ຊາວໜຸ່ມສະຫວັນ ຮັບໃບຢັ້ງຢືນ 4 ບຸກ

  ໃນວັນທີ10 ມີຖຸນາ 2020 ນີ້, ໄດ້ຈັດພິທີມອບ-ຮັບໃບຢັ້ງຢືນ 4 ບຸກ ຄັ້ງທີ III ແລະການປະເມີນຮອບທີ 3 ເພື່ອກະກຽມຮັບທຸງໄຊນຳໜ້າໃນການຈັດຕັ້ງຂໍ້ແຂ່ງ ຂັນ 4 ບຸກ ຂອງຄະນະບໍລິຫານງານຊາວໜຸ່ມແຂວງສະຫວັນນະເຂດຂຶ້ນທີ່ຫ້ອງປະຊຸມຫໍວັດທະນະທໍາໄກສອນ ພົມວິຫານ ພາຍໃຕ້ການເປັນກຽດເຂົ້າຮ່ວມຂອງທ່ານ ນາງ ບຸນເຍື້ອນ ທິດພຸດທະວົງ ຄະນະປະຈຳພັກແຂວງ ປະທານກວດກາພັກ-ລັດແຂວງ, ທ່ານ ນາງ ວິລະວອນ ພັນທະວົງ ຮອງເລຂາຄະນະບໍລິຫານງານສູນກາງຊາວໜຸ່ມ, ທ່ານ ພູລຳພອນ ສີຫາວົງ ເລຂາຄະນະບໍລິຫານງານຊາວໜຸ່ມແຂວງ, ມີຄະນະສະຫະພັນແມ່ຍິງແຂວງ, ຄະນະສະຫະພັນນັກຮົບເກົ່າແຂວງ, ຄະນະສະ ຫະພັນກຳມະບານແຂວງ, ບັນດາຫົວໜ້າກົມ-ຮອງກົມ, ເຈົ້າເມືອງ,ຄະນະປະຈໍາພັກນະຄອນ-ຄະນະປະຈໍາພັກເມືອງ, ຄະນະພັກພະແນກການກົມກອງອ້ອມຂ້າງແຂວງຕະຫຼອດຄະນະນໍາຊາວໜຸ່ມ-ສະມາຊິກຊາວໜຸ່ມພາຍໃນແຂວງເຂົ້າຮ່ວມຢ່າງພ້ອມພຽງ.


  ໃນພິທີ, ທ່ານ ນາງ ບັງອອນ ພີມມະສານ ຮອງເລຂາຄະນະບໍລິຫານງານຊາວໜຸ່ມແຂວງໄດ້ຂຶ້ນຜ່ານບົດສະຫຼຸບຫຍໍ້ກ່ຽວກັບການຈັດຕັ້ງປະຕິບັດຂໍ້ແຂ່ງຂັນ 4 ບຸກປີ 2018-2019 ຊຶ່ງໃຫ້ຮູ້ວ່າ: ການກວດກາປະເມີນຜົນຂໍ້ແຂ່ງຂັນ 4 ບຸກ ເລີ່ມດຳເນີນແຕ່ປີ 2015 ເປັນຕົ້ນມາມາຮອດປະຈຸບັນສາມາດປະຕິບັດໃນແຕ່ລະດ້ານຄື: ດ້ານວຽກສຶກສາອົບຮົມການເມືອງ-ແນວຄິດປະຕິບັດໄດ້ 91,29%, ດ້ານວຽກງານຝຶກຝົນຫຼໍ່ຫຼອມ-ຮໍ່າຮຽນສາມາດປະຕິບັດໄດ້ 89,88%, ດ້ານວຽກງານການຈັດຕັ້ງປະຕິບັດໄດ້ 86,76%, ດ້ານວິຊາຊີບສ້າງວຽກເຮັດງານທໍາປະຕິບັດໄດ້ 90,63% ອັນພົ້ນເດັ່ນແມ່ນໄດ້ປະກາດຮັບຮອງເປັນຄະນະຊາວໜຸ່ມປະຊາຊົນປະຕິ ວັດລາວ 4 ບຸກໄດ້ 2 ປີຊ້ອນ (ຄັ້ງທີ 1 ປີ2017, ຄັ້ງ 2 ປີ 2018 ແລະຄັ້ງທີ 3 ຈະປະກາດຮັບຮອງໃນມໍ່ໆນີ້).
  ໂອກາດນີ້, ຜູ້ທີ່ເຂົ້າຮ່ວມຍັງໄດ້ຮັບຟັງການປະກອບຄໍາເຫັນຈາກສະມາຊິກຊາວໜຸ່ມຕົວແບບພາຍໃຕ້ຫົວຂໍ້: ລ້ຽງສັດເປັນອາຊີບຢູ່ບ້ານນາແກ, ນະຄອນໄກສອນ ພົມວິ ຫານ ຈາກນັ້ນ,ໃນພິທີກໍໄດ້ມີການມອບ-ຮັບໃບຢັ້ງຢືນ 4 ບຸກໃຫ້ແກ່ຄະນະບໍລິຫານງານຊາວໜຸ່ມແຂວງຢ່າງເປັນທາງການຊຶ່ງເປັນກຽດມອບໂດຍທ່ານ ນາງ ວິລະວອນ ພັນທະວົງ ຮອງເລຂາຄະນະບໍລິຫານງານສູນກາງຊາວໜຸ່ມ ແລະຮັບໂດຍທ່ານ ພູລຳພອນ ສີຫາວົງ ເລຂາຄະນະບໍລິຫານງານຊາວໜຸ່ມແຂວງໂອກາດດຽວກັນນີ້,ທ່ານ ນາງ ວິລະວອນ ພັນທະວົງ ຍັງໄດ້ມອບເຄື່ອງຊ່ວຍເຫຼືອໃຫ້ກັບຄະນະຊາວໜຸ່ມແຂວງ ເປັນມູນຄ່າທັງໝົດ 5 ລ້ານກີບ.

______________

ໜັງສືພິມເສດຖະກິດ-ສັງຄົມ

แชร์