ຕາດກອຍລອຍຟ້າ ແຫຼ່ງທ່ອງທ່ຽວທຳມະຊາດ ເມືອງປະທຸມພອນ

  ຖ້າເວົ້າເຖິງແຫຼ່ງທ່ອງທ່ຽວ ທຳມະຊາດ, ນໍ້າຕົກຕາດທີ່ຢູ່ບໍ່ໃກ້ບໍ່ ໄກເໝາະແກ່ການເດີນທາງໃນຍາມວັນພັກນັ້ນນັບວ່າມີຢ່າງຫຼວງຫຼາຍແຕ່ຖ້າຕ້ອງການຢາກຊຶມຊັບກັບບັນ ຍາກາດ, ຄວາມງົດງາມ, ມີນໍ້າໄຫຼ  ແລະ ຄົງໄວ້ຊຶ່ງຄວາມອຸດົມສົມບູນທາງທຳມະຊາດນັ້ນອາດແມ່ນແຫຼ່ງທ່ອງທ່ຽວ “ຕາດກອຍລອຍຟ້າ” ເມືອງປະທຸມພອນ ແຂວງຈໍາປາສັກຊຶ່ງເປັນສະຖານທີ່ທີ່ພວມໄດ້ຮັບ ຄວາມນິຍົມຈາກນັກທ່ອງທ່ຽວນັບມື້ນັບຫຼາຍຂຶ້ນ.

  ຕາດກອຍລອຍຟ້າເປັນແຫຼ່ງທ່ອງທ່ຽວແບບປະສົມປະສານມີທັງແບບປະຈົນໄພ ແລະ ແບບຫຼິ້ນນໍ້າທີ່ຜ່ອນຄາຍສະບາຍອາລົມຕາດດັ່ງກ່າວຕັ້ງຢູ່ບ້ານນໍ້າພາກ ເມືອງປະທຸມພອນ  ແຂວງຈໍາປາສັກ ຫ່າງຈາກ ນະຄອນປາກເຊ ໄປຕາມເສັ້ນທາງເລກທີ 13 ໃຕ້ ປະມານ 25 ກິໂລ ແມັດ ກໍຈະມີທາງແວະເຂົ້າໄປຕາດຢູ່ເບື້ອງຊ້າຍມື ແລະເສັ້ນທາງເຂົ້າ ໄປຈະເປັນທາງດິນແດງປະມານ 5 ກິໂລແມັດ. ເມື່ອທ່ານເດີນທາງເຂົ້າໄປຮອດຕາດແລ້ວຮັບຮອງໄດ້ເລີຍວ່າ:ຄວາມອິດເມື່ອຍຈາກການເດີນ ທາງນັ້ນຈະໝົດໄປຢ່າງແນ່ນອນເພາະຢູ່ໃນຕາດແຫ່ງນີ້ນອກຈາກຫຼິ້ນນໍ້າແລ້ວຍັງມີກິດຈະກໍາຫຼາຍຢ່າງໄວ້ໃຫ້ນັກທ່ອງທ່ຽວໄດ້ເລືອກຫຼິ້ນຕາມໃຈມັກ.

 ຊຶ່ງປະກອບມີກິດຈະກຳຕ່າງໆ ເປັນຕົ້ນຂີ່ສະລິງ, ປີນໄຍແມງມຸມ, ໄຕ່ ໄມ້ລໍາດຽວ, ໄຕ່ເຊືອກເສັ້ນດຽວ,ໄຕ່ສະລິງໂຕ V, ໄຕ່ຂົ້ວອູ່, ການ ຈ່ອງສະລິງ, ການຫຼິ້ນກົງເບັງ, ຫຼິ້ນ ມວຍນໍ້າ, ປີນຕີນລົດ, ໂອນເຊືອກ, ລ່ອງເຮືອນອກນັ້ນ ທ່ານ ສາມາດມາ ນັ່ງພັກຜ່ອນຢ່ອນອາລົມດ້ວຍການ ສໍາຜັດກັບລົມເຢັນໆ ແລະຊົມທໍາມະ ຊາດທີ່ສວຍສົດງົດງາມ.

 ຖ້າທ່ານໃດກໍາລັງຊອກຫາສະຖານທີ່ທ່ອງທ່ຽວແບບທໍາມະຊາດແທ້ໆທີ່ໄປບ່ອນດຽວແຕ່ມີກິດຈະກໍາ ໃຫ້ຫຼິ້ນຫຼາຍຢ່າງຕ້ອງໄປສະຖານທີ່ຕາດກອຍລອຍຟ້າ  ຮັບຮອງໄດ້ເລີຍວ່າທ່ານຈະບໍ່ຜິດຫວັງຢ່າງແນ່ນອນ.

แชร์