ເມືອງບົວລະພາ ຫາລືກຽມປະກາດບ້ານວັດທະນະທໍາ

  ໃນວັນທີ 15 ມິຖຸນາ ທີ່ຜ່ານມາ ຢູ່ທີ່ຫ້ອງປະຊຸມຫ້ອງວ່າ ການປົກຄອງເມືອງບົວລະພາ ແຂວງຄຳມ່ວນ ຄະນະຊີ້ນຳການສ້າງຄອບຄົວ ແລະບ້ານວັດທະນະທຳຂັ້ນເມືອງໄດ້ຈັດກອງປະຊຸມປືກສາຫາລືກະກຽມຄວາມພ້ອມໃນການຈັດພິທີປະກາດຮັບຮອງເອົາ 9 ບ້ານ ຂອງກຸ່ມບ້ານຫ້ວຍທ່າ ແລະກຸ່ມນາຊະລອນເມືອງບົວລະພາເປັນບ້ານວັດທະນະທຳຄື: ບ້ານຜາຂຽດ, ບ້ານຫ້ວຍທ່າ, ບ້ານນາ ພຽນລ້ານ, ບ້ານລ້າຍ, ບ້ານປ່າ ກ້ວຍ, ບ້ານໜອງໜ້ຽວ,ບ້ານນໍ້າອອກຮູ, ບ້ານມຸກ ແລະ ບ້ານໃໝ່ວັງ ເງືອກໂດຍພາຍໃຕ້ການເປັນປະທານຂອງທ່ານ ສຸກຂະເສີມ ແກ້ວຈັນທະລາ ຄະນະປະຈຳພັກເມືອງຮອງເຈົ້າເມືອງໆບົວລະພາປະທານຜູ້ຊີ້ນຳວຽກງານການສ້າງຄອບ ຄົວ ແລະບ້ານວັດທະນະທຳຂັ້ນເມືອງເຂົ້າຮ່ວມມີບັນດາໃນຄະນະຊີ້ນຳພ້ອມດ້ວຍທ່ານຫົວໜ້າ, ຮອງຫົວໜ້າຫ້ອງການ ແລະພະນັກງານວິຊາການທີ່ກ່ຽວຂ້ອງເຂົ້າຮ່ວມນຳຢ່າງພ້ອມຽງ.

 ກອງປະຊຸມຄັ້ງນີ້ທ່ານ ໄຊສະຫວັນ ສິງຈຳປາໄຊ ຮອງຫົວໜ້າຫ້ອງການຖະແຫຼງຂ່າວ,ວັດທະນະທຳ ແລະທ່ອງທ່ຽວເມືອງກໍໄດ້ຜ່ານ ຂໍ້ຕົກລົງຂອງເຈົ້າເມືອງໆບົວລະພາສະບັບເລກ ທີ 157/ຈມ.ບພ ວ່າດ້ວຍການແຕ່ງຕັ້ງຄະນະຮັບຜິດຊອບ ແລະອະນຸກຳມະການຈັດພິທີປະກາດ ແລະຮັບຮອງບ້ານວັດທະນະທຳຢູ່ທີ່ເມືອງບົວລະພາ.

  ຈາກນັ້ນທ່ານ ສຸກຂະເສີມ ແກ້ວຈັນທະລາ ຮອງເຈົ້າເມືອງໆບົວລະພາກໍໄດ້ໂອ້ລົມໃຫ້ທິດຊີ້ນຳເພື່ອພ້ອມກັນຄົ້ນຄວ້າປຶກສາຫາລື ແລະ ແລກປ່ຽນບົດຮຽນໃນການຈັດ ຕັ້ງປະຕິບັດໃຫ້ວຽກງານດັ່ງ ກ່າວໄດ້ຮັບຜົນສຳເລັດເປັນຢ່າງດີ. ທ່ານຍັງໄດ້ເນັ້ນໜັກໃຫ້ທຸກພາກສ່ວນຕ້ອງໄດ້ພ້ອມກັນຈັດຕັ້ງປະຕິບັດວຽກງານທີ່ຕົນຮັບຜິດຊອບເພື່ອເຮັດໃຫ້ພິທີປະກາດຮັບຮອງບ້ານວັດທະນະທຳໃໝ່ທັງ 9 ບ້ານໃນຄັ້ງນີ້ໄດ້ຮັບຜົນສຳເລັດທີ່ເຕັມໄປດ້ວຍບັນຍາກາດແລະມີຄວາມໝາຍຄວາມສຳຄັນຕໍ່ການເສີມຂະຫຍາຍອະນຸລັກຮັກສາວັດທະນະທຳຮີດຄອງປະເພນີອັນດີງາມຂອງຊາດລາວບົນພື້ນຖານປະຢັດມັດທະຍັດເອົາໃຈໃສ່ປະຕິບັດມາດຕະການຕ່າງໆ ໃນການປ້ອງກັນພະຍາດລະບາດໂຄວິດ-19 ໃຫ້ມີຄວາມປອດໄພທຸກຊັ້ນຄົນ.

___________

ໜັງສືພິມເສດຖະກິດ-ສັງຄົມ

แชร์