ມອບໃບຍ້ອງຍໍໃຫ້ພະນັກງານ ສກຂ ອັດຕະປື

  ພະແນກສຶກສາທິການ ແລະກີລາແຂວງ (ສກຂ)ອັດຕະປື ໄດ້ຈັດພິທີມອບໃບຍ້ອງຍໍຂັ້ນລັດຖະບານ ແລະຂັ້ນແຂວງໃຫ້ແກ່ພະນັກງານ-ລັດຖະກອນພະແນກສຶກສາ ທິການ ແລະກີລາແຂວງອັດຕະປື, ຜູ້ທີ່ມີຄຸນງາມຄວາມດີ-ຜົນງານດີເດັ່ນປະກອບສ່ວນອັນສຳຄັນດ້ານເຫື່ອແຮງ, ສະຕິປັນຍາ ແລະ ທຶນຮອນເຂົ້າໃນການຊ່ວຍເຫຼືອຜູ້ປະສົບໄພພິບັດຄູກັນນໍ້າເຂື່ອນເຊປຽນ-ເຊນໍ້ານ້ອຍແຕກຢູ່ເມືອງສະໜາມໄຊ ແຂວງອັດຕະປື ຄັ້ງວັນທີ 23 ກໍລະກົດ 2018 ຜ່ານມາ, ຜົນງານດັ່ງກ່າວເປັນຜົນງານ ປະກອບສ່ວນອັນສຳຄັນໃນການພັດທະນາປະເທດຊາດ.

  ພິທີອັນມີກຽດດັ່ງກ່າວໄດ້ຈັດຂຶ້ນໃນຕອນບ່າຍຂອງວັນທີ 17 ມິຖຸນາ 2020 ນີ້ ທີ່ຫ້ອງປະຊຸມຂອງພະແນກສຶກສາທິການ ແລະ ກີລາ ແຂວງອັດຕະປື ໂດຍໃຫ້ກຽດເປັນປະທານ ແລະກ່າວມອບຂອງທ່ານ ບຸນຮຽນ ແກ້ວບົວພາດ ປະທານກວດກາພັກ - ລັດແຂວງ, ມີທ່ານ ເພັດມີໄຊ ຄຳພັກດີ ຫົວໜ້າພະແນກພາຍໃນແຂວງ, ທ່ານ ອຸດົມສິນ ສີຊານົນ ຮອງຫົວໜ້າພະແນກສຶກສາທິການ ແລະ ກີລາແຂວງ, ແຂກທີ່ຖືກເຊີນ ແລະ ພະນັກງານລັດຖະກອນທີ່ຂຶ້ນກັບພະແນກສຶກສາທິການ ແລະ ກີລາແຂວງເຂົ້າຮ່ວມ.

   ຜູ້ທີ່ໄດ້ຮັບໃບຍ້ອງຍໍຂັ້ນລັດຖະບານໃນຄັ້ງນີ້ມີ 4 ທ່ານ, ໄດ້ຮັບໃບຍ້ອງຍໍຂັ້ນແຂວງຈຳນວນ 101 ທ່ານ, ໂດຍໃຫ້ກຽດຂຶ້ນມອບໃບຍ້ອງຍໍໃນຄັ້ງນີ້ໂດຍ ທ່ານ ບຸນຮຽນ ແກ້ວບົວພາດ ໃຫ້ກັບຜູ້ທີ່ມີຜົນງານດີເດັ່ນຢ່າງສົມກຽດ.

  ໂອກາດດຽວກັນ, ທ່ານ ບຸນຮຽນ ແກ້ວບົວພາດ ໄດ້ສະແດງຄວາມຍ້ອງຍໍຊົມເຊີຍຕີລາຄາສູູງຕໍ່ຜົນງານທີ່ພະນັກງານ-ລັດຖະກອນພະແນກສຶກສາທິການ ແລະກີລາແຂວງສາມາດຍາດມາໄດ້, ຊຶ່ງເປັນຜົນງານຍິ່ງໃຫຍ່, ເອກອ້າງທະນົງໃຈໃນການປະກອບສ່ວນເຂົ້າໃນພາລະກິດການປົກປັກຮັກສາ ແລະ ສ້າງສາພັດທະນາປະເຊາດ ແລະໃຫ້ສຶບຕໍ່ຮັກສາມູນເຊື້ອ, ອອກແຮງງານແຂ່ງຂັນສ້າງຜົນງານໃນການພັດທະນາຊັບພະຍາກອນມະນຸດໃຫ້ໄດ້ດີຂຶ້ນກວ່າເກົ່າຕາມ 3 ລັກສະນະ ແລະ 5 ຫຼັກມູນການສຶກສາທີ່ພັກ ແລະລັດຖະບານໄດ້ວາງອອກ.

_____________

ໜັງສືພິມເສດຖະກິດ-ສັງຄົມ

แชร์