ໂຮງຮຽນ ປກສ ຊັ້ນຕົ້ນເລກ 2 ເປີດຊຸດຮຽນ

 ວັນທີ 10 ມິຖຸນາ 2020 ໂຮງຮຽນ ປກສ ຊັ້ນຕົ້ນເລກ 2 ແຂວງໄຊຍະບູລີ ໄດ້ຈັດພິທີເປີດຊຸດຮຽນໃໝ່ຮຸ່ນທີ XIV ຂຶ້ນຢູ່ທີ່ສະໂມສອນໂຮງຮຽນແຫ່ງດັ່ງກ່າວ ພາຍໃຕ້ການເປັນປະທານຂອງ ທ່ານ ພັອ ຄໍາແພງເພັດ ຫົວໜ້າກອງບັນຊາການ ປກສ ແຂວງ ໄຊຍະບູລີ, ໃຫ້ກຽດເຂົ້າຮ່ວມມີ ພັທ ວຽງໄຊ ທໍາມະສິດຮອງຫົວ ໜ້າກົມກໍ່ສ້າງກໍາລັງ, ກົມໃຫຍ່ການເມືອງປ້ອງກັນຄວາມສະຫງົບ, ມີຄະນະພັກກອງບັນຊາການ ປກສ ແຂວງ, ແຂກຖືກເຊີນຈາກກອງບັນຊາການທະຫານແຂວງ, ໂຮງຮຽນ ກໍ່ສ້າງນາຍສີບ ທະຫານທ້ອງຖີ່ນ, ບັນດາຫ້ອງອ້ອມຂ້າງ, ຄະນະອໍາ ນວຍການໂຮງຮຽນ, ຄູ - ອາຈານ, ພ້ອມດ້ວຍນັກຮຽນເຂົ້າຮ່ວມ.

 ໃນພິທີ ພັທ ວຽງດາວອນ ຈັນທະມາລີ ຜູ້ອໍານວຍການໂຮງຮຽນ ປກສ ຊັ້ນຕົ້ນເລກ 2 ໄດ້ຂຶ້ນຜ່ານແຜນໂຄງການຫຼັກສູດກໍ່ສ້າງວິຊາສະເພາະຊັ້ນຕົ້ນຂອງກໍາລັງປ້ອງກັນຄວາມສະຫງົບ ຊຶ່ງໃນຊຸດຮຽນ ຮຸ່ນທີ XIV ນີ້ມີນັກຮຽນຈໍານວນ 199 ສະຫາຍ, ຍິງ 42 ສະຫາຍ ທີ່ມາຈາກ 6 ພາກສ່ວນຄື: ກົມໃຫຍ່ການເມືອງປ້ອງກັນຄວາມສະຫງົບ, ກົມໃຫຍ່ 502, ກົມ 504, ກອງບັນຊາການປ້ອງກັນສູນກາງ, ນັກຮຽນທີ່ຈົບໂຮງຮຽນວັດທະນະທໍາຫຼັກ 67, ກໍາລັງໃໝ່ຈາກ ປກສ ແຂວງໄຊຍະບູລີ,ແຂວງ ຫຼວງນໍ້າທາ, ແຂວງບໍ່ແກ້ວ ແລະ ແຂວງຫຼວງພະບາງ ສໍາລັບໂຄງການຫຼັກສູດການຮຽນກໍານົດ 12ເດືອນ ໂດຍແບ່ງວິຊາແຕ່ລະໝວດໃນຫຼັກສູດໃນນີ້ໜວດວິຊາເບື້ອງຕົ້ນຂອງກໍາລັງ ປກສ ມີ 2 ວິຊາ,ໜວດວິຊາຄວາມຮູ້ທົ່ວໄປມີ 4 ວິຊາ,ໜວດວິຊາພື້ນຖານວິຊາສະເພາະມີ 8 ວິຊາ ແລະໜວດວິຊາສະເພາະປ້ອງກັນຄວາມສະຫງົບ ມີ 15 ວິຊາ.

 ໂອກາດນີ້,ພັອ ຄໍາແພງເພັດຫົວໜ້າກອງບັນຊາການ ປກສ ແຂວງໄຊຍະບູລີ ໄດ້ມີຄໍາເຫັນຊີ້ນໍາ ແລະຮຽກຮ້ອງຄະນະອໍານວຍການ ໂຮງຮຽນ,ຄູ-ອາຈານ ແລະນັກຮຽນຈົ່ງຍົກສູງຄວາມຮັບຜິດຊອບ,ສຸມທຸກສະຕິປັນຍາຂອງຕົນເຂົ້າໃນການສິດສອນ, ຄົ້ນຄວ້າຮໍ່າຮຽນ; ຮັບປະກັນໃຫ້ການຮຽນ-ການສອນດໍາເນີນໄປຢ່າງຖືກຕ້ອງຕາມໂຄງການຫຼັກສູດທີ່ໄດ້ກໍານົດໄວ້ ແລະ ມີປະສິດທິຜົນສູງ.

--------

ໜັງສືພິມເສດຖະກິດ-ສັງຄົມ

แชร์