ຄືບໜ້າ 31% ໂຄງການກໍ່ສ້າງລະບົບຊົນລະປະທານຫ້ວຍທ່າຮາວ ເມືອງອຸທຸມພອນ

   ໃນວັນທີ 19 ມິຖຸນາ 2020 ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດພ້ອມດ້ວຍທ່ານ ປະສົງສິນຈະເລີນສຸກ ເຈົ້າເມືອງອຸທຸມພອນໄດ້ລົງຕິດຕາມກວດກາໂຄງການກໍ່ສ້າງລະບົບຊົນລະປະທານຫ້ວຍທ່າຮາວບ້ານນາຄຳເມືອງອຸທຸມພອນ.

  ໂອກາດນີ້ທ່ານ ນາງ ເພັດສະໝອນ ເພັງສະຫວັດ ປະທານບໍລິສັດເພັດຖາວອນກໍ່ສ້າງເຄຫາຂົວ-ທາງ ແລະຊົນລະປະທານໄດ້ລາຍງານໃຫ້ຮູ້ວ່າ: ໂຄງການກໍ່ສ້າງລະ ບົບຊົນລະປະທານຫ້ວຍທ່າຮາວ ແມ່ນໄດ້ເລີ່ມລົງມືຈັດຕັ້ງປະຕິບັດໂຄງການໄລຍະທີໜຶ່ງແມ່ນເລີ່ມແຕ່ປີ 2014-2016 ກໍ່ໄດ້ມີການກວດກາ ແລະໄດ້ຢຸດໂຄງການເປັນເວລາ 4 ປີ ຫຼັງຈາກນັ້ນກໍ່ໄດ້ສືບຈັດຕັ້ງປະຕິບັດໂຄງການໃໝ່ເປັນໄລຍະທີສອງຊຶ່ງໜ້າວຽກຕົ້ນຕໍແມ່ນການກໍ່ສ້າງລະບົບຫົວງານເຂື່ອນດິນທີ່ມີລວງຍາວ1.250 ແມັດ, ກວ້າງ 8,5 ແມັດ ແລະ ກໍ່ສ້າງລະບົບຄອງເໝືອງໃນນັ້ນມີຄອງເໝືອງແມ່ສອງຄອງເບື້ອງຊ້າຍມີຄວາມຍາວ 9 ກິໂລແມັດ, ເບື້ອງຂວາມີຄວາມຍາວ 11 ກິໂລແມັດ

ແລະຄອງຊອຍ 45 ຄອງ ໃນມູນຄ່າການກໍ່ສ້າງທັງໝົດ 191 ຕື້ກີບ ໂດຍແມ່ນບໍລິສັດເພັດຖາວອນກໍ່ສ້າງເຄຫາຂົວ-ທາງ ແລະຊົນລະປະທານເປັນຜູ້ຮັບເໝົາກໍ່ສ້າງ ມາຮອດປະຈຸບັນໂຄງການດັ່ງກ່າວສາມາດຈັດຕັ້ງປະຕິບັດສຳເລັດໄປແລ້ວ 31% ຄາດວ່າຈະໃຫ້ສໍາເລັດໂຄງການໃນປີ 2023 ແລະ ຈະໄດ້ສືບຕໍ່ໃສ່ໂຄງການຊົນລະກະ ເສດຊຶ່ງເປັນໄລຍະທີ 3 ຂອງໂຄງການ ແລະຈະໃຫ້ສຳເລັດໃນປີ 2025 ພາຍຫຼັງທີ່ສຳເລັດໂຄງການນີ້ແລ້ວພາຍໃນອ່າງ ເກັບນໍ້າຫ້ວຍທ່າຮາວຈະສາມາດກັກເກັບນໍ້າໄດ້ຫຼາຍເຖິງ 24 ລ້ານແມັດກ້ອນ, ສາມາດຫົດເນື້ອທີ່ນາປີໄດ້ 1.700 ເຮັກຕາ, ນາແຊງ 1.100 ເຮັກຕາ ແລະຈະມີປະຊາຊົນຈຳນວນ 9 ບ້ານທີ່ໄດ້ຊົມໃຊ້ ແລະ ໄດ້ ຮັບຜົນປະໂຫຍດ.

-----------------

ຂ່າວ: ອັກສອນສິນ ພົມມະຈັນ

แชร์