ຈຳປາສັກ ສົ່ງເສີມການທ່ອງທ່ຽວ ພາຍໃນຫຼັງໂຄວິດ-19

  ເພື່ອເປັນການສົ່ງເສີມ ແລະ ໂຄສະນາການທ່ອງທ່ຽວພາຍໃນ “ລາວທ່ຽວລາວ” ໃນໄລຍະທຸລະກິດການທ່ອງທ່ຽວງຽບເຫງົາ ເນື່ອງຈາກການລະບາດຂອງພະຍາດໂຄວິດ-19 ພະແນກຖະແຫຼງ ຂ່າວ, ວັດທະນະທຳ ແລະທ່ອງທ່ຽວ (ຖວທ) ແຂວງຈຳປາສັກ ໄດ້ເຊີນນັກທ່ອງທ່ຽວຈາກນະຄອນຫຼວງວຽງຈັນ 35 ທ່ານ ຊຶ່ງນຳພາໂດຍທ່ານ ສະຫຍາມ ຣາມະສຸດ ປະທານບໍລິສັດທິບພະຍະປະກັນໄພມາທ່ອງທ່ຽວແຫຼ່ງທ່ອງທ່ຽວສຳຄັນຂອງແຂວງຈຳປາສັກຊຶ່ງເດີນທາງມາເຖິງໃນວັນທີ 5 ມິຖຸນາ2020 ທີ່ສະໜາມບິນສາກົນປາກເຊໂດຍໃຫ້ກຽດຕ້ອນຮັບຂອງ ທ່ານ ສຸລິນ ເພັດທານີ ຮອງຫົວໜ້າພະແນກ ຖວທ ແຂວງຈຳປາສັກ, ມີບັນດາທ່ານໃນສະມາຄົມນັກທຸລະກິດທ່ອງທ່ຽວ, ສະມາຄົມໂຮງແຮມ, ເຮືອນພັກ ແລະ ຮ້ານອາຫານພາຍໃນແຂວງຈຳປາສັກເຂົ້າຮ່ວມຕ້ອນຮັບຢ່າງພ້ອມພຽງ.

  ໃນໂອກາດສຳຄັນດັ່ງກ່າວຄະນະສະເພາະກິດຕະຫຼາດການທ່ອງ ທ່ຽວແຂວງຈຳປາສັກ ໃຫ້ຮູ້ວ່າ:ການຈັດກິດຈະກຳດັ່ງກ່າວແມ່ນເພື່ອເປັນການສົ່ງເສີມ ແລະໂຄສະນາການທ່ອງທ່ຽວພາຍໃນ “ລາວທ່ຽວລາວ” ໃນໄລຍະທີ່ວຽກງານການທ່ອງທ່ຽວໄດ້ຮັບຜົນກະທົບຈາກການລະບາດຂອງພະຍາດໂຄວິດ-19 ທີ່ເຮັດໃຫ້ນັກ ທ່ອງທ່ຽວຕ່າງປະເທດທີ່ເປັນແຫຼ່ງລາຍຮັບສຳຄັນບໍ່ສາມາດເຂົ້າມາທ່ຽວລາວໄດ້, ດັ່ງນັ້ນຄະນະກຳມະການສະເພາະກິດຕະຫຼາດການທ່ອງທ່ຽວ ແຂວງຈຳປາສັກ ຊຶ່ງປະກອບມີ: ຂະ ແໜງທ່ອງທ່ຽວ, ສະມາຄົມທຸລະກິດທ່ອງທ່ຽວແຂວງ, ສະມາຄົມໂຮງແຮມ, ເຮືອນພັກ ແລະຮ້ານອາຫານແຂວງ,ກຸ່ມພະນັກງານນຳພາທ່ອງທ່ຽວແຂວງ. ຊຶ່ງພາຍໃຕ້ການຊີ້ນຳຈາກຄະນະນຳພະແນກຖະແຫຼງຂ່າວ, ວັດທະນະທຳ ແລະທ່ອງທ່ຽວແຂວງຈຳປາສັກຈຶ່ງໄດ້ເຊີນເອົານັກທ່ອງທ່ຽວມາຈາກນະຄອນຫຼວງວຽງຈັນທັງໝົດ 35 ທ່ານ ມາທ່ຽວ ແຂວງຈຳປາສັກ 3 ຄືນ 4 ວັນ ແຕ່ວັນທີ 5-8 ມິຖຸນາ 2020 ຊຶ່ງໄດ້ໄປທ່ຽວຕາມແຫຼ່ງທ່ອງທ່ຽວ ສໍາຄັນຂອງແຂວງເປັນຕົ້ນທ່ຽວຊົມມໍລະດົກໂລກວັດພູຈຳປາສັກ, ທ່ຽວມະຫານາທີສີພັນດອນເມືອງໂຂງ ແລະ ທ່ອງທ່ຽວເມືອງປາກຊ່ອງແດນໜາວ, ທັງນີ້ກໍເພື່ອກະຕຸ້ນການທ່ອງທ່ຽວໃຫ້ກັບມາມີບັນຍາກາດຂອງການທ່ອງທ່ຽວຕາມປົກກະຕິ ແລະເປັນການສົ່ງເສີມການທ່ອງທ່ຽວພາຍໃນໃຫ້ຄຶກຄື້ນ.

____________

ໜັງສືພິມເສດຖະກິດ-ສັງຄົມ

แชร์