ມອບ-ຮັບໂຮງຮຽນປະຖົມສົມບູນຫົວເມືອງຫຼັງໃໝ່

   ພິທີມອບ-ຮັບ ແລະເປີດນຳໃຊ້ໂຮງຮຽນປະຖົມສົນບູນຫົວເມືອງ ຫຼັງໃໝ່ຈັດຂຶ້ນຢ່າງການໃນວັນທີ 21 ມິຖຸນາ 2020 ຢູ່ໂຮງຮຽນດັ່ງກ່າວ ໂດຍການເປັນກຽດເຂົ້າຮ່ວມຂອງທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີກະຊວງ ສຶກສາທິການ-ກີລາ, ມີຕາງໜ້າພະແນກສຶກສາທິການ-ກີລາແຂວງ ວຽງຈັນ, ອົງການປົກຄອງເມືອງ ໂພນໂຮງ, ຕາງໜ້າມູນນິທິສົ່ງເສີມການສຶກສາ, ຕ່າງໜ້າສິດເກົ່າ, ສະມາຄົມພໍ່ແມ່ນັກຮຽນ, ຄູ-ອາຈານ ແລະນ້ອງນ້ອຍນັກຮຽນເຂົ້າຮ່ວມ.

  ໃນພິທີທ່ານ ລິນທອງ ພານຸ ວົງ ໄດ້ຕາງໜ້າໃຫ້ບັນດາສິດເກົ່າທີ່ໃຫ້ການສະໜອງທຶນກໍ່ສ້າງຂຶ້ນ ລາຍງານການລົງມືກໍ່ສ້າງພ້ອມທັງກ່າວມອບໃຫ້ຮູ້ວ່າ: ເພື່ອເປັນການສະແດງອອກເຖິງຄວາມຮູ້ ບຸນຄຸນຕໍ່ສະຖາບັນອັນເກົ່າກໍ່ຄືໂຮງຮຽນແຫ່ງນີ້ບັນດາສິດຕະຫຼອດຮອດຄອບຄົວກໍ່ເຫັນໄດ້ຄວາມໝາຍຄວາມສຳຄັນຂອງການສຶກສາ ໂດຍສະເພາະການສົ່ງເສີມໃຫ້ຫຼານນ້ອຍມີຄວາມສະດວກໃນການຮຽນ–ການສອນພ້ອມທັງ ເປັນການປະກອບສ່ວນພັດທະນາ ພື້ນຖານໂຄງລ່າງວຽກງານການສຶກສາຢູ່ເມືອງໂພນໂຮງ ໃຫ້ດີຂຶ້ນ, ໂຮງຮຽນຫັຼງໃໝ່ເປັນອາຄານ ຊັ້ນດຽວມີຂະໜາດ 8,50 x32 ແມັດ ປະກອບມີ 4 ຫ້ອງ ຮຽນ ພາຍໃນມີໂຕະ,ຕັ່ງ, ລະບົບໄຟຟ້າ ແລະສິງອຳນວຍຄວາມສະດວກ, ສ້ອມແປງອາຄານຫັຼງເກົ່າຂະໜາດ 9,50 x 21 ແມັດ ມຸງດ້ວຍອາລຸຍ ຊິງ ແລະກໍ່ສ້າງຫ້ອງນໍ້າ 6 ຫ້ອງ ພ້ອມດ້ວຍອ່າງລ້າງມືລວມມູນຄ່າການກໍ່ສ້າງທັງໝົດ 523,5  ລ້ານກີບ ຊຶ່ງໄດ້ລົງມືກໍ່ສ້າງແຕ່ວັນທີ 9 ມັງກອນ 2020 ຫາ 25 ມີນາ 2020 ສຳເລັດ ແລະກ່າວຮັບ ໂດຍທ່ານ ສົມປະສົງ ສຸວົງຄຳຈັນ ເຈົ້າເມືອງໆໂພນໂຮງ.

 ໃນພິທີກໍ່ໄດ້ມອບໃບກຽດຕິຄຸນຂັ້ນລັດຖະບານໃຫ້ແກ່ຜູ້ທີ່ມີຜົນງານດີເດັ່ນໃນການປະກອບສ່ວນມອບໂດຍແມ່ນທ່ານ ນາງ ແສງ ເດືອນ ຫຼ້າຈັນທະບູນ ລັດຖະມົນຕີ ກະຊວງສຶກສາທິການ-ກີລາ ແລະໂດຍມີຕາງໜ້າສິດເກົ່າຂຶ້ນຮັບຢ່າງ ສົມກຽດ, ໃນພິທີຍັງໄດ້ມອບອຸປະກອນການຮຽນ, ເຄື່ອງຫຼິ້ນກີລາ ແລະປູກຕົ້ນໄມ້ສ້າງຄວາມອຸດົມສົມບູນໃຫ້ໂຮງຮຽນຫຼັງໃໝ່ອີກດ້ວຍ.

--------

ໜັງສືພິມເສດຖະກິດ-ສັງຄົມ

แชร์