ເຕັກນິກການປູກໝາກງາໃຫ້ໄດ້ຄຸນນະພາບດີ

   ໝາກງາເປັນພືດເສດຖະກິດທີ່ມີຄວາມສໍາຄັນຫຼາຍເນື່ອງຈາກມີຄຸນຄ່າທາງສານອາຫານສູງເຊັ່ນ: ໃຫ້ໂປຣຕີນ, ໄຂມັນ, ທັງສາມາດເກັບໄວ້ກິນຍາວນານ, ສະກັດ ເຮັດນໍ້າມັນງາ, ເຮັດເຂົ້າໜົມ... ດ້ວຍເຫດນີ້ຈຶ່ງເຮັດໃຫ້ໝາກງາເປັນທີ່ຕ້ອງການຂອງຕະຫຼາດພາຍໃນ ແລະຕ່າງປະເທດ, ທັງເປັນພືດທີ່ປູກງ່າຍ, ການດູແລຮັກສາໜ້ອຍກວ່າພືດຊະນິດອື່ນ.
  ອີງຕາມຂໍ້ມູນຈາກປຶ້ມເນື້ອໃນຄູ່ມືຝຶກອົບຮົມການຜະລິດກະສິກໍາຂອງສະຖານການສຶກສາໃຫ້ຮູ້ວ່າ: ການປູກໝາກງາມີ 2 ວິທີຄື: ການປູກແບບຫວ່ານ ແລະ ການ ປູກແບບໂຮຍເປັນແຖວ. ຊຶ່ງກ່ອນຈະປູກທັງ 2 ວິທີກ່ອນອື່ນຕ້ອງມີການກະກຽມດິນໃຫ້ເປັນດິນຜຸຜຸ່ຍມີການລະບາຍນໍ້າດີ ແລະ ມີຄວາມອຸດົມສົມບູນທາງດ້ານອາຫານພໍສົມຄວນເປັນພື້ນທີ່ດອນ ຫຼືສູງສາມາດລະບາຍນໍ້າໄດ້, ຊຶ່ງອາດຈະຂຸດ ຫຼືໄຖພວນດິນ (ຖ້າເປັນດິນຜຸຜຸ່ຍຈະໄຖ 1-2 ຄັ້ງ, ແຕ່ຖ້າເປັນດິນໜຽວຕ້ອງໄຖ 2-3 ຄັ້ງ), ເຮັດເປັນໜານໃຫຍ່ຂະໜາດ 3-5 ແມັດ ແລະໃຫ້ມີຮອງລະຫວ່າງໜານເພື່ອສະດວກໃນການດູແລເມື່ອເກີດພະຍາດ ຫຼືແມງໄມ້ລະບາດ.
ສໍາລັບການປູກແບບຫວ່ານແມ່ນຫວ່ານແກ່ນໃຫ້ກະແຈກກະຈາຍ ແລະສະໝໍ່າສະເໝີແລ້ວຄາດດິນປົກເທິງໜ້າດິນ, ຫວ່ານແກ່ນງາປະລິມານ 1-2 ກິໂລຕໍ່ໄລ່;ສ່ວນການປູກແບບໂຮຍເປັນແຖວແມ່ນຈະມີໄລຍະຫ່າງຂອງແຖວປູກ 50x10 ຊັງຕີແມັດ.
  ດ້ານການບົວລະບັດຮັກສາ: ງາເປັນພືດທີ່ຕ້ອງການການດູແລຮັກສາໜ້ອຍກວ່າພືດຊະນິດອື່ນພຽງແຕ່ກຽມດິນໃຫ້ຖືກວິທີ ແລະ ເໝາະສົມກໍ່ງອກງາມສະໝໍ່າສະ ເໝີ; ສ່ວນວິທີປ້ອງກັນສັດຕູພືດແມ່ນໃຫ້ນໍາເອົາໃບສີໃຄເຄື່ອງ, ຫຍ້າໜອນນ່າຍ, ເຄືອເຂົາຮໍ... ມາຟັກໃຫ້ມຸ່ນແລ້ວເອົາແຊ່ໃສ່ນໍ້າປະໄວ້ປະມານ 15-30 ມື້ກໍ່ສາມາດນໍາເອົານໍ້າດັ່ງກ່າວມາສີດໃສ່ຕົ້ນງາເພື່ອປ້ອງກັນສັດຕູພືດໄດ້; ການເກັບກ່ຽວ: ໃຫ້ສັງເກດໄລຍະສຸກຂອງໝາກງາ,ເມື່ອງາເຖິງອາຍຸເກັບກ່ຽວໃບຈະມີສີເຫຼືອງ ແລະ ລົ່ນເກືອບໝົດ, ຝັກຂອງໝາກງາຈະປ່ຽນສີຈາກສີຂຽວມາເປັນສີເຫຼືອງ, ເມັດເປັນສີນໍ້າຕານ (ສໍາລັບງາດໍາໃຫ້ແກະຝັກທີ 3 ຈາກຍອດອອກມາເບິ່ງຖ້າເມັດເປັນສີນໍ້າຕານສະແດງວ່າແກ່ສາມາດເກັບກ່ຽວໄດ້, ຊຶ່ງການເກັບກ່ຽວໃຫ້ເອົາມີດຕັດກ້ອງຝັກ ຫຼືຫຼົກເອົາທັງຕົ້ນກໍໄດ້ແຕ່ພະຍາຍາມບໍ່ໃຫ້ດິນຕິດເມັດງາ.

_______________

ໜັງສືພິມເສດຖະກິດ-ສັງຄົມ

แชร์