ການປູກຝັງ-ລ້ຽງສັດທ່າແຮງຫຼັກໃນການສ້າງລາຍຮັບໃຫ້ປະຊາຊົນເມືອງສົບເບົາ

  ເມືອງສົບເບົາ ແຂວງຫົວພັນ ມີທີ່ຕັ້ງຫ່າງຈາກເທສະບານແຂວງໄປທາງທິດຕາເວັນອອກສຽງເໜືອປະມານ 70 ກິໂລແມັດ, ທົ່ວເມືອງມີ 67 ບ້ານ, ມີ 4.552 ຄອບຄົວ, ມີພົນລະເມືອງ 25.853 ຄົນ, ຍິງ 12.632 ຄົນ, ທີ່ຕັ້ງຂອງເມືອງຕັ້ງຢູ່ລຽບຕາມສາຍນໍ້າມ່າ ແລະຫ້ວຍນໍ້າສາຍສຳຄັນຕ່າງໆ ຊຶ່ງອຸດົມສົມບູນເໝາະສົມແກ່ການຜະລິດກະສິກຳເຮັດໃຫ້ການນຳເມືອງຍົກສູງວຽກງານການຜະລິດກະສິກຳເປັນສິນຄ້າສ້າງລາຍຮັບໃຫ້ປະຊາຊົນເຮັດໃຫ້ມີຊີວິດການເປັນຢູ່ນັບມື້ດີຂຶ້ນ.

  ທ່ານ ໄຊຍະແສງ ຊົງຢົງຢາ ເຈົ້າເມືອງໆສົບເບົາໃຫ້ຮູ້ວ່າ: ເມືອງສົບເບົາເປັນໜຶ່ງໃນເມືອງທີ່ຍັງທຸກຍາກ, ໂດຍລວມແລ້ວເມືອງສົບເບົາມີ 3 ທ່າແຮງພົ້ນເດັ່ນຄື: ປູກ ຝັງ-ລ້ຽງສັດ, ການບໍລິການທາງຜ່ານ-ການທ່ອງທ່ຽວ ແລະຫັດຖະກຳ, ຊຶ່ງການປູກຝັງ-ລ້ຽງສັດ ເປັນທ່າແຮງຫຼັກ, ໃນໄລຍະຜ່ານມາປະຊາຊົນມີຄວາມຕື່ນຕົວສູງ ເຂົ້າໃນການຜະລິດກະສິກຳເປັນ ສິນຄ້າໂດຍສະເພາະແມ່ນການປູກເຂົ້າສອງລະດູ, ປູກໝາກໂມ, ໝາກແຕງ, ສາລີ, ກ້ວຍ ແລະພືດຜັກອື່ນ, ນອກນັ້ນຍັງມີຫຼາຍຫົວ ໜ່ວຍບໍລິການລົງທຶນເຂົ້າໃສ່ການປູກພືດໃຫ້ໝາກໂດຍສະເພາະແມ່ນປູກໝາກມ່ວງ, ໝາກລຳໄຍເພື່ອສົ່ງອອກ,ໄລຍະຜ່ານມາເມືອງສົບເບົາໄດ້ຈັດແບ່ງເປັນເຂດໃນການ ຊຸກຍູ້ໂດຍມອບໝາຍໃຫ້ພາກສ່ວນທີ່ກ່ຽວຂ້ອງຂອງເມືອງລົງສົມທົບກັບອຳນາດການປົກຄອງທ້ອງຖິ່ນແບ່ງດິນແບ່ງປ່າໃຫ້ປະຊາຊົນຄຸ້ມຄອງນຳໃຊ້ພ້ອມທັງແນະນຳ ເຕັກນິກກະສິກຳ, ວິທະຍາການ ແລະໃຫ້ຄຳປຶກສາດ້ານແນວພັນຕ່າງໆ, ນອກນັ້ນຍັງໄດ້ສົ່ງເສີມດ້ານແນວພັນເປັນຕົ້ນແມ່ນແນວພັນເຂົ້ານາແຊງປະເພດຕ່າງໆໃຫ້ປະ ຊາຊົນທົດລອງປູກ.

  ການລ້ຽງສັດເປັນວຽກງານໜຶ່ງທີ່ການນຳເມືອງໄດ້ເອົາໃຈໃສ່ຊຸກຍູ້ສົ່ງເສີມຄວບຄູ່ກັບການປູກຝັງໂດຍໄດ້ມອບໝາຍໃຫ້ພາກສ່ວນທີ່ກ່ຽວຂ້ອງສົ່ງວິຊາການລົງຊ່ວຍເຫຼືອແນະນຳຢ່າງໃກ້ຊິດຕິດແທດ, ຜ່ານມາການລ້ຽງສັດເຫັນວ່າມີທ່າຂະຫຍາຍຕົວ, ປະຊາຊົນມີການປູກຫຍ້າລ້ຽງສັດຢ່າງເປັນຂະບວນການ, ມີຄວາມຕື່ນຕົວໃນການຊອກຮູ້ຫາຮຽນເຕັກນິກໃໝ່ ແລະນຳໃຊ້ເຕັກນິກດັ່ງກ່າວເຂົ້າຊ່ວຍເພື່ອເພີ່ມສະມັດຖະພາບໃນການລ້ຽງໃຫ້ສູງຂຶ້ນ ແລະກ້າວອອກຈາກການລ້ຽງສັດແບບທຳມະຊາດ.

