ເນື້ອທີ່ປູກເຂົ້າເມືອງສະໜາມໄຊ ອາດຈະບັນລຸ 8.897 ເຮັກຕາ

  ອີງຕາມການລາຍງານຂອງ ທ່ານ ພັນສິນ ພວງພັນສາຍສ່ອງຮອງຫົວໜ້າໜ່ວຍງານປູກຝັງຫ້ອງການກະສິກຳ ແລະປ່າໄມ້ ເມືອງສະໜາມໄຊ ແຂວງອັດຕະປື ກ່ຽວ ກັບການຜະລິດເຂົ້ານາປີ 2020 ຂອງເມືອງສະໜາມໄຊໃຫ້ຮູ້ວ່າ: ເພື່ອເຮັດໃຫ້ການຜະລິດເຂົ້ານາປີ 2020 ນີ້ບັນລຸຄາດໝາຍຂອງແຜນການ: 7.537 ເຮັກຕາ ທາງເມືອງໄດ້ມີການວາງແຜນການໃນການຈັດຕັ້ງປະຕິບັດໂດຍໄດ້ສົ່ງພະນັກງານກະສິກຳເມືອງຮ່ວມກັບວິຊາການຂັ້ນແຂວງລົງປຸກລະດົມຊຸກຍູ້ ແລະ ສົ່ງເສີມໃຫ້ປະຊາ ຊົນຕື່ນຕົວຫ້າວຫັນທຳການຜະລິດພ້ອມທັງສະໜອງແນວພັນໃຫ້ປະຊາຊົນມາຮອດປະຈຸບັນໄດ້ສະໜອງແນວພັນເຂົ້າທັງໝົດ 89.620 ກິໂລ ໃນນັ້ນແນວພັນຈາກພາກລັດຖະບານຄື: ສູນໜອງລົມມີ 28.680 ກິໂລ, ແນວພັນ ຈາກໂຄງການKoica 23.940 ກິໂລ, ແນວພັນຈາກກົມສົ່ງເສີມ 20.000 ກິໂລ, ແລະ ຈາກບໍລິ ສັດ IDPມີ 17.000 ກິໂລ.

  ພາຍຫຼັງທີ່ໄດ້ຮັບແນວພັນເຂົ້າແລ້ວປະຊາຊົນກໍລົງມືສູ່ການຜະລິດເປັນຕົ້ນການກຽມດິນນາສະເພາະການຜະລິດເຂົ້າປີ 2020 ນີ້ທົ່ວເມືອງມີເນື້ອທີ່ໃນແຜນການວາງເປົ້າໝາຍການຜະລິດໃຫ້ໄດ້ 7.537 ເຮັກຕາ ແຕ່ຕາມການປະ ເມີນເນື້ອທີ່ການຜະລິດຕົວຈິງມາ ຮອດວັນທີ 2 ມິຖຸນາ 2020 ສາ ມາດເກັບກຳຂໍ້ມູນໄດ້ຄື: ເນື້ອທີ່ນາຕົວຈິງໃນປີ 2019 ມີ 6.630 ເຮັກຕາ ເປັນເນື້ອທີ່ທຳການຜະລິດທັງໝົດ,ເນື້ອທີ່ນາບຸກເບີກໃໝ່ 4 ຈຸດ ເຂດຈັດສັນຖືກກະທົບຈາກເຫດຄູກັນນໍ້າເຊປຽນ-ເຊນໍ້ານ້ອຍແຕກໃນວັນທີ 23 ກໍລະກົດປີ 2018 ມີ 2.267 ເຮັກຕາ ລວມເປັນ 8.897 ເຮັກຕາ ໃນຈຸດນີ້ປະຊາຊົນເຮັດນາຫວ່ານ 90% ຂອງເນື້ອທີ່ບຸກເບີກນອກຈາກເຂດນີ້ແລ້ວຍັງມີປະຊາຊົນອີກຫຼາຍບ້ານຂອງເມືອງສະໜາມໄຊເຮັດນາຫວ່ານປະຈຸບັນສຳເລັດການຫວ່ານແລ້ວ 1.778 ເຮັກຕາ, ການຕົກກ້ານາດຳແມ່ນໄດ້ 5% ແລະ ໄຖ ຮຸດໄດ້ 20%.

 ເພື່ອຮັບປະກັນໃຫ້ແກ່ການຜະລິດໃຫ້ໄດ້ຕາມແຜນການທາງຫ້ອງການກະສິກຳ ແລະປ່າໄມ້ເມືອງໄດ້ມີການກຽມຄວາມພ້ອມໃນການຕ້ານແລ້ງ ແລະຕ້ານຖ້ວມຊຶ່ງເປັນໄພພິບັດທາງທຳມະຊາດທີ່ອາດຈະເກີດຂຶ້ນເປັນຕົ້ນແມ່ນດ້ານແນວພັນ, ຢາປາບສັດຕູພືດ ແລະ ຄອງຊົນລະປະທານທີ່ສາມາດສະໜອງນໍ້າ ໂດຍສະເພາະແມ່ນຊົນລະປະທານຫ້ວຍສະໝອງໃຫ້ຢູ່ໃນທ່າກຽມພ້ອມ ແລະສາມາດຮັບມືໄດ້ໃນລະດັບໃດໜຶ່ງແຕ່ຖ້າເປັນກໍລະນີຮ້າຍແຮງທາງເມືອງກໍຈະໄດ້ສະເໜີຂຶ້ນຫາທາງພະແນກ ແລະກະຊວງເພື່ອໃຫ້ທາງຂັ້ນເທິງຊອກວິທີທາງແກ້ໄຂໃຫ້ທັນເວລາຖ້າຫາກເກີດມີບັນຫາດັ່ງກ່າວ.

_____________

ໂດຍ: ຍົມມະລາ ບຸບຜາວັນ

 

แชร์