນ: ການໂອນເງິນຂ້າມແດນແບບຜິດກົດໝາຍ.

  ໃນປະຈຸບັນ; ການແຜ່ລະບາດຂອງພະຍາດ Covid19, ຂະແໜງທະນາຄານກໍ່ຕ້ອງປັບຕົວໃຫ້ເຂົ້າກັບການໃຊ້ຊີວິດແບບໃໝ່ (New Normal). ສະນັ້ນ, ການຊໍາລະທາງເອເລັກໂຕຣນິກ ຫຼືການຊໍາລະແບບດິຈິຕອລເປັນຫົວໃຈສໍາຄັນໃນການປັບຕົວ ແລະສະໜັບສະໜູນແຜນການສ້າງເສດຖະກິດດິຈິຕອລຂອງລັດຖະບານ, ດັ່ງ ນັ້ນເພື່ອບັນລຸບັນດາທິດທາງນະໂຍບາຍໃນການຄຸ້ມຄອງລະບົບການຊຳລະທີ່ກ່າວມານັ້ນ; ທ່ານຫົວໜ້າກົມ ຄລຊ ສະເໜີໃຫ້ຜູ້ຄຸ້ມຄອງເລັ່ງທວງການກໍ່ສ້າງ ແລະ ປະ ກອບພະນັກງານໃຫ້ຄົບຖ້ວນພຽງພໍກັບຄວາມຕ້ອງການຕົວຈິງຂອງວຽກງານເພື່ອປະຕິບັດໜ້າທີ່ໃນການຄຸ້ມຄອງຕິດຕາມ, ລົງກວດກາຕົວຈິງໃນການຄຸ້ມຄອງລະບົບການຊຳລະໃຫ້ນັບມື້ນັບເຂັ້ມແຂງສຳລັບຜູ້ຄວບຄຸມລະບົບ ແລະ ຜູ້ໃຫ້ບໍລິການຊຳລະໂດຍສະເພາະ LAPNet ແລະບັນດາທະນາຄານທຸລະກິດສະເໜີໃຫ້ຄົ້ນຄວ້າພັດທະ ນາການນຳໃຊ້ລະບົບຮ່ວມກັນເພື່ອປະຢັດຕົ້ນທຶນໃນການສ້າງພື້ນຖານໂຄງລ່າງ ແລະຫັນມາແຂ່ງຂັນກັນໃຫ້ບໍລິການແທນຕອບສະໜອງຄວາມຕ້ອງການຂອງສັງຄົມກໍ່ຄືການຊຳລະຂອງພາກລັດ, ເອກະຊົນ, ການຄ້າເອເລັກໂຕຣນິກ, ທຸລະກິດ SME ສຳລັບພາກລັດສະເໜີຮ່ວມກັນປຶກສາຫາລືເພື່ອກໍານົດພາລະບົດບາດຂອງຕົນເອງຕໍ່ວຽກງານລະບົບການຊຳລະໃຫ້ຈະແຈ້ງວ່າພາກສ່ວນໃດຮັບຜິດຊອບຫຍັງໃນຂອບເຂດໃດພ້ອມທັງຈະຕ້ອງໄດ້ສ້າງກົນໄກການປະສານງານ ແລະແລກປ່ຽນຂໍ້ມູນຂ່າວສານກັນຢ່າງເປັນປົກກະຕິ.

_______________

ຂຽນໂດຍ: ຣັດສະໝີ ດວງສັດຈະ     

ພາບ ແລະຂ່າວ: ໜັງສືພິມເສດຖະກິດ-ສັງຄົມ

แชร์