ທຳລາຍສິນຄ້າທີ່ລະເມີດລະບຽບກົດໝາຍຄຸ້ມຄອງການຄ້າ

ພະແນກອຸດສາຫະກໍາ ແລະການຄ້າ ແຂວງຫຼວງພະບາງ ໄດ້ຈັດພິທີທໍາລາຍສິນຄ້າປອມແປງ, ສິນຄ້າເຊື່ອມຄຸນເສຍຄຸນ, ສິນຄ້າໝົດອາຍຸການນໍາໃຊ້, ສິນຄ້າທີ່ລະເມີດລະບຽບການຄຸ້ມຄອງທາງການຄ້າ ແລະສິນຄ້າລອກຮຽນແບບຂຶ້ນໃນວັນທີ17 ມິຖຸນາ 2020 ນີ້ທີ່ພະແນກດັ່ງກ່າວໂດຍການເຂົ້າຮ່ວມຂອງ ທ່ານ ສຸກັນ ບຸນຍົງ ຮອງເຈົ້າແຂວງໆ ຫຼວງພະບາງ,ທ່ານ ສໍານານ ສົນທະນີ ຫົວໜ້າພະແນກອຸດສາຫະກໍາ ແລະການຄ້າ ແຂວງຫຼວງພະບາງ,ມີເຈົ້າໜ້າທີ່ລົງກວດກາຂັ້ນແຂວງ,ຂັ້ນນະຄອນ ຫຼວງ ພ້ອມດ້ວຍແຂກຖືກເຊີນເຂົ້າຮ່ວມເປັນພະຍານ.

  ທ່ານ ຊົວວ່າງ ຫວ່າງ ຫົວໜ້າຄະແໜງການຄ້າພາຍໃນລາຍງານໃຫ້ຮູ້ວ່າ: ໃນໄລຍະຜ່່ານເຈົ້າໜ້າທີ່ກວດກາການຄ້າ ແລະ ປົກປ້ອງຜູ້ຊົມໃຊ້ພະແນກອຸດສາຫະກໍາ ແລະການຄ້າ ແຂວງຫຼວງພະບາງໄດ້ຮ່ວມກັບພາກສ່ວນທີ່ກ່ຽວຂ້ອງໄດ້ລົງກວດໃນ 3 ຮູບແບບຄື: ກວດກາຕາມປົກກະຕິ, ກວດກາຕາມຄໍາສັ່ງ ແລະກວດກາຕາມແຫຼ່ງຂ່າວທີ່ສະເໜີໃຫ້ກວດ ແລະ ຜ່ານການເຄື່ອນໄຫວຕິດຕາມກວດກາໃນ 1 ປີຜ່ານມາ ສາມາດຢືດສິນຄ້າທີ່ລະເມີດລະບຽບກົດໝາຍຄຸ້ມຄອງການຄ້າ, ສິນຄ້າເຊື່ອມຄຸນເສຍຄຸນ, ສິນຄ້າລອກຮຽນແບບໄດ້ແບ່ງອອກເປັນ 3 ໝວດສິນຄ້າໝວດທີ 1 ແມ່ນສິນຄ້າປອມແປງລອກຮຽນແບບ (ປະເພດແຟັບຍີ່ຫໍ້ແອັກແທັກອີ່ຊີ່) ລົງກວດຢູ່ພາຍ ໃນນະຄອນຫຼວງພະບາງມີ 3 ຕະຫຼາດເປົ້າໝາຍຄື: ຕະຫຼາດໂພສີ,ຕະຫຼາດນາວຽງຄໍາແລະຕະຫຼາດມະໂນລັກ,ລວມທັງໝົດ 21 ຮ້ານ,ກວດພົບ ແລະຍືດແຟັບປອມຍີ່ຫໍ້ແອັກແທັກອີ່ຊີ່ໄດ້ 312 ຖົງ, ຄິດເປັນມູນຄ່າ 2 ລ້ານກວ່າກີບ,ໝວດທີ 2 ສິນຄ້າ ນອກລະບົບ, ສິນຄ້າທີ່ລະເມີດລະບຽບກົດໝາຍ (ປະເພດຈານດາວທຽມ, ກ່ອງຮັບສັນຍານແລະອຸປະກອນຮັບສັນຍານດາວທຽມ) ໄດ້ກວດຢູ່ 200 ຮ້ານ ແລະ ຕະຫຼາດ 4 ແຫ່ງພາຍໃນແຂວງຫຼວງພະບາງ, ສາມາດກວດພົບເຫັນ ແລະ ຢືດຈານດາວທຽມໄດ້ 82 ຈານ, ກ່ອງຮັບສັນຍານ ແລະຫົວເທັບຮັບສັນຍານດາວທຽມ 330 ເຄື່ອງ ລວມມູນຄ່າທັງ ໝົດ 121 ລ້ານກີບ ແລະໝວດທີ 3 ສິນຄ້າໝົດອາຍຸການນໍາໃຊ້,ເຊື່ອມຄຸນເສຍຄຸນ (ປະເພດເຄື່ອງດື່ມນໍ້າອັດລົມ,ເຄື່ອງສະບຽງອາຫານອຸປະໂພກບໍລິໂພກ) ໄດ້ກວດກາບັນດາຫ້າງຮ້ານຂາຍຍົກ-ຂາຍຍ່ອຍ ລວມ 81 ຄັ້ງ, ມີ 121 ຮ້ານ, ໃນນັ້ນຮ້ານຂາຍຍົກ - ຂາຍຍ່ອຍຢູ່ໃນຕະຫຼາດ 4 ແຫ່ງ, ກວດກາ 11 ຄັ້ງ, ມີຈໍານວນ 32 ຮ້ານ ແລະຮ້ານຊ໋ອບ ປິງມໍ 5 ແຫ່ງ, ລົງກວດກາ 21 ຄັ້ງ, ສາມາດກວດພົບ ແລະຢືດສິນ ຄ້າໝົດອາຍຸການນໍາໃຊ້, ສິນຄ້າເຊື່ອມຄຸນເສຍຄຸນຈໍານວນ 65 ລາຍການລວມເປັນມູນຄ່າ 25 ລ້ານກວ່າກີບ, ລວມມູນຄ່າສິນຄ້າການທໍາລາຍສິນຄ້າທີ່ລະເມີດລະບຽບກົດໝາຍຄຸ້ມຄອງການຄ້າຄັ້ງນີ້ລວມທັງໝົດ 148 ລ້ານກວ່າກີບ.

   ທ່ານກ່າວຕື່ມວ່າສໍາລັບມາດຕະການທີ່ຈັດຕັ້ງປະຕິບັດຕໍ່ຜູ້ລະເມີດທາງເຈົ້າໜ້າທີ່ການຄ້າໄດ້ເຮັດບົດບັນທຶກກ່າວເຕືອນ ແລະສຶກສາອົບຮົມເຈົ້າຂອງຮ້ານທີ່ໄດ້ກວດພົບເຫັນສິນຄ້າຈໍານວນດັ່ງກ່າວບໍ່ໃຫ້ມີການລະເມີດຄັ້ງຕໍ່ໄປອີກ, ຖ້າຫາກຍັງກວດພົບເຫັນການລະເມີດຄັ້ງຕໍ່ໄປທາງເຈົ້າໜ້າທີ່ຈະໄດ້ໃຊ້ມາດຕະການຕາມລະບຽບກົດໝາຍຢ່າງເຂັ້ມງວດ.

 

_______________

ຂ່າວ: ສີສຸວັນ

แชร์