ຫໍໄຕ ວັດຈັນທະສາໂຣ ສະຖາປັດຕະຍະກຳເຄື່ອງໄມ້

  ຫໍໄຕ ທີ່ວັດຈັນທະສາໂຣ ຫຼື ທີ່ຊາວບ້ານເອີ້ນວ່າວັດໜອງລຳຈັນ ເມືອງຈຳພອນ ແຂວງສະຫວັນນະເຂດ ເປັນສະຖາປັດຕະຍະກຳເຄື່ອງໄມ້ທີ່ສະທ້ອນສີມື ຊ່າງ, ຊາວບ້ານລ້ານຊ້າງໃນອາດີດປະກາດຄວາມຍິ່ງໃຫຍ່ທາງພູມປັນຍານາຍຊ່າງທີ່ຖ່າຍທອດກັນມາຫຼາຍຊົ່ວອາຍຸຄົນຖ້າຈະເວົ້າເຖິງຄວາມໂດດເດັ່ນທາງສະຖາປັດຕະຍະກຳ ແລະບູຮານວັດຖຸ.

   ອີງຕາມຂໍ້ມູນຈາກຫ້ອງການຖະແຫຼງຂ່າວວັດທະນະທໍາ ແລະ ທ່ອງທ່ຽວເມືອງຈຳພອນໃຫ້ຮູ້ວ່າ: ຫໍໄຕວັດຈັນທະສາໂຣ ຫຼື ວັດໜອງລຳຈັນເປັນສະຖາປັດຕະຍະກຳເຄື່ອງໄມ້ທີ່ສ້າງຂຶ້ນນັບຮ້ອຍປີມາແລ້ວເປັນໄມ້ທັງຫຼັງ ໂດຍບໍ່ມີການໃຊ້ຕະປູຈັກດອກ, ຕົວເຮືອນຢູ່ເທິງເສົາໄມ້ສູງປະມານ 6 ແມັດ ລວມ 20 ຕົ້ນ, ຫໍໄຕແຫ່ງນີ້ຕັ້ງຢູ່ເທິງໜ້ານໍ້າໜອງຈັນເພື່ອປ້ອງກັນປວກ ແລະແມງໄມ້ເປັນພູມປັນຍາທີ່ສືບທອດກັນມາເປັນບ່ອນເກັບມ້ຽນ “ໜັງສືຜູກ” ຊຶ່ງໝາຍເຖິງໜັງສືທີ່ຈານລົງໜ້າໃບລານແລ້ວມັດເປັນເຫຼັ້ມເອີ້ນວ່າ 1 ຜູກ ແລະທີ່ສໍາຄັນເມື່ອປີ 2000 ມີໜ່ວຍງານອະນຸລັກໜັງສືໃບລານລາວໄດ້ເຮັດການສໍາຫຼວດ ຈຶ່ງຮູ້ວ່າທີ່ຫໍໄຕແຫ່ງນີ້ມີຈຳນວນໜັງສືຜູກຫຼາຍທີ່ສຸດໃນລາວ ແລະຍັງມີຄວາມຫຼາກຫຼາຍທາງດ້ານເນື້ອຫາຫຼາຍທີ່ສຸດອີກດ້ວຍມີຕັ້ງແຕ່ຄໍາສອນທາງສາສະໜາ, ບົດຜະຫຍາ, ນິທານ, ຄະຕິທຳ, ກອນລຳ, ຕຳ ລາຢາພື້ນເມືອງ ແລະອື່ນໆ.

  ດ້ວຍເຫດນັ້ນຫໍໄຕວັດຈັນທະສາໂຣ ຈຶ່ງເປັນເໝືອນສະຖານທີ່ສຳຄັນແຫ່ງໜຶ່ງເປັນບ່ອນສຶກສາຫາຄວາມຮູ້ທັງພະສົງ, ແພດພື້ນເມືອງ ເມື່ອໄດ້ຮູ້ເຖິງຄວາມສຳຄັນທາງການຈຶ່ງໄດ້ນຳໜັງສືຜູກອອກມາທຳຄວາມສະອາດ, ປ່ຽນຜ້າທີ່ຫຸ້ມຫໍ່ແລ້ວຈຶ່ງເອົາໄປໄວ້ໃນກຸຕິເປັນການຊົ່ວຄາວເພາະຫຼາຍປີຜ່ານມານໍ້າ ໃນໜອງຈັນແຫ້ງລົງເຮັດໃຫ້ມີບັນຫາເລື່ອງແມງໄມ້ທີ່ຈະເຂົ້າໄປທຳລາຍຕໍ່ມາຫໍໄຕບ້ານໜອງລຳຈັນ ຫຼັງເກົ່າໄດ້ຖືກບູລະນະຂຶ້ນໃໝ່ຕາມຮູບຊົງເດີມທຸກປະການ ແລະສຳເລັດຮຽບຮອຍເມື່ອປາຍເດືອນພຶດສະພາປີ 2004.

-------

ໜັງສືພິມເສດຖະກິດ-ສັງຄົມ

แชร์