ສຳເລັດກອງປະຊຸມໃຫຍ່ຜູ້ແທນສະຫະພັນແມ່ຍິງ ທຫລ

  ກອງປະຊຸມໃຫຍ່ຜູ້ແທນສະຫະພັນແມ່ຍິງ (ສມຍ) ທະນາຄານແຫ່ງ ສປປ ລາວ (ທຫລ) ຄັ້ງທີ X ໄດ້ສໍາເລັດລົງດ້ວຍໝາກຜົນອັນຈົບງາມໃນວັນທີ 13 ມິຖຸນາ 2020 ທີ່ສະໂມສອນສະຖາບັນການທະນາຄານຊຶ່ງມີຜູ້ແທນສົມບູນເຂົ້າຮ່ວມ 200 ສະຫາຍທີ່ເປັນຕົວແທນໃຫ້ແກ່ສະມາຊິກແມ່ຍິງທັງໝົດ 1.794 ສະຫາຍ ມາ ຈາກ 9 ຮາກຖານຂຶ້ນກັບ ສມຍ-ທຫລ ໂດຍພາຍໃຕ້ການເປັນປະທານຂອງ ສະຫາຍ ນາງ ສາຍສະໝອນ ຈັນທະຈັກ ຄະນະພັກ, ຄະນະບໍລິຫານງານສູນກາງສະຫະ ພັນແມ່ຍິງລາວ (ສສຍລ), ປະທານ ສມຍ-ທຫລ ໂດຍການໃຫ້ກຽດເຂົ້າຮ່ວມຂອງທ່ານນາງ ອິນລາວັນ ແກ້ວບຸນພັນ ກໍາມະການສູນກາງພັກ,ປະທານຄະນະບໍລິຫານງານ ສສຍລ ແລະທ່ານ ສອນໄຊ ສິດພະໄຊ ກໍາມະການສໍາຮອງສູນກາງພັກ, ເລຂາຄະນະພັກ, ຜູ້ວ່າການ ທຫລ; ພ້ອມນີ້, ກໍມີຜູ້ຕາງໜ້າສະຫະພັນແມ່ຍິງກະຊວງ-ອົງການທຽບເທົ່າກະຊວງ, ຄະນະອຳນວຍການທະນາຄານທຸລະກິດ, ຜູ້ຕາງໜ້າຈາກອົງການຈັດຕັ້ງຊາວໜຸ່ມ ແລະກຳມະບານ ທຫລ ເຂົ້າຮ່ວມຢ່າງພ້ອມພຽງ.
   ກອງປະຊຸມໄດ້ພ້ອມກັນຄົ້ນຄ້ວາປະກອບຄວາມເຫັນ ແລະເປັນເອກະພາບຮັບຮອງເອົາບົດລາຍງານການເມືອງທີ່ສະເໜີໂດຍສະຫາຍນາງ ໄກສອນ ໄຊຍະພອນ ຮອງປະທານ ສມຍ-ທຫລ ໄດ້ສະຫຼຸບຕີລາຄາຜົນການຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນສະຫະພັນສມຍ-ທຫລ ຄັ້ງທີ IX(2015-2020)ຜ່ານມາທີ່ໄດ້ເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ຖັນແຖວສະມາຊິກສະຫະພັນແມ່ຍິງດ້ວຍການປຸກລະດົມແມ່ຍິງເຊື່ອມຊຶມແນວທາງແຜນນະໂຍບາຍ, ມະຕິກອງປະຊຸມໃຫຍ່ຂອງພັກ, ມະຕິກອງປະຊຸມໃຫຍ່ ຄັ້ງທີ III ຂອງອົງຄະນະພັກ ທຫລ, ກົດໝາຍ, ມູນເຊື້ອຂອງຊາດ, ຂອງພັກ, ວັນປະຫວັດສາດສໍາຄັນຕ່າງໆ ພ້ອມນີ້,ໄດ້