ທະນາຄານແຫ່ງ ສປປ ລາວ ພົບປະກັບບັນດາທະນາຄານທຸລະກິດ

  ກົມຄຸ້ມຄອງທະນາຄານທຸລະກິດທະນາຄານແຫ່ງ ສປປ ລາວ (ທຫລ) ໄດ້ຈັດຕັ້ງກອງປະຊຸມພົບປະລະຫວ່າງຜູ້ຄຸ້ມຄອງທະນາຄານທຸລະກິດ ແລະບັນດາທະນາຄານທຸລະກິດປະຈໍາປີ 2019 ເພື່ອທົບທວນຄືນການຈັດຕັ້ງປະຕິບັດວຽກງານປະຈຳປີ 2019 ຜ່ານມາຊຶ່ງຈັດຂຶ້ນໃນວັນທີ 18 ມິຖຸນາ 2020 ທີ່ສະຖາບັນການທະນາ ຄານນະຄອນຫຼວງວຽງຈັນ ໂດຍການໃຫ້ກຽດເຂົ້າຮ່ວມຂອງທ່ານ ສອນໄຊ ສິດພະໄຊ ຜູ້ວ່າການ ທຫລ; ພ້ອມນີ້, ກໍ່ມີບັນດາຫົວໜ້າກົມ-ຫົວໜ້າສາຂາ ທຫລ, ຜູ້ບໍລິຫານລະດັບສູງຂອງທະນາຄານທຸລະກິດ, ສາຂາທະນາຄານທຸລະກິດຕ່າງປະເທດ, ບໍລິສັດກວດສອບພາຍນອກ ແລະພາກສ່ວນທີ່ກ່ຽວຂ້ອງ.

 ກອງປະຊຸມໃນຄັ້ງນີ້ແມ່ນຢູ່ໃນທ່າມກາງທີ່ຂະແໜງການທະນາຄານກຳລັງສຸມໃສ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ອົງຄະນະພັກ ທຫລ ຄັ້ງທີ III, ພ້ອມທັງສ້າງຂະບວນການເພື່ອກະກຽມຕ້ອນຮັບກອງປະຊຸມໃຫຍ່ຂອງອົງຄະນະພັກທຫລ ຄັ້ງທີ IV, ປະຕິບັດແຜນຍຸດທະສາດການພັດທະນາລະບົບການເງິນ-ເງິນຕາຂອງ ສປປ ລາວ ໄລຍະ 10 ປີ ແຕ່ປີ 2016-2025 ແລະວິໄສທັດຮອດປີ 2030 ເວົ້າລວມ ໂດຍສະເພາະການຈັດຕັ້ງປະຕິບັດແຜນງານ-ໂຄງການສ້າງຄວາມເຂັ້ມແຂງໃຫ້ແກ່ທະນາຄານທຸລະກິດແຕ່ປີ 2016-2020 ເພື່ອກຽມຄວາມພ້ອມໃຫ້ແກ່ການເຊື່ອມໂຍງພາກພື້ນ ແລະສາກົນ.

