4 ວິທະຍາໄລກະສິກຳ ແລະປ່າໄມ້ ຫາລືຫຼັກສູດສາຂາທຸລະກິດກະສິກຳຮ່ວມກັນ

 ແນໃສ່ເຮັດໃຫ້ຫຼັກສູດການຮຽນ-ການສອນຂອງ 4 ວິທະຍາໄລກະສິກໍາ ແລະປ່າໄມ້ໃນສາຂາທຸລະກິດກະສິກໍາທີ່ຂຶ້ນກັບກະຊວງກະສິກຳ ແລະປ່າໄມ້ໃຫ້ມີການພັດທະນາໄປໃນທິດທາງດຽວກັນ ຈຶ່ງໄດ້ຈັດກອງປະຊຸມເພື່ອທົບທວນຫາລືຮ່ວມກັນຂຶ້ນໃນລະຫວ່າງວັນທີ 10-12 ມິຖຸນາ 2020 ທີ່ວິທະຍາໄລກະສິກຳ ແລະປ່າໄມ້ພາກເໜືອແຂວງຫຼວງພະບາງ.

 ທ່ານ ເພັດສະໝອນຖານະສັກຮອງຫົວໜ້າກົມຈັດຕັ້ງ ແລະພະນັກງານກະຊວງກະສິກຳ ແລະປ່າໄມ້ໃນນາມປະທານກອງປະຊຸມກ່າວວ່າ: ຈຸດປະສົງຫຼັກແມ່ນເພື່ອໃຫ້ຫົວໜ້າໂຄງການ SURA FCO,ບັນດາຄະນະອໍານວຍການ, ຫົວໜ້າ ແລະຮອງຫົວໜ້າຄະນະວິຊາທຸລະກິດກະສິກໍາ, ຄະນະກໍາມະການພັດທະນາຫຼັກສູດ, ຫົວໜ້າທີມງານຄູຝຶກຂອງບັນດາ 4 ວິທະຍາໄລກະສິກຳ ແລະປ່າໄມ້ຄື: ວິທະຍາໄລກະສິກຳ ແລະປ່າໄມ້ຈຳປາສັກ, ວິທະຍາໄລກະສິກຳ ແລະ ປ່າໄມ້ສະຫວັນນະເຂດ, ວິທະຍາໄລກະສິກຳ ແລະປ່າໄມ້ບໍລິຄຳໄຊ ແລະວິທະຍາໄລກະສິກຳ ແລະປ່າ ໄມ້ພາກເໜືອແຂວງຫຼວງພະບາງ ພ້ອມດ້ວຍຄູ-ອາຈານທີ່ສິດສອນ ໄດ້ມາທົບທວນຄືນວຽກງານຮ່ວມກັນໃນການຈັດຕັ້ງປະຕິບັດຫຼັກສູດ, ກໍານົດບັນຫາ ແລະສິ່ງທ້າທາຍຕ່າງໆ ຂອງການສິດສອນເພື່ອ ວາງແຜນປັບປຸງຄຸນນະພາບຂອງ ການຮຽນ-ການສອນໃນສາຂາວິຊາທຸລະກິດກະສິກຳໃຫ້ດີຂຶ້ນ ແລະ ໄປໃນທິດທາງດຽວກັນ.

ເຊື່ອແນ່ວ່າຫຼັງຈາກກອງປະຊຸມສໍາເລັດຈະເຮັດໃຫ້ຜູ້ບໍລິຫານທັງ 4 ວິທະຍາໄລກະສິກໍາ ແລະ ປ່າໄມ້ແຕ່ລະແຂວງຈະນໍາເອົາເນື້ອໃນຈິດໃຈຂອງກອງປະຊຸມຄັ້ງນີ້ນໍາໄປຈັດຕັ້ງຜັນຂະຫຍາຍເຂົ້າໃນການບໍລິຫານສິດສອນໃຫ້ນັກຮຽນດ້ວຍປະສິດທິພາບຫຼາຍຂຶ້ນກວ່າເກົ່າ.

-------

ໜັງສືພິມເສດຖະກິດ-ສັງຄົມ

แชร์