ອັງກິດອັດສີດເງິນເພີ່ມ 100 ຕື້ປອນ

  ທະນາຄານກາງອັງກິດອັດສີດເງິນເພີ່ມ 100 ຕື້ປອນ ແລະຮັກສາອັດຕາດອກເບ້ຍຕໍ່າ 0,1% ເພື່ອຊຸກຍູ້ເສດຖະກິດຂອງປະເທດທີ່ໄດ້ຮັບຜົນກະທົບຢ່າງໜັກຈາກການແຜ່ລະບາດຂອງເຊື້ອພະຍາດໂຄວິດ-19.

  ຕາມຂ່າວຕ່າງປະເທດລາຍງານວ່າ ທະນາຄານກາງອັງກິດປະກາດອັດສີດເງິນເຂົ້າສູ່ລະບົບເສດຖະກິດຕື່ມອີກ 100 ຕື້ປອນ ຜ່ານໂຄງການຊື້ພັນທະບັດລັດຖະບານເພື່ອຊ່ວຍຊຸກຍູ້ເສດຖະກິດຂອງອັງກິດຫຼີກເວັ້ນພາວະຖົດຖອຍທີ່ຮ້າຍແຮງທີ່ສຸດໃນຮອບຫຼາຍກວ່າ 300ປີ,ຜູ້ກຳນົດນະໂຍບາຍຂອງທະນາຄານກາງອັງກິດມີມະຕິ 8 ຕໍ່1 ຂະຫຍາຍຂອບເຂດຂອງໂຄງການຊື້ພັນທະບັດລັດຖະບານເພີ່ມຂຶ້ນຊຶ່ງເປັນການຂະຫຍາຍມາດຕະການຜ່ອນຄາຍດ້ານປະລິມານ (ຄີວອີ) ເພື່ອກະຕຸ້ນເສດຖະກິດເພີ່ມຂຶ້ນເປັນ 745 ຕື້ປອນຂະນະທີ່ຄະນະກຳມາການນະໂຍບາຍການເງິນຂອງທະນາຄານກາງມີມະຕິຮັກສາອັດຕາດອກເບ້ຍໄວ້ທີ່ລະດັບຕໍ່າສຸດ 0,1%, ທັງນີ້ ໃນເດືອນເມສາທີ່ຜ່ານມາ ອັດຕາການເຕີບໂຕຂອງຈີດີພີອັງກິດຫົດຕົວລົງສູ່ລະດັບ-20,4% ເນື່ອງຈາກລັດຖະບານບັງຄັບໃຊ້ມາດຕະການປິດເມືອງຕະຫຼອດເດືອນ ຂະນະທີ່ຕົວເລກແຮງງານທົ່ວປະເທດຫຼຸດລົງຫຼາຍກວ່າ 6 ແສນຄົນ ໃນໄລຍະເດືອນເມສາ-ພຶດສະພາທີ່ຜ່ານມາ.

   ທ່ານ ແອນດູ ເບລລີ ຜູ້ວ່າການທະນາຄານກາງອັງກິດເຕືອນວ່າ ທ່າອຽງທາງເສດຖະກິດຍັງບໍ່ແນ່ນອນຂຶ້ນຢູ່ກັບສະຖານະການຂອງການແຜ່ລະບາດຂອງເຊື້ອພະຍາດໂຄວິດ-19 ທີ່ຍັງບໍ່ສາມາດຄາດຄະເນໄດ້.

 --------

ໜັງສືພິມເສດຖະກິດ-ສັງຄົມ

แชร์