ວິທະຍາໄລ ວິຈິດສິນ ຮັບຟັງການເຜີຍແຜ່ດໍາລັດວ່າດ້ວຍ ວິຈິດສິນ

 ວິທະຍາໄລວິຈິດສິນ ຫຼວງພະບາງ ໄດ້ຮັບຟັງການເຜີຍແຜ່ດໍາລັດວ່າດ້ວຍວິຈິດສິນຊຶ່ງທາງກົມວິຈິດສິນກະຊວງຖະແຫຼງຂ່າວ, ວັດທະນະທໍາ ແລະທ່ອງທ່ຽວໄດ້ຈັດຂຶ້ນໃນວັນທີ 18 ມິຖຸນາ 2020 ຜ່ານມານີ້ທີ່ຫ້ອງປະຊຸມວິທະຍາໄລດັ່ງກ່າວໂດຍການເປັນປະທານຂອງ ທ່ານ ບຸນສະໜອງ ສີຫາລາດ ຫົວຫນ້າກົມວິຈິດສິນະຊວງຖະ ແຫຼງຂ່າວ, ວັດທະນະທໍາ ແລະທ່ອງທ່ຽວ, ມີເຈົ້າອາວາດວັດ, ມີພະແນກການ, ຂະແຫນງການທີ່ກ່ຽວຂ້ອງພ້ອມດ້ວຍພະນັກງານວິຈິດສິນເຂົ້າຮ່ວມ.

  ທ່ານ ບຸນສະໜອງ ສີຫາລາດ ໃຫ້ກຽດເຜີຍແຜ່ດໍາລັດວ່າດ້ວຍວິຈິດສິນໃນຄັ້ງນີ້ວ່າ: ຈຸດປະສົງດໍາລັດສະບັບນີ້ກໍເພື່ອກໍານົດຫຼັກການ, ລະບຽບການ ແລະມາດຕະການກ່ຽວກັບການຄຸ້ມຄອງ ແລະການຕິດຕາມກວດກາການເຄື່ອນໄຫວວຽກງານວິຈິດສິນເພື່ອເຮັດໃຫ້ວຽກງານດັ່ງກ່າວດໍາເນີນໄປຢ່າງຖືກຕ້ອງສອດຄ່ອງກັບນະໂຍ ບາຍ, ກົດໝາຍ, ຮັບປະກັນສິດ ແລະພັນທະຂອງບຸກຄົນ, ນິຕິບຸກຄົນ ແລະການຈັດຕັ້ງໃນການດໍາເນີນວຽກງານວິຈິດສິນ, ສ້າງຜົນງານໃຫ້ມີລັກສະນະຊາດ, ກ້າວ ໜ້າ ແລະ ມະຫາຊົນແນໃສ່ສົ່ງເສີມຫົວຄິດ ປະດິດສ້າງຂອງປະຊາຊົນໃນການ ຟື້ນຟູ, ອະນຸລັກ, ພັດທະນາ ແລະຊົມໃຊ້ຜົນງານດ້ານວິຈິດສິນ, ຮັກສາເອກະລັກ, ມູນເຊື້ອທາງດ້ານວັດທະນະທໍາຂອງຊາດໃຫ້ຍືນຍົງຕະຫຼອດໄປ ແລະສາມາດເຊື່ອມ ໂຍງກັບພາກພື້ນ ແລະສາກົນ.

   ສໍາລັບດໍາລັດສະບັບນີ້ປະກອມມີ 12 ຫມວດ ແລະ 52 ມາດຕາຄື: ດໍາລັດວ່າດ້ວຍບົດບັດຍັດທົ່ວໄປ, ປະເພດ ແລະລັກສະນະຂອງວິຈິດສິນ, ການດໍາເນີນທຸລະກິດ ກ່ຽວກັບວຽກງານວິຈິດສິນ, ການແຂ່ງຂັນສ້າງຜົນງານດ້ານວິຈິດສິນ ແລະການວາງສະແດງ, ປະເພດນັກສິລະປິນວິຈິດສິນ, ວ່າດ້ວຍຄ່າທໍານຽມ ແລະຄ່າບໍລິການ, ຂໍ້ຫ້າມ, ການແກ້ໄຂຂໍ້ຂັດແຍ່ງ, ການຄຸ້ມຄອງວຽກງານວິຈິດສິນ, ນະໂຍບາຍຕໍ່ຜູ້ມີຜົນງານ ແລະ ມາດຕະການຕໍ່ຜູ້ລະເມີດ, ວ່າດ້ວຍວັນວິຈິດສິນແຫ່ງຊາດ, ເຄື່ອງ ໝາຍ ແລະ ຕາປະທັບ, ທັງໝົດນີ້ແມ່ນໄດ້ມອບໃຫ້ບັນດາກະຊວງ, ພະແນກ, ກົມກອງ, ອົງການ, ອົງການປົກຄອງທ້ອງຖິ່ນເປັນເຈົ້າການຈັດຕັ້ງປະຕິບັດດໍາລັດສະ ບັບນີ້ຢ່າງເຂັ້ມງວດ ແລະມີປະສິດທິພາບ.

___________

ໜັງສືພິມເສດຖະກິດ-ສັງຄົມ

แชร์