ໂຄງການກໍ່ສ້າງກັນເຈື່ອນແຄມຂອງ ຈະກາຍເປັນສະຖານທີ່ທ່ອງທ່ຽວແຫ່ງໃໝ່

  ໂຄງການກໍ່ສ້າງກັນຕາຝັ່ງເຈື່ອນແຄມຂອງຢູ່ນະຄອນໄກສອນ ພົມວິຫານ, ແຂວງສະຫວັນນະເຂດ ພາຍຫຼັງສ້າງສຳເລັດຈະກາຍເປັນສະຖານທີ່ທ່ອງທ່ຽວແຫ່ງໃໝ່ຂອງແຂວງສະຫວັນນະເຂດຊຶ່ງເປົ້າໝາຍຂອງໂຄງການແມ່ນສ້າງໃຫ້ເປັນສະຖານທີ່ພັກຜ່ອນຢ່ອນໃຈເປັນຕົ້ນມີສະຖານທີ່ອອກກຳລັງກາຍ, ມີບ່ອນນັ່ງຊົມວິວ, ມີສວນດອກໄມ້, ມີຮ້ານອາຫານ, ຕະຫຼາດກາງຄືນ, ມີຫ້ອງແຖວຂະໜາດນ້ອຍໄວ້ຄອຍໃຫ້ບໍລິການແກ່ນັກທ່ອງທ່ຽວ ແລະອື່ນໆຊຶ່ງມາຮອດປະຈຸບັນການກໍ່ສ້າງຄືບໜ້າແລ້ວ 75% ຂອງໜ້າວຽກທັງໝົດ, ຄາດວ່າຈະສໍາເລັດ 100% ໃນຕົ້ນປີ 2021.

  ທ່ານ ພົມມາ ວົງພະຈິດຫົວໜ້າ ຄຸ້ມຄອງໂຄງການພັດທະນາຕົວເມືອງຕາມແລວເສດຖະກິດຕາເວັນອອກ-ຕາເວັນຕົກອະນຸພາກພື້ນແມ່ນໍ້າຂອງລາຍງານໃຫ້ຮູ້ເມື່ອບໍ່ດົນມານີ້ວ່າ: ໂຄງການກໍ່ສ້າງກັນຕາຝັ່ງເຈື່ອນແຄມຂອງມີຄວາມຍາວທັງໝົດ 980 ແມັດ, ເລີ່ມຈາກທ່າບັກເກົ່າລຽບລົງໄປຕາມ ລໍາແມ່ນໍ້າຂອງ, ໂດຍໄດ້ຖົມດິນຊາຍອອກຈາກຂອບທາງອອກໄປ 50 ແມັດ ແລະລຽງຫີນລຽບຕາມແຄມຂອງ,ເລີ່ມລົງມືກໍ່ສ້າງມາແຕ່ກາງປີ 2019, ລວມມູນຄ່າການກໍ່ສ້າງທັງໝົດ 4,5 ລ້ານກ່ວາ ໂດ ລາສະຫະລັດ, ໂດຍແມ່ນບໍລິສັດລາວມີໄຊກໍ່ສ້າງເປັນຜູ້ຮັບເໝົາກໍ່ສ້າງ.

   ໂຄງການກໍ່ສ້າງກັນຕາຝັ່ງເຈື່ອນແຄມຂອງແມ່ນ 1 ໃນ 7 ກິດຈະກໍາທີ່ນອນຢູ່ໃນໂຄງການພັດທະນາຕົວເມືອງຕາມແລວທາງເສດຖະກິດຕາເວັນອອກ-ຕາເວັນ ຕົກອະນຸພາກພື້ນແມ່ນໍ້າຂອງ ຫຼືໂຄງການ GMS ຂອງແຂວງສະຫວັນນະເຂດ, ໂຄງການນີ້ຈະປະກອບສ່ວນສໍາຄັນເຮັດໃຫ້ນະຄອນໄກສອນພົມວິຫານກໍ່ຄືແຂວງສະຫວັນນະເຂດມີໃບໜ້າໃໝ່ເພາະເມື່ອມີກັນຕະຝັ່ງກັນເຈື່ອນແລ້ວນອກຈາກຈະມີຄວາມປອດໄພຈາກນໍ້າຖ້ວມສະຖານທີ່ແຫ່ງນີ້ຈະກາຍເປັນບ່ອນທ່ອງທ່ຽວແຫ່ງໃໝ່ຂອງແຂວງສະຫວັນນະເຂດຕື່ມອີກ.

___________

ໂດຍ: ວົງມະນີ

 

แชร์