ການຮຽນ-ການສອນຫຼັງພັກໂຄວິດ-19 ຢູ່ເມືອງສະໜາມໄຊ ຍັງມີບັນຫາທ້າທາຍ

  ການຈັດຕັ້ງປະຕິບັດດຳເນີນການຮຽນ-ການສອນຄືນທຸກຊັ້ນຮຽນຢູ່ທົ່ວເມືອງສະໜາມໄຊ ແຂວງ ອັດຕະປື ພາຍຫຼັງທີ່ພະຍາດໂຄວິດ-19 ໄດ້ມີການຜ່ອນຄາຍລົງ, ນັບແຕ່ວັນທີ 18 ພຶດສະພາ 2020 ມາຮອດວັນທີ 15 ມິຖຸນາ 2020 ນີ້ມີນັກຮຽນທີ່ບໍ່ທັນໄດ້ມາຮຽນກວມເອົາເຖິງ 30% ຂອງຈຳນວນນັກຮຽນທັງໝົດຍ້ອນມີຫຼາຍປັດໄຈທີ່ເປັນບັນຫາ ແລະສິ່ງທ້າທາຍ.ທ່ານ ທອງໄຊ ບຸດທອງດີ ຫົວໜ້າຫ້ອງການສຶກສາທິການ ແລະກີລາເມືອງສະໜາມໄຊ ແຂວງອັດຕະປືໄດ້ໃຫ້ສຳພາດກັບສື່ມວນຊົນວ່າ: ພາຍຫຼັງທີ່ຄະນະພັກ-ຄະນະບໍລິຫານການສຶກສາ ແລະກີລາ ເມືອງສະໜາມໄຊພ້ອມດ້ວຍພະນັກງານວິຊາການພາຍໃນຫ້ອງການສຶກສາເມືອງໄດ້ມີການລົງເຄື່ອນໄຫວຟື້ນຟູ, ຊຸກຍູ້ເປີດບັ້ນດຳເນີນການຮຽນ-ການສອນຄືນໃໝ່ທຸກຊັ້ນຮຽນໃນທົ່ວເມືອງຕາມແຈ້ງການຂອງຂັ້ນເທິງຢ່າງເອົາໃຈໃສ່ໂດຍໄດ້ມີການປະສານສົມ ທົບກັບຄູ-ອາຈານຢູ່ໂຮງຮຽນ ແລະ ອຳນາດການປົກຄອງທ້ອງຖິ່ນຢ່າງທົ່ວເຖິງພ້ອມມີການຕິດຕາມ, ທົ່ວເມືອງສະໜາມໄຊໄດ້ມີ 8 ສູນຄື: ສູນດອນໃຜ່ມີ 13 ໂຮງ ຮຽນ, ສູນ ມຕ ເຊປຽນມີ 19 ໂຮງຮຽນ, ສູນສົ້ມປ່ອຍມີ 7 ໂຮງຮຽນ, ສູນກະແຊະມີ 6 ໂຮງຮຽນ, ສູນປາກບໍ່ມີ 5 ໂຮງຮຽນ ແລະສູນໄຊດອນໂຂງມີ 6 ໂຮງຮຽນ.

  ສະເພາະການສອນ ປ5, ມ4 ແລະມ7 ແມ່ນໄດ້ດໍາເນີນການຮຽນ-ການສອນແຕ່ວັນທີ 18 ພຶດສະພາ 2020, ສ່ວນຂັ້ນ ປ1-ປ4, ມ1-ມ3 ແລະມ5-ມ6 ແມ່ນດໍາເນີນການຮຽນ-ການສອນນັບແຕ່ວັນທີ 2 ມິຖຸນາ 2020 ເປັນຕົ້ນມາ,ສຳລັບໂຮງຮຽນອະນຸບານ ມີນັກຮຽນທັງໝົດ 265 ຄົນ,ຍິງ 130 ຄົນ, ບໍ່ທັນໄດ້ມາຮຽນ 125 ຄົນ, ຍິງ 55 ຄົນ; ຫ້ອງກຽມ ແລະປະຖົມມີນັກຮຽນທັງໝົດ 5.233 ຄົນ ຍັງບໍ່ທັນມາຮຽນ 1.323 ຄົນ, ຍິງ 695 ຄົນ, ຊັ້ນມັດທະຍົມສຶກສາມີນັກຮຽນທັງໝົດ  3.078 ຄົນ,ຍິງ 1.570 ຄົນຍັງບໍ່ທັນມາຮຽນ 274 ຄົນ, ຍິງ 144 ຄົນ; ໃນນັ້ນຫຼາຍກວ່າໝູ່ແມ່ນຊັ້ນ ມ1 ໂຮງຮຽນ ມຕ ດອນໃຜ່.

  ສະເລ່ຍລວມແລ້ວນັກຮຽນທີ່ ຍັງບໍ່ທັນໄດ້ມາຮຽນຕາມເວລາທີ່ກຳນົດແຈ້ງໃນທົ່ວເມືອງກວມເອົາ 30% ຂອງຈຳນວນນັກຮຽນທັງໝົດໃນທົ່ວເມືອງຫຼາຍກວ່າໝູ່ແມ່ນໂຮງຮຽນປະຖົມບ້ານຫາດຍາວ, ໄຊດອນໂຂງ,ໂພນສະອາດ, ສົ້ມປ່ອຍ, ກະແຊະ ແລະດອນເສືອ ຊຶ່ງຢູ່ຂັ້ນ ປ1, ທັງນີ້ກໍ່ຍ້ອນມີຫຼາຍ ບັນຫາ ແລະສິ່ງທ້າທາຍເປັນຕົ້ນແມ່ນນັກຮຽນຢູ່ກະແຈກກະຈ່າຍ, ໄປບ່ອນທໍາການຜະລິດນໍາພໍ່ແມ່ ແລະບ່ອນທໍາມາຫາກິນອື່ນໆ, ເສັ້ນທາງທຽວໄປໂຮງຮຽນເປີເປື້ອນ ແລະຫ່າງໄກຈາກໂຮງຮຽນ.

  ເຖິງແນວໃດກໍ່ຕາມເພື່ອເຮັດໃຫ້ຄູ-ອາຈານ ແລະ ນັກຮຽນໄດ້ດຳເນີນການຮຽນ-ການສອນຄົບຕາມໂຄງການຫຼັກສູດການຮຽນ-ການສອນໃນທຸກຊັ້ນ, ທຸກຊັ້ນຮຽນ ໂດຍໄປຕາມ 3 ລັກສະນະ ແລະ 5 ຫຼັກມູນການສຶກສາທີ່ກະຊວງ ສຶກສາທິການ ແລະກີລາໄດ້ວາງອອກ, ຄະນະພັກ-ຄະນະບໍລິການຫານສຶກສາຂັ້ນເມືອງໄດ້ມີການສືບຕໍ່ປະສານສົບທົບກັບຜູ້ອໍານວຍ ການໂຮງຮຽນ, ຄະນະພັດທະນາການສຶກສາຂັ້ນບ້ານ, ເຂົ້າເຖິງພໍ່ແມ່-ຜູ້ປົກຄອງເດັກປຸກລະດົມນັກຮຽນໃຫ້ໄດ້ເຂົ້າມາສຶບຕໍ່ການຮຽນ-ການສອນໃຫ້ຈົບຕາມໂຄງການຫຼັກສູດການຮຽນ-ການສອນສົກຮຽນ 2019-2020 ຢ່າງມີຄຸນນະພາບ.

__________

ໜັງສືພິມພິມເສດຖະກິດ-ສັງຄົມ

แชร์