ຄອບຄົວມີລາຍໄດ້ທີ່ໝັ້ນຄົງຍ້ອນການບໍລິການຕົ້ມເຫຼົ້າຂາຍສະໜອງຕະຫຼາດ

  ເມືອງຄົງເຊໂດນ ແຂວງສາລະວັນ ເປັນເມືອງໜຶ່ງທີ່ປະຊາຊົນມີມູນເຊື້ອ, ມີພູມປັນຍາໃນການຕົ້ມເຫຼົ້າຂາຍ ແລະຜະລິດຈົນກາຍເປັນສິນຄ້າຈຳນວນຫຼາຍຊຶ່ງຊາວ ເມືອງຄົງເຊໂດນໄດ້ເຮັດສືບທອດກັນມາເປັນເວລາດົນນານ ແລະເປັນທ່າແຮງທີ່ສຳຄັນໃນການພັດທະນາຊີວິດການເປັນຢູ່ຂອງປະຊາຊົນກໍ່ຄືຜູ້ປະກອບການຊາວຄ້າຂາຍໃນທົ່ວເມືອງນອກຈາກນີ້, ເຫຼົ້າຂາວເມືອງຄົງກໍ່ເປັນທີ່ນິຍົມຊົມຊອບຂອງຜູ້ບໍລິໂພກເຮັດໃຫ້ການຜະລິດ, ການບໍລິການຄ້າຂາຍຫຼາຍຂຶ້ນ ແລະເປັນຂະບວນຟົດຟື້ນ.


  ເໝືອນດັ່ງຄອບຄົວຂອງແມ່ໜາດ-ພໍ່ດົງ ທີ່ອາໄສຢູ່ບ້ານນາໂພ ເມືອງຄົງເຊໂດນ ແຂວງສາລະວັນ ທີ່ໄດ້ຢືດຖືອາຊີບການຕົ້ມເຫຼົ້າຂາຍເປັນທ່າແຮງຫຼັກຂອງຄອບຄົວ ແລະຜະລິດເປັນສິນຄ້າສົ່ງອອກ ຂາຍຕາມທ້ອງຕະຫຼາດ. ແມ່ໜາດໄດ້ເວົ້າວ່າ: ໃນເມື່ອກ່ອນແມ່ນໄດ້ເຮັດນາເປັນອາຊີບຫຼັກ ແລະຄ້າຂາຍ, ລ້ຽງສັດເປັນອາຊີບສຳຮອງ ມາໃນໄລຍະໜຶ່ງໄດ້ທ້ອນໂຮມເງິນຈຳນວນໜຶ່ງຊື້ໂຮງສີເຂົ້າຂະໜາດກາງເພື່ອບໍລິການສີເຂົ້າ, ເມື່ອດຳເນີນກິດຈະການດັ່ງກ່າວນີ້ມາໄລຍະໜຶ່ງເຫັນວ່າ: ມີເຂົ້າຈຳນວນ ຫຼາຍທີ່ສີແລ້ວບໍ່ງາມຈຶ່ງໄດ້ຄິດຫວນຄືນມູນເຊື້ອທີ່ພໍ່ແມ່ເຄີຍພາເຮັດມານັ້ນກໍ່ຄືການເຮັດແປ້ງ ແລະຕົ້ມເຫຼົ້າໂດຍໄດ້ຫັນມາທົດລອງຕົ້ມເຫຼົ້າແບບພື້ນບ້ານເພື່ອຂາຍຕາມບ້ານ ແລະເພື່ອສະໜອງໃຫ້ ລູກຄ້າຈຳນວນໜຶ່ງ, ໂດຍການໃຊ້ ສູດເຮັດແປ້ງຄໍາທອງທີ່ໂດ່ງດັງ ໃນເມື່ອກ່ອນ. ຕໍ່ມາເມື່ອເຫັນວ່າ ເຫຼົ້າທີ່ຕົ້ມໄດ້ຮັບຄວາມນິຍົມຊົມຊອບຈາກຜູ້ບໍລິໂພກ ແລະຕະຫຼາດຫຼາຍຂຶ້ນຈຶ່ງໄດ້ຕັດສິນໃຈຫັນມາລົງທຶນຜະລິດເຫຼົ້າຂາຍ ແລະຜະລິດຫຼາຍຂຶ້ນກວ່າເກົ່າ ໃນປີ 2015 ໄດ້ເລີ່ມເຮັດນ້ອຍໆຈົນມາເຖີງປະຈຸ ບັນໂດຍໄດ້ເຮັດແບບຫົວໜ່ວຍທຸລະກິດຄອບຄົວເພື່ອຈຳໜ່າຍໃຫ້ແມ່ຄ້າຊາວຂາຍຢູ່ໃນເທສະບານເມືອງຄົງເຊໂດນ ແລະ ບ້ານນາປົ່ງສາມາດສ້າງລາຍຮັບໃຫ້ຄອບຄົວສະ ເລ່ຍໄດ້ 5 ລ້ານກີບຕໍ່ເດືອນ. ສຳລັບການຕົ້ມເຫຼົ້າແມ່ນໄດ້ປະຕິບັດຕາມຂັ້ນຕອນຢ່າງຖືກວິທີໂດຍນຳເອົາເຂົ້າທີ່ສີແລ້ວມາເຮັດແປ້ງ, ແລ້ວກໍ່ນໍາເອົາແປ້ງໄປອົບໄວ້ປະມານ 4-5 ຄືນຫຼັງຈາກນັ້ນຈຶ່ງນຳແປ້ງມາຕົ້ມ ແລະເຮັດດ້ວຍຄວາມສະອາດມີການກັ່ນຕອງຢ່າງຖືກວິທີ ແລະວັດແທກຄວາມຄວາມເຂັ້ມຂຸ້ນຂອງເຫຼົ້າ.