  ກອງປະຊຸມຍັງໄດ້ຮັບຟັງການລາຍງານສະພາບການເຄື່ອນໄຫວວຽກງານຄຸ້ມຄອງທະນາຄານທຸລະກິດປະຈຳປີ 2019 ແລະທິດທາງແຜນການຂອງ ປີ 2020; ລາຍງານສະພາບວຽກງານການຄຸ້ມ ອງເງິນຕາ; ລາຍງານຂອງກົມຄຸ້ມຄອງລະບົບຊຳລະສະສາງ; ການນໍາສະເໜີຂອງສຳນັກງານຂໍ້ມູນຕ້ານການຟອກເງິນນຳສະເໜີ ກ່ຽວກັບວຽກງານກ່ຽວກັບຂໍ້ມູນຕ້ານການຟອກເງິນ; ການລາຍງານຂອງກົມບັນຊີ; ການລາຍງານສະພາບການເຄື່ອນໄຫວຂອງສະມາຄົມທະນາຄານປະຈຳປີ 2019 ແລະທິດທາງແຜນການໃນປີ 2020; ພ້ອມນີ້, ຍັງຮັບຟັງການປະກອບຄຳເຫັນຂອງບັນດາທະນາຄານທຸລະກິດຕໍ່ກັບວຽກງານຄຸ້ມຄອງກວດກາຂອງ ທຫລ ກໍຄືຂໍ້ສະ ເໜີຕໍ່ກັບບັນຫາຕ່າງໆທີ່ທະນາຄານທຸລະກິດເຫັນວ່າເປັນການຈຳກັດ ແລະບໍ່ແທດເໝາະກັບສະພາບການດຳເນີນທຸລະກິດທະນາຄານໃນປະຈຸບັນບໍ່ວ່າທາງດ້ານນະໂຍ ບາຍກໍ່ຄືລະບຽບນິຕິກຳຕ່າງໆທີ່ກ່ຽວຂ້ອງກັບວຽກງານຄຸ້ມຄອງມະຫາພາກ, ວຽກງານຄຸ້ມຄອງຄວາມໝັ້ນຄົງທະນາຄານທຸລະກິດເປັນຕົ້ນການປະຕິບັດການຈັດຊັ້ນໜີ້ເງິນກູ້ຕາມລະບຽບການ, ການປະຕິບັດລະບອບລາຍງານ, ການກະກຽມຄວາມພ້ອມໃນການຫັນໄປສູ່ການຄຸ້ມຄອງຕາມຄວາມສ່ຽງ BASEL 2, ຜົນກະທົບຈາກສະ ພາບເສດຖະກິດ ແລະພະຍາດລະບາດ, ຂໍ້ຫຍຸ້ງຍາກ ແລະສິ່ງທ້າທາຍຕໍ່ທະນາຄານທຸລະກິດເພື່ອສະເໜີໃຫ້ ທຫລ ພິຈາລະນາແກ້ໄຂ.

  ນອກນີ້, ຍັງຄົ້ນຄວ້າປຶກສາຫາລືຊອກໃຫ້ເຫັນດ້ານດີ ແລະດ້ານອ່ອນ, ຂໍ້ຄົງຄ້າງໃນການປະຕິບັດວຽກງານຄຸ້ມຄອງກວດກາຄວາມໝັ້ນຄົງທະນາຄານທຸລະກິດຂອງ ທຫລ ກໍ່ຄືຂໍ້ຫຍຸ້ງຍາກຂໍ້ຈຳກັດໃນການດຳເນີນທຸລະກິດທະນາຄານ ແລະຖອດຖອນບົດຮຽນ, ກໍານົດມາດຕະການແກ້ໄຂຢ່າງເໝາະສົມແນໃສ່ສ້າງລະບົບຄຸ້ມຄອງ ແລະການເຄື່ອນໄຫວທະນາຄານທຸລະກິດໃຫ້ມີຄວາມເຂັ້ມແຂງ, ຍືນຍົງສາມາດເຊື່ອມໂຍງພາກພື້ນ ແລະ ສາກົນ. ຂະນະດຽວກັນ, ກໍ່ໄດ້ມີການປະກອບຄໍາເຫັນຂອງບັນດາຜູ້ເຂົ້າຮ່ວມຕໍ່ກັບການລາຍງານການເຄື່ອນໄຫວການຄຸ້ມຄອງ ແລະການເຄື່ອນໄຫວຂອງທະນາຄານທຸລະກິດໃນປີ 2019 ກໍ່ຄືຕໍ່ກັບ ຄຳຖາມເຈາະຈີ້ມເຫັນວ່າຂະແໜງທະນາຄານຂອງພວກເຮົາສາມາດຍາດໄດ້ຜົນສຳເລັດຫຼາຍດ້ານທີ່ມີລັກສະນະຕັ້ງໜ້າຊຶ່ງຜ່ານມາການຄຸ້ມຄອງ-ກວດກາຂອງກົມຄຸ້ມຄອງທະນາຄານທຸລະກິດໄດ້ດຳເນີນຢ່າງເປັນລະບົບ ແລະຖືກຕ້ອງ ຕາມເປົ້າໝາຍ ແລະຈຸດສຸມທີ່ໄດ້ກຳນົດ ໄວ້ໃນແຜນການກ້າວໄປສູ່ວິທີການຄຸ້ມຄອງຕາມຄວາມສ່ຽງຫຼາຍຂຶ້ນ. ວຽກງານການຄົ້ນຄວ້າການຂໍສ້າງຕັ້ງໄດ້ເອົາໃຈໃສ່ພິຈາລະນາການສ້າງຕັ້ງທະນາຄານທຸລະກິດ, ການຂະຫຍາຍສາຂາຂອງທະນາຄານທຸລະກິດ ແລະການປັບປຸງຮູບແບບທຸລະກິດຂອງທະນາ ຄານຈໍານວນໜຶ່ງ. ວຽກງານນິຕິກຳໄດ້ຄົ້ນຄວ້າປັບປຸງບັນດານິຕິກໍາເພື່ອຄຸ້ມຄອງຄວາມໝັ້ນຄົງໃຫ້ສອດຄ່ອງຕາມມາດຕະຖານສາກົນເທື່ອລະກ້າວ, ການກວດກາທາງເອກະສານ ແລະກວດກາກັບທີ່ໄດ້ຊີ້ໃຫ້ເຫັນຂໍ້ຄົງຄ້າງຂອງທະນາຄານທຸລະກິດພ້ອມທັງໄດ້ໃຫ້ຄຳແນະນຳຢ່າງຈິງໃຈເພື່ອໃຫ້ເປົ້າໝາຍທີ່ຖືກກວດກາມີການປັບປຸງແກ້ໄຂໃຫ້ຖືກຕ້ອງ ແລະສອດຄ່ອງຕາມລະບຽບກົດໝາຍ. ບັນດາທະນາຄານທຸລະກິດສ່ວນໃຫຍ່ກໍ່ມີຄວາມຕື່ນຕົວເຄົາລົບ ແລະປະຕິບັດລະບຽບກົດໝາຍຢ່າງເຂັ້ມງວດ, ເຖິງຢ່າງໃດກໍຕາມຍັງມີບາງຈໍານວນທີ່ບໍ່ທັນປະຕິບັດໄດ້ສອດຄ່ອງຕາມລະບຽບການຊຶ່ງໄດ້ມີການດຳເນີນການແກ້ໄຂຕາມລະບຽບກົດໝາຍກຳນົດ.

  ມາຮອດປະຈຸບັນ, ລະບົບທະນາຄານທຸລະກິດໄດ້ມີຄວາມເຕີບໃຫຍ່ຂະຫຍາຍຕົວທາງດ້ານປະລິມານ ແລະຄຸນນະພາບ, ທົ່ວລະບົບທະນາຄານປະກອບມີຫຼາຍຮູບແບບກຳມະສິດໃນການຖືຮຸ້ນເຊັ່ນ: ທະນາຄານສະເພາະກິດ, ທະນາຄານທຸລະກິດລັດ, ທະນາຄານລັດຮ່ວມທຶນ, ທະນາຄານເອກະຊົນ, ທະນາຄານໃນກຸ່ມ ແລະສາຂາທະ ນາຄານຕ່າງປະເທດທ່າມກາງໄລຍະເສດຖະກິດທີ່ຫຍຸ້ງຍາກແຕ່ຈໍານວນສາຂາທະນາຄານທຸລະກິດພາຍໃນປະເທດ, ໜ່ວຍບໍລິການ, ຕູ້ ATM ແລະ ການໃຫ້ບໍລິການຊໍາລະໃນຮູບແບບຕ່າງໆ ກໍ່ໄດ້ເພີ່ມຂຶ້ນເປັນລຳດັບຊຶ່ງການເພີ່ມຂຶ້ນດັ່ງກ່າວໄດ້ສະແດງໃຫ້ເຫັນເຖິງຄວາມຕັ້ງໜ້າຂອງລະບົບທະນາຄານໃນການຂະຫຍາຍຕາໜ່າງບໍລິ ການ ແລະດຶງດູດເງິນທຶນເຂົ້າສູ່ລະບົບປະກອບສ່ວນສ້າງສາພັດທະນາປະເທດຊາດໃຫ້ເຕີບໃຫຍ່ຢ່າງຕໍ່ເນື່ອງ.

_____________

  ຂຽນໂດຍ: ຣັດສະໝີ ດວງສັດຈະ      

  ພາບ ແລະຂ່າວ: ໜັງສືພິມເສດຖະກິດ-ສັງຄົມ

แชร์