  ທ່ານນາງ ຕຸ້ຍ ພົມມະທອງ ຮອງຫົວໜ້າຫ້ອງການກະສິກຳ-ປ່າໄມ້ເມືອງສົບເບົາໃຫ້ຮູ້ວ່າ: ໃນລະດູແລ້ງສົກປີ 2019-2020 ຜ່ານມານີ້,ທົ່ວເມືອງມີເນື້ອທີ່ປູກພືດທັງໝົດ 1.120 ເຮັກຕາ ປະຕິບັດໄດ້ 976,2 ເຮັກຕາ, ຜົນຜະລິດໄດ້ທັງໝົດ 3.921 ເຮັກຕາ, ໃນນັ້ນເດັ່ນກວ່າໝູ່ແມ່ນການຜະລິດເຂົ້ານາແຊງປະຕິບັດໄດ້ 645,07 ເຮັກຕາ ທຽບໃສ່ແຜນ ການເທົ່າກັບ 102,39%, ສະ ມັດຖະພາບເຂົ້າສະເລ່ຍ 4,56 ໂຕນຕໍ່ເຮັກຕາ, ຜົນຜະລິດໄດ້ 2.941 ໂຕນ ນອກນັ້ນຍັງມີເນື້ອ ທີ່ປູກໝາກໂມ 17,6 ເຮັກຕາ ຜົນຜະລິດໄດ້ 193,6 ໂຕນ, ປູກອ້ອຍ 4 ເຮັກຕາ ແລະ ພືດຜັກອື່ນໆຕື່ມອີກ, ສຳລັບລະດູຝົນປີນີ້, ເມືອງສົບເບົາມີເນື້ອທີ່ປູກຝັງທັງ ໝົດ 4.995 ເຮັກຕາ ໃນນັ້ນເນື້ອທີ່ປູກເຂົ້ານາປີ 2.124 ເຮັກຕາມາຮອດປະຈຸບັນໄດ້ກະກຽມດິນຕົກກ້າໄດ້ 20% ພ້ອມນີ້ຍັງໄດ້ຊຸກຍູ້ໃຫ້ປະຊາຊົນປູກພືດເປັນສິນ ຄ້າປະເພດພືດຜັກເຮືອນຮົ່ມ ແລະພືດຜັກອື່ນໆທົດແທນໃສ່ຜົນກະທົບໃນຊ່ວງໂຄວິດເພື່ອສ້າງລາຍຮັບເຂົ້າສູ່ຄອບຄົວ.

   ໃນປີ 2019 ຜ່ານມາ, ທົ່ວເມືອງສົບເບົາມີເນື້ອທີ່ປູກພືດທັງໝົດ 2.048 ເຮັກຕາ, ເກັບກ່ຽວຜົນຜະລິດໄດ້ 10.921 ໂຕນ ໃນນີ້ປູກພືດສິນຄ້າຕົ້ນຕໍ 1.478 ເຮັກຕາ, ຜົນຜະລິດ 9.428 ໂຕນ, ພືດສິນຄ້າທົ່ວໄປ 63,7 ເຮັກຕາ, ຜົນຜະລິດ 228,8 ໂຕນ, ປູກພືດສະບຽງອາຫານ 506,4 ເຮັກຕາ, ຜົນຜະລິດໄດ້ 1.266 ໂຕນ, ການລ້ຽງສັດທົ່ວເມືອງມີ ງົວ 10.435 ໂຕ, ຄວາຍ 6.286 ໂຕ, ໝູ11.900 ໂຕ, ແບ້ 1.110 ໂຕ, ສັດປີກ 76.250 ໂຕ ແລະມີໜອງປາ 5.287 ໜອງ, ມີເນື້ອ ທີ່ 241 ເຮັກຕາ, ມີຈຳນວນປາປ່ອຍທັງໝົດ 4.209 ກິໂລ, ເຮັດໃຫ້ລວມຍອດຜະລິດຕະພັນພາຍໃນເມືອງໃນປີ 2019 ບັນລຸ 158 ຕື້ກວ່າກີບ, ສະເລ່ຍລາຍໄດ້ຕໍ່ຫົວຄົນແມ່ນ 6 ລ້ານກວ່າ ກີບຕໍ່ຄົນຕໍ່ປີໃນນັ້ນຂະແໜງກະສິກຳ-ປ່າໄມ້ກວມເອົາ 52,21% ຂອງລວມຍອດຜະລິດຕະພັນພາຍໃນເຮັດໃຫ້ອັດຕາຄວາມທຸກຍາກຂອງປະຊາຊົນທົ່ວເມືອງຍັງເຫຼືອ 8,22% ຂອງຄົວເຮືອນທັງໝົດ ແລະສາມາດປະກາດຮັບຮອງປັນບ້ານພັດທະນາໄດ້ແລ້ວ 45 ບ້ານ.

_______________

ຂຽນໂດຍ: ໄອແກ້ວ   

ພາບ ແລະຂ່າວ: ໜັງສືພິມເສດຖະກິດ-ສັງຄົມ

แชร์