   ປະຈຸບັນເດືອນໜຶ່ງສາມາດຜະລິດເຫຼົ້າໄດ້ 4 ໂຕນ ແລະ ມື້ໜຶ່ງຜະລິດໄດ້ 10-20 ແກັດຂາຍໃນລາຄາແກັດລະ 1 ແສນກີບ, ສ່ວນແຮງງານແມ່ນໃຊ້ແຮງງານໃນ ຄອບຄົວເປັນຫຼັກ ແລະໄດ້ຈ້າງ ກຳມະກອນຈຳນວນໜຶ່ງ, ກິິດຈະ ກຳຕົ້ມເຫຼົ້ານີ້ ແມ່ນໄດ້ຮັບອະນຸຍາດ ດຳເນີນທຸລະກິດທີ່ຖືກຕ້ອງຕາມລະ ບຽບກົດໝາຍ, ມີລິຂະສິດທີ່ອອກຊື່ ເຫຼົ້າຂາວໂບທິດາ ເມືອງຄົງເຊ ໂດນ, ນອກຈາກນັ້ນ, ໃນໄລຍະທີ່ ພະຍາດໂຄວິດ-19 ແຜ່ລະບາດ ຢ່າງກວ້າງຂວາງໃນຫຼາຍໆປະ ເທດທົ່ວໂລກ, ຄອບຄົວແມ່ໜາດ ຍັງໄດ້ທົດທອງຜະລິດເຫຼົ້າ 75% ເພື່ອຈຳໜ່າຍພາຍໃນເມືອງ, ຕ່າງເມືອງ ແລະຕ່າງແຂວງ ເພື່ອນຳ ໄປໃຊ້ຂ້າເຊື້ອພະຍາດໂຄວິດ-19 ແລະພະຍາດອື່ນໆໄດ້, ຊຶ່ງເຫຼົ້າ 75% ນີ້ແມ່ນໄດ້ກັ່ນຕອງຢ່າງລະອຽດ ແລະຜ່ານການກວດອຸນຫະພູມຢ່າງຖືກຕ້ອງ ແລະສາມາດຕອບສະໜອງຜູ້ຊົມໃຊ້ໄດ້ເປັນຢ່າງດີ.

  ແມ່ໜາດ ຍັງໄດ້ກ່າວຕື່ມອີກວ່າ: ການຜະລິດເຫຼົ້າຂາຍໄດ້ເຮັດໃຫ້ເສດຖະກິດຄອບຄົວດີຂຶ້ນ, ມີລາຍໄດ້ ແລະມີວຽກເຮັດງານທຳທີ່ໝັ້ນຄົງໂດຍອາໄສຄວາມຮູ້ຈາກມູນເຊື້ອ ແລະຄວາມດຸໝັ່ນ ຈົນກາຍ ເປັນລາຍຮັບຕົ້ນຕໍຂອງຄອບຄົວ ສະເລ່ຍໃນການຈຳໜ່າຍເຫຼົ້າຂາຍໄດ້ປະມານ 5 ລ້ານ ກີບຕໍ່ເດືອນ, ນອກຈາກການຕົ້ມເຫຼົ້າແລ້ວຍັງ ໄດ້ລ້ຽງງົວ, ໝູ, ປາ, ເປັນ, ໄກ່ຈຳນວນໜຶ່ງ, ປູກຫຍ້າແນວພັນນຳອີກ, ໃນຕໍ່ໜ້າຖ້າຫາກຜູ້ບໍລິໂພກຍັງມີຄວາມນິຍົມເຫຼົ້າຂາວໂພທິດາທາງຄອບຄົວແມ່ນມີແຜນສືບຕໍ່ຜະລິດຫຼາຍຂື້ນຕື່ມເພື່ອຕອບສະໜອງໃຫ້ພຽງພໍກັບຜູ້ບໍລິໂພກໂດຍເນັ້ນຄຸນນະພາບໃຫ້ໃດ້ມາດຕະຖານ.

_____________

ໂດຍ: ວິໄລວອນ ສິດທິໄຊ  

แชร์