ກຽມສະເໜີທົ່ງນາເງືອກຂື້ນເປັນມໍລະດົກວັດທະນະທຳລະດັບຊາດ

  ເພື່ອເປັນການອະນຸລັກປົກປັກຮັກສາແຫຼ່ງມໍລະດົກວັດທະນະທໍາຂອງທ້ອງຖິ່ນກໍຄືຂອງເມືອງວິລະບູລີບໍ່ໃຫ້ຖືກທໍາລາຍ ຫຼືສູນຫາຍໄປຕາມການເວລາໃນວັນທີ 15 ມິຖຸ ນານີ້, ທີ່ຫ້ອງວ່າການປົກຄອງເມືອງວິລະບູລີ ໄດ້ຈັດກອງປະຊຸມຜ່ານເນື້ອໃນປຶ້ມປະຫວັດສາດທົ່ງນາເງືອກເພື່ອເປັນເອກະສານອ້າງອີງກະກຽມສະເໜີຂຶ້ນເປັນມໍລະດົກທາງດ້ານວັດທະນະທໍາລະດັບຊາດໂດຍການເຂົ້າຮ່ວມເປັນປະທານຂອງ ທ່ານ ຄໍາເຜີຍ ຜັນທະຈອນ ປະທານສະພາປະຊາຊົນ ແຂວງສະຫວັນນະເຂດ, ມີບັນດາທ່ານ ການນໍາຂອງແຂວງ, ພະແນກການທີ່ກ່ຽວຂ້ອງ, ບັນດາການນໍາຂອງເມືອງ ແລະຫ້ອງການທີ່ກ່ຽວຂ້ອງຂອງເມືອງຕະຫຼອດເຖິງເຖົ້າແກ່ແນວໂຮມບ້ານອ້ອມຂ້າງໃນເຂດທົ່ງນາເງືອກເຂົ້າຮ່ວມ.

  ຈຸດປະສົງຂອງການຈັດກອງປະຊຸມໃນຄັ້ງນີ້ກໍ່ແມ່ນເພື່ອລະດົມເອົາແນວຄວາມຄິດຂອງຫຼາຍພາກສ່ວນເປັນຂໍ້ມູນໃຫ້ແກ່ການຂຽນປຶ້ມປະຫວັດສາດທົ່ງນາເງືອກເພື່ອພິມຈໍາໜ່າຍອອກສູ່ສັງຄົມ ແລະເພື່ອເປັນເອກະສານອ້າງອີງປະກອບເຂົ້າໃນການນໍາສະເໜີທົ່ງນາເງືອກຂຶ້ນເປັນມໍລະດົກທາງດ້ານວັດທະນະທໍາລະດັບຊາດໃນຕໍ່ໜ້າ, ສໍາລັບທົ່ງນາເງືອກແມ່ນເປັນແຫຼ່ງມໍລະດົກສະຖານທີ່ມີຄວາມໝາຍສໍາຄັນທາງດ້ານມໍລະດົກວັດທະນະທໍາຂອງທ້ອງຖິ່ນຊຶ່ງມີຄວາມກ່ຽວພັນກັບບັນດາເລື່ອງເລົ່າຂານຕໍານານຂອງແຫຼ່ງທ່ອງທ່ຽວຕ່າງໆ ພາຍໃນເມືອງວິລະບູລີ ມາແຕ່ສະໄໝບູຮານນະການ, ທົ່ງນາເງືອກແຫ່ງນີ້ແມ່ນມີປະຫວັດຄວາມເປັນມາຫຼາຍກວ່າ 3 ພັນປີມາ ແລ້ວ, ຊຶ່ງຕັ້ງຢູ່ຫ່າງຈາກບ້ານເມືອງຫຼວງໄປທາງທິດໃຕ້ປະມານ 1 ກິໂລແມັດ ແລະຢູ່ໃນເຂດສໍາປະທານຂອງໂຄງການຂຸດຄົ້ນຄໍາ-ທອງຂອງບໍລິສັດລ້ານຊ້າງມີເນໂຣນສ໌ລິມິເຕັດມີເນື້ອທີ່ທັງໝົດລວມທັງເຂດກັນຊົນແມ່ນ 11,02 ເຮັກຕາ, ມີເນື້ອທີ່ສະເພາະແມ່ນ 3,66 ເຮັກຕາ, ມີລັກສະນະພິເສດແມ່ນເປັນທົ່ງຫຍ້າແກມສະໜົມເປັນສ່ວນໃຫຍ່, ເນັ່ງເປັນແລວຍາວຢຽດໄປຕາມທິດຕາເວັນອອກຫາທິດຕາເວັນຕົກຍາວປະມານ 500 ແມັດ, ກວ້າງປະມານ 30 ແມັດ.

  ທ່ານ ຄໍາເຜີຍ ຜັນທະຈອນ ໄດ້ກ່າວໃຫ້ຮູ້ວ່າ: ການຂຽນປຶ້ມປະຫວັດສາດທົ່ງນາເງືອກໃນຄັ້ງນີ້ກໍ່ແມ່ນໄດ້ຮິບໂຮມເອົາບັນດາຂໍ້ມູນເລື່ອງເລົ່າຂານຕ່າງໆ ທີ່ກ່ຽວຂ້ອງກັບທົ່ງນາເງືອກປະກອບກັບການຄົ້ນຄວ້າທາງດ້ານວິທະຍາສາດໃນສະໄໝໃໝ່ມາປະກອບໃສ່ກັນເພື່ອເປັນຂໍ້ມູນໄວ້ໃຫ້ຄົນຮຸ່ນຫຼັງໄດ້ຄົ້ນຄວ້າສຶກສາຮໍ່າຮຽນຕໍ່ໄປ, ພ້ອມນັ້ນກໍ່ຍັງເປັນການຄົ້ນຄວ້າເກັບກໍາຂໍ້ມູນເພື່ອນໍາສະເໜີທົ່ງນາເງືອກຂຶ້ນເປັນມໍລະດົກທາງດ້ານວັດທະນະທໍາລະດັບຊາດ ແລະ ໃນໄລຍະນີ້, ກໍ່ຈະໄດ້ສະເໜີຫາພາກສ່ວນທີ່ ກ່ຽວຂ້ອງເພື່ອພ້ອມກັນອະນຸລັກປົກປັກຮັກສາແຫຼ່ງມໍລະດົກວັດທະນະທໍາດັ່ງກ່າວນີ້ໄວ້ເປັນແຫຼ່ງທ່ອງທ່ຽວທີ່ສໍາຄັນຂອງທ້ອງຖິ່ນກໍ່ຄືຂອງເມືອງວິລະບູລີ ແລະບໍ່ໃຫ້ຖືກທໍາລາຍຫຼືສູນຫາຍໄປຕາມການເວລາ, ໂອກາດດຽວກັນນີ້, ບັນດາແຂກທີ່ເຂົ້າຮ່ວມປະຊຸມກໍ່ຍັງໄດ້ພ້ອມກັນໄປເບິ່ງສະຖານທີ່ຕົວຈິງຂອງທົ່ງນາເງືອກເພື່ອເປັນການເກັບກໍາຂໍ້ມູນຕົວຈິງປະກອບໃສ່ການຂຽນປຶ້້ມປະຫວັດສາດທົ່ງນາເງືອກຕື່ມອີກເພື່ອເຮັດໃຫ້ປຶ້ມດັ່ງກ່າວມີເນື້ອໃນທີ່ຄົບຖ້ວນ ແລະສົມບູນຂຶ້ນກວ່າເກົ່າ.

แชร์