ສະຫະພັນແມ່ຍິງໂຮງຮຽນເຕັກນິກວິຊາຊີບ ອຸດົມໄຊ ຮັບໃບຢັ້ງຢືນ 3 ດີ

  ພິທີສະຫຼຸບການເຄື່ອນໄຫວ ຈັດຕັ້ງປະຕິບັດວຽກງານຂໍ້ແຂ່ງຂັນ 3 ດີປະຈໍາປີ 2018 ຂອງສະຫະພັນແມ່ຍິງຮາກຖານໂຮງຮຽນເຕັກນິກ ວິຊາຊີບແບບປະສົມແຂວງອຸດົມໄຊ ໄດ້ຈັດຂຶ້ນໃນວັນທີ 7 ກຸມພາ 2019 ທີ່ຫ້ອງປະຊຸມຂອງໂຮງຮຽນດັ່ງ ກ່າວ.

  ການຈັດພິທີສະຫຼຸບໃນຄັ້ງນີ້ກໍເພື່ອເປັນການຕີລາຄາ ແລະປະເມີນຄືນ ຜົນການເຄື່ອນໄຫວຈັດຕັ້ງປະຕິບັດ ວຽກງານບັ້ນແຂ່ງຂັນ 3 ດີ ໃນໄລ ຍະປີ 2018  ຜ່ານມາ ໃນນັ້ນໄດ້ຍົກໃຫ້ເຫັນເຖິງຜົນງານຫຼາຍດ້ານທີ່ສະຫະພັນແມ່ຍິງຮາກຖານໂຮງຮຽນ ເຕັກນິກວິຊາຊີບແບບປະສົມແຂວງ ອຸດົມໄຊຍາດມາໄດ້ໂດຍສະເພາະ ແມ່ນສາມາດຄັດເລືອກສະມາຊິກແມ່ຍິງທີ່ປະຕິບັດຂໍ້ແຂ່ງຂັນ 3 ດີ ທັງພົນລະເມືອງດີ, ພັດທະນາດີ ແລະ ສ້າງຄອບຄົວດີໄດ້ທັງໝົດຈຳນວນ 107 ສະຫາຍ, ການຈັດຕັ້ງປະຕິບັດວຽກງານກອງທຶນກໍໄດ້ຮັບການພັດທະນາ ແລະ ຂະຫຍາຍຕົວປະຈຸບັນມີເງິນກອງທຶນທັງໝົດ 23 ລ້ານ ກວ່າກີບໃນຈຳນວນສະມາຊິກ 32 ສະຫາຍ, ໄດ້ເຄື່ອນໄຫວສ້າງລາຍ ຮັບເຂົ້າຄັງລວມເຮັດໃຫ້ສາມາດກຸ້ມ ຕົນເອງໃນການເຄື່ອນໄຫວກິດຈະກຳຕ່າງໆນອກນັ້ນ  ຍັງສາມາດສ້າງເສດຖະກິດຄອບຄົວໃຫ້ມີລາຍຮັບຈົນກາຍເປັນຄອບຄົວຕົວແບບໃຫ້ແກ່ສະມາຊິກແມ່ຍິງໃນໜ່ວຍງານດຽວກັນໂດຍສະເພາະແມ່ນຄອບຄົວຂອງ  ທ່ານ ນາງ ໄຊສະຫວັນ ສົນສິດທິເດດ, ນາງຫົງທອງ ວິລະດາ, ນາງບົວລິດ ຍອດສີສະຫວັດ ແລະຄົນອື່ນໆອີກຈຳນວນໜຶ່ງຕໍ່ກັບຜົນງານດັ່ງກ່າວເຮັດໃຫ້ສະຫະພັນແມ່ຍິງ ແຂວງອຸດົມໄຊເຫັນດີຕົກລົງມອບ ໃບຍ້ອງຍໍໃຫ້ແກ່ສະມາຊິກສະຫະ ພັນແມ່ຍິງຮາກຖານໂຮງຮຽນເຕັກນິກວິຊາຊີບແບບປະສົມແຂວງອຸດົມໄຊຈຳນວນ 14 ສະຫາຍພ້ອມທັງຢັ້ງຢືນ ແລະ ຮັບຮອງເອົາສະຫະພັນແມ່ຍິງຮາກຖານໂຮງຮຽນເຕັກນິກວິຊາຊີບແບບປະສົມແຂວງອຸດົມໄຊເປັນສະຫະພັນແມ່ຍິງຮາກຖານ 3 ດີ ປະຈຳປີ 2018 ຊຶ່ງໃຫ້ກຽດມອບໂດຍທ່ານ ນາງ ວັນທອງ ນິດ ສະດີຮອງປະທານສະຫະພັນແມ່ຍິງແຂວງອຸດົມໄຊ.

  ໃນພິທີດັ່ງກ່າວທ່ານ ນາງ ວັນ ທອງ ນິດສະດີຮອງປະທານສະຫະພັນແມ່ຍິງແຂວງ, ທ່ານ ບຸນຄ້ຳປັນຍາສັກ ຄະນະພັກ, ຄະນະອຳ ນວຍການໂຮງຮຽນ, ທ່ານ ນາງ ຄຳຫຼ້າ ອິນທະວົງ ປະທານສະຫະ ພັນແມ່ຍິງຮາກຖານໂຮງຮຽນເຕັກນິກວິຊາຊີບແບບປະສົມແຂວງອຸ ດົມໄຊຕະຫຼອດຮອດຕາງໜ້າໜ່ວຍ ແມ່ຍິງອ້ອມຂ້າງແຂວງ ແລະ ສະມາຊິກແມ່ຍິງພາຍໃນຮາກຖານດັ່ງກ່າວເຂົ້າຮ່ວມ.

แชร์