ມອບ-ຮັບຄະນະຄຸ້ມຄອງດ່ານສາກົນປາກຊັນ

  ເມື່ອວັນທີ 9 ມິຖຸນາ 2020 ຢູ່ທີ່ດ່ານສາກົນປາກຊັນ ແຂວງບໍລິຄໍາໄຊ ໄດ້ຈັດພິທີມອບ-ຮັບໜ້າ ທີ່ຫົວໜ້າຄະນະຄຸ້ມຄອງດ່ານສາກົນປາກຊັນ ແຂວງບໍລິຄໍາໄຊ, ໂດຍການເປັນປະທານຂອງທ່ານ ບຸນສົງ ເພັດຈະເລີນ ວ່າການຫົວໜ້າຄະນະຈັດຕັ້ງແຂວງບໍລິຄໍາໄຊ ທັງເປັນຫົວໜ້າຄະນະຄຸ້ມຄອງດ່ານສາກົນປາກຊັນຜູ້ເກົ່າ, ທ່ານ ພັນໂທ ກົງຈັນ ໄຊປັນຍາ ຫົວໜ້າກອງບັນຊາການ ປກສ ແຂວງບໍລິຄໍາໄຊ,  ມີບັນດາພະແນກການທີ່ກ່ຽວຂ້ອງ, ຕະຫຼອດຮອດພະນັກງານ-ລັດຖະກອນທີ່ປະຈໍາຢູ່ດ່ານສາ ກົນປາກຊັນເຂົ້າຮ່ວມເປັນສັກຂີພິຍານ.

   ທ່ານ ພັນໂທ ນາງ ສີສົມພອນ ຈະເລີນລາດ ຫົວໜ້າດ່ານຕໍາຫຼວດກວດຄົນເຂົ້າ-ອອກເມືອງດ່ານສາກົນປາກຊັນໄດ້ຕາງໜ້າໃຫ້ຄະນະດ່ານຜ່ານບົດສະຫຼຸບຫຍໍ້ຜົນ ສໍາເລັດໃນການຊີ້ນໍາ-ນໍາພາ ຄະນະຄຸ້ມຂອງດ່ານຜູ້ເກົ່າ, ຊຶ່ງໄດ້ຍົກໃຫ້ເຫັນສະພາບຈຸດພິເສດ, ຂໍ້ສະດວກ ແລະຂໍ້ຫຍຸ້ງຍາກໃນການຈັດຕັ້ງປະຕິບັດຊີ້ນໍາ-ນໍາພາຢູ່ດ່ານ ສາກົນປາກຊັນໃນໄລຍະຜ່ານມາ ແລະ ທິດທາງແຜນການທີ່ຄະນະຊຸດໃໝ່ຕ້ອງໄດ້ສືບຕໍ່ເຮັດວຽກງານສຶກສາອົບຮົມການເມືອງ-ແນວຄິດໃຫ້ພະນັກງານຢູ່ພາຍໃນດ່ານຢ່າງເປັນປົກກະຕິເພື່ອໃຫ້ເຂົາເຈົ້າຍົກສູງຄວາມຮັບຜິດຊອບ ແລະ ມີສະຕິເຄົາລະລະບຽບກົດໝາຍ, ສຸມສະຕິເຫື່ອແຮງຂອງຕົນຕັ້ງໜ້າເຂົ້າໃນການປະຕິບັດໜ້າທີ່ວຽກ ງານໃຫ້ມີຄວາມຖືກຕ້ອງ ແລະ ສໍາເລັດຕາມລະດັບຄາດໝາຍທີ່ວາງໄວ້, ເປັນຕົ້ນແມ່ນວຽກງານການບໍລິການ, ການຕິດຕາມກວດກາວຽກງານວິຊາສະເພາະຕົວຈິງ, ການຄຸ້ມຄອງລາຍຮັບ-ລາຍຈ່າຍ, ການສະຫຼຸບລາຍງານໃຫ້ຂັ້ນເທິງຮັບຊາບຢ່າງເປັນປົກກະຕິ, ສຸມໃສ່ວຽກງານສືບຂ່າວຕິດຕາມບັນດາເປົ້າໝາຍຄ້າຂາຍເຖື່ອນທີ່ຜິດຕໍ່ ລະບຽບກົດໝາຍ,ເພີ່ມທະວີຄວາມສາມັກຄີພາຍໃນໃຫ້ໜັກແໜ້ນ,ພົວພັນປະສານສົມທັບກັບບັນດາຂະແໜງການທີ່ກ່ຽວຂ້ອງ ແລະອໍານາດການປົກຄອງທ້ອງຖິ່ນຢ່າງຕໍ່ເນື່ອງ, ສືບຕໍ່ພົວພັນຮ່ວມມືກັບຕ່າງປະເທດເປັນຕົ້ນແມ່ນແຂວງບືງການລາຊານາຈັກໄທເພື່ອແລກປ່ຽນຂໍ້ມູນຂ່າວສານ ແລະວຽກງານວິຊາສະເພາະຮ່ວມກັນ, ສືບຕໍ່ພັດທະນາພື້ນຖານໂຄງລ່າງດ່ານສາກົນປາກຊັນໃຫ້ຕອບສະໜອງໄດ້ກັບສະພາບການຂະຫຍາຍຕົວຂອງເສດຖະກິດໃນຍຸກໃໝ່ດ້ານການບໍລິການສິນຄ້າຜ່ານດ່ານໃຫ້ມີຄວາມແຂງແຮງ ແລະຖືກຕ້ອງສອດຄ່ອງກັບລະບຽບກົດໝາຍຢ່າງເຂັ້ມງວດ.

  ໂອກາດດຽວກັນກໍໄດ້ຜ່ານບົດບັນທຶກມອບ-ຮັບ ໜ້າທີ່ລະຫວ່າງຫົວໜ້າຄະນະຄຸ້ມຄອງດ່ານສາກົນປາກຊັນຜູ້ເກົ່າ ແລະຫົວໜ້າຄະນະຄຸ້ມຄອງດ່ານສາກົນປາກຊັນຜູ້ ໃໝ່, ຫຼັງຈາກນັ້ນສອງຝ່າຍກໍ່ໄດ້ລົງນາມເຊັນບົດບັນທຶກຮ່ວມກັນໂດຍການລົງນາມເຊັນບົດບັນທຶກລະຫວ່າງ ທ່ານ ບຸນສົງ ເພັດຈະເລີນ ຫົວໜ້າຄະນະຄຸ້ມຄອງດ່ານ ສາກົນປາກຊັນຜູ້ເກົ່າ ແລະທ່ານ ພັນໂທ ວົງວິໄລ ອິນທິສານ ຫົວໜ້າຄະນະຄຸ້ມຄອງດ່ານສາກົນປາກຊັນຜູ້ໃໝ່ຢ່າງເປັນທາງການ.

______________

ຂ່າວ: ພອນສະຫວັນ

แชร์