ເຜີຍແຜ່ກົດໝາຍວ່າດ້ວຍການປະກັນໄພສະບັບປັບປຸງ

 ກອງປະຊຸມເຜີຍແຜ່ວຽກງານການຈັດຕັ້ງປະຕິບັດກົນໄກປະກັນໄພເພື່ອຫຼຸດຜ່ອນຄວາມສ່ຽງໄພພິບັດທໍາມະຊາດໃນພາກພື້ນອາຊີຕາເວັນອອກສ່ຽງໃຕ້ (SEADRIF) ແລະເຜີຍແຜ່ກົດໝາຍວ່າດ້ວຍການປະກັນໄພສະບັບປັບປຸງໄດ້ໄຂຂຶ້ນໃນວັນທີ 16 ມິຖຸນາ 2020 ທີ່ນະຄອນຫຼວງວຽງຈັນ ໂດຍເປັນປະທານຂອງທ່ານ ສອນເພັດ ອິນທະວົງ ຮັກສາການຫົວໜ້າກົມຄຸ້ມຄອງວິສາຫະກິດລັດລົງທຶນ ແລະ ປະກັນໄພກະຊວງການເງິນ, ມີຫົວໜ້າກົມ, ຮອງກົມ, ຜູ້ຕາງໜ້າຈາກບັນດາກະຊວງ ແລະ ອົງ ການທຽບເທົ່າອ້ອມຂ້າງສູນກາງ, ບໍລິສັດປະກັນໄພ ແລະຜູ້ຕາງໜ້າຈາກທຸລະກິດເຂົ້າຮ່ວມ.

  ທ່ານ ສອນເພັດ ອິນທະວົງ ກ່າວວ່າ: ກົດໝາຍວ່າດ້ວຍການປະກັນໄພສະບັບປັບປຸງໄດ້ຖືກນໍາສະເໜີ ແລະຮັບຮອງຈາກກອງປະຊຸມສະໄໝສາມັນເທື່ອທີ 8 ຂອງສະ ພາແຫ່ງຊາດຊຸດທີ 8 ໃນວັນທີ 29 ພະຈິກ 2019 ດ້ວຍຄະແນນສຽງ 95,45% ຂອງຈໍານວນສະມາຊິກສະພາແຫ່ງຊາດທີ່ເຂົ້າຮ່ວມ, ຖືກປະກາດໃຊ້ຕາມລັດຖະດໍາລັດຂອງປະທານປະເທດສະບັບເລກທີ030/ປປທ ລົງວັນ ທີ 10 ມັງກອນ 2020 ແລະໄດ້ລົງໃນຈົດໝາຍເຫດທາງລັດຖະການໃນວັນທີ 30 ມີນາ 2020 ຊຶ່ງເຮັດໃຫ້ກົດໝາຍສະບັບປັບປຸງນີ້ມີຜົນສັກສິກນັບແຕ່ວັນທີ 13 ເມສາ 2020 ເປັນຕົ້ນມາ;ກົດໝາຍສະບັບປັບປຸງນີ້ປະກອບມີ 11 ພາກ, 12 ໝວດ, 100 ມາດຕາຊຶ່ງປັບປຸງມາຈາກ 14 ພາກ, 13 ໝວດ ແລະ 126 ມາດຕາຕາມກົດໝາຍສະບັບປີ 2011, ຊຶ່ງການປັບປຸງຄັ້ງນີ້ລັດຖະບານກໍຄືກະຊວງການເງິນຫວັງວ່າຈະຊ່ວຍໃຫ້ການຄຸ້ມຄອງ ແລະດໍາເນີນທຸລະກິດປະກັນໄພຢູ່ ສປປ ລາວມີປະສິດທິຜົນຂຶ້ນພ້ອມທັງຮັບປະກັນການປົກປ້ອງສິດຜົນປະໂຫຍດຂອງທຸກພາກສ່ວນກ່ຽວຂ້ອງໃນວຽກ ງານປະກັນໄພ ແລະຄາດວ່າຈະມີຜົນໄດ້ຮັບຄື: ນິຕິກໍາທີ່ເປັນບ່ອນອີງອັນໜັກແໜ້ນຂຶ້ນຕື່ມໃຫ້ແກ່ການຄຸ້ມຄອງ, ຕິດຕາມແລະການກວດກາວຽກງານປະກັນໄພ, ສ້າງຄວາມເຊື່ອໝັ້ນໃຫ້ແກ່ສັງຄົມກ່ຽວກັບວຽກງານປະກັນໄພ; ມີພາລະບົດບາດ, ສິດແລະໜ້າທີ່ຂອງອົງການຄຸ້ມຄອງວຽກງານປະກັນໄພທີ່ຈະແຈ້ງ, ຍົກບົດບາດຂອງກົດ ໝາຍວ່າດ້ວຍປະກັນໄພ, ຍົກລະດັບການດໍາເນີນທຸລະກິດປະກັນໄພຢູ່ ສປປ ລາວ ໃຫ້ສູງຂຶ້ນ; ການດໍາເນີນທຸລະກິດປະກັນໄພໄດ້ຮັບການປ້ອງກັນ, ມີຄວາມຍຸຕິທໍາ, ມີປະສິດທິຜົນ ແລະມີຄວາມຍືນຍົງກວ່າເກົ່າ.

  ນອກຈາກນັ້ນກອງປະຊຸມຍັງໄດ້ຮັບຟັງການເຜີຍແຜ່ວຽກງານການຈັດຕັ້ງປະຕິບັດກົນໄກປະກັນໄພເພື່ອຫຼຸດຜ່ອນຄວາມສ່ຽງໄພພິບັດທໍາມະຊາດໃນພາກພື້ນອາຊີຕາ ເວັນອອກສ່ຽງໃຕ້ (SEADRIF) ທີ່ກະຊວງການເງິນພວມຈັດຕັ້ງປະຕິບັດ, ຊຶ່ງລັດຖະບານເຫັນວ່າ SEADRIF ຈະເປັນເຄື່ອງມືດ້ານການເງິນທີ່ສໍາຄັນໃນການຄຸ້ມ ຄອງ ແລະຫຼຸດຜ່ອນຜົນກະທົບຈາກໄພພິບັດ ແລະຈະປະກອບສ່ວນຊ່ວຍຮັກສາຄວາມໝັ້ນຄົງທາງດ້ານການເງິນຂອງລັດຖະບານ ແລະຫຼຸດຜ່ອນຜົນກະທົບຂອງໄພພິ ບັດຕໍ່ເສດຖະກິດ-ສັງຄົມໃນຕໍ່ໜ້າ.

แชร์