ກະສິກຳສາລະວັນລົງຊຸກຍູ້ການຜະລິດລະດູຝົນ

  ເພື່ອເປັນການຄໍ້າປະກັນເຮັດໃຫ້ສະບຽງອາຫານພຽງພໍກັບຄວາມຕ້ອງການ ແລະມີຄັງແຮເກັບໄວ້ໃນເວລາສຸກເສີນ ແລະຈຳເປັນ, ດັ່ງນັ້ນມາໃນວັນທີ 9-11 ມິຖຸນາ 2020 ນີ້, ຂະແໜງຊົນລະປະທານ, ຂະແໜງປູກຝັງ ແລະຂະແໜງຄຸ້ມຄອງ ແລະພັດທະນາທີ່ດິນກະສີກຳພະແນກກະສິກຳ ແລະປ່າໄມ້ແຂວງສາລະວັນໄດ້ສົມທົບກັບຫ້ອງການກະສິກຳ ແລະປ່າໄມ້ເມືອງລົງຊຸກຍູ້ຂະບວນການຜະລິດຂອງພໍ່ແມ່ປະຊາຊົນໃນລະດູຝົນ, ຢູ່ 4 ເມືອງຄື: ເມືອງສາລະວັນ, ວາປີ, ຄົງເຊໂດນ ແລະເມືອງລະຄອນເພັງມີທັງໝົດ 6 ຈຸດ, ມີ 20 ບ້ານເຂົ້າຮ່ວມ.

  ຕາມແຜນການຜະລິດເຂົ້າໃນລະດູຝົນເປົ້າໝາຍມີ 84 ພັນເຮັກຕາ, ຄາດຄະເນຜົນຜະລິດໃຫ້ໄດ້ 3,9 ແສນໂຕນ, ສະມັດຕະພາບສະເລ່ຍ 4,7 ໂຕນຕໍ່ເຮັກຕາ, ລວມມີເຂດຈຸດສຸມຍົກສະມັດຕະພາບ 100 ເຮັກຕາ, ຜົນຜະລິດໃຫ້ໄດ້ 6 ໂຕນຕໍ່ເຮັກຕາ, ມີ 41 ບ້ານ, 772 ຄອບຄົວ,ໃນນັ້ນເນື້ອທີ່ເຂົ້າ GAP,ມີ 180 ເຮັກຕາ, ມີ 12 ບ້ານ 154 ຄອບຄົວນອນໃນ 4 ເມືອງທົ່ງພຽງຄື: ເມືອງສາລະວັນ, ວາປີ,

 ຄົງເຊໂດນ, ເມືອງລະຄອນເພັງ ແລະມີຕົວແບບການຜະລິດເຂົ້າ 8 ເຮັກຕາ  8 ຄົວຄອບ ໂດຍແບ່ງເຂດການຜະລິດຍົກສະມັດຕະພາບຄື: ເຂດຜະລິດເຂົ້າທີ່ສະມັດຕະ ພາບສະເລ່ຍ 4,5-5,5 ໂຕນ, ມີ 25,2 ພັນເຮັກຕາ, ເຂດຜະລິດເຂົ້າສະມັດຕະພາບສະເລ່ຍ 3,6-4,4 ໂຕນ ຕໍ່ເຮັກຕາ ມີ 57,8 ພັນເຮັກຕາ ແລະປູກພືດຕາມແຜນການ 61,2 ພັນເຮັກຕາ, ຄາດຄະເນຜົນຜະລິດ 8,46 ແສນໂຕນ, ພືດເປັນສິນຄ້າ 54,5 ພັນເຮັກຕາ, ຄາດຄະເນຜົນຜະລິດ 7,99 ແສນໂຕນ, ພືດຜັກສະ ບຽງ 6,7 ພັນເຮັກຕາ, ຄາດຄະເນຜົນຜະລິດ 46,8 ພັນໂຕນ. ມາຮອດປະຈຸບັນນີ້ການສະໜອງແນວພັນເຂົ້າໃຫ້ແກ່ຊາວກະສີກອນໃນເຂດຈຸດສຸມປະຕິບັດໄດ້ແລ້ວຈຳນວນ 20 ໂຕນ,ການປູກພືດປະຕິບັດໄດ້ 27.857 ເຮັກຕາ ເທົ່າກັບ 70%, ມັນຕົ້ນປະຕິບັດໄດ້ 24,4 ພັນເຮັກຕາ ເທົ່າກັບ 89%, ພືດເປັນສິນຄ້າປະຕິບັດໄດ້ 25,3 ພັນເຮັກຕາ ເທົ່າກັບ 77%

  ການລົງຊຸກຍູ້ຄັ້ງນີ້ກໍ່ແມ່ນປະຕິບັດຕາມຄຳສັ່ງແນະນຳຂອງລັດຖະມົນຕີກະຊວງກະສີກຳ ແລະປ່າໄມ້ເລກທີ 0587/ ກປລົງວັນທີ 25 ພຶດສະພາ 2020 ກ່ຽວກັບການເພີ່ມທະວີຄວາມຮັບຜິດ ຊອບຕໍ່ການຜະລິດລະດູຝົນ ແລະຄໍາສັ່ງ ແນະນຳເລກທີິ0434/ກປ ລົງວັນທີ 30 ເມສາ 2020 ແລະຄຳສັ່ງແນະນຳ ເລກທີ 0994/ກປຂ.ສວ ລົງວັນທີ 2 ມິຖຸນາ 2020, ໃນນັ້ນແຕ່ລະຂະແໜງການກໍ່ໄດ້ອະທິບາຍ, ແນະນໍາວິ ທີການບົວລະບັດຮັກສາ, ການໃສ່ຝຸ່ນໃນ ດິນແຕ່ລະປະເພດ, ການປັກດຳ ແລະການປາບສັດຕູພືດຕ່າງໆ,ພ້ອມທັງແຮແນວພັນເຂົ້າໄວ້ໃນເວລາສຸກເສີນຈຳເປັນບໍ່ໃຫ້ຕົກເມີດ,ແນວພັນທີ່ໃຊ້ໄດ້ແນະນຳໃຫ້ໃຊ້ແນວພັນເຂົ້າກາງ ແລະເຂົ້າດອກ, ບໍ່ໃຫ້ໃຊ້ແນວພັນເຂົ້າງັນເພາະຢ້ານມີບັນຫາຕໍ່ກັບການຜະລິດຂອງຕົນ ແລະ ໃຫ້ແຕ່ລະເມືອງ, ແຕ່ລະບ້ານມີການແຕ່ງຕັ້ງຄະນະສະເພາະກິດໃນແຕ່ລະຂັ້ນເພື່ອກຽມຮັບມືໃນການຕ້ານແລ້ງ-ຕ້ານຖ້ວມ, ຈາກນັ້ນພໍ່ແມ່ປະຊາຊົນກໍ່ໄດ້ມີຄໍາຄິດເຫັນສະເໜີຕໍ່ທີມງານທີ່ລົງໄປ, ໂດຍສ່ວນໃຫຍ່ຊາວກະສິກອນໃນແຕ່ລະເຂດສະເໜີເລື່ອງຊົນ ລະປະທານ, ນໍ້າ, ແນວພັນເຂົ້າ, ວິທີປາບ ແລະກຳຈັດສັດຕູພືດ.

____________

ຂ່າວ: ສິດຕາ ເພັດ

 

แชร์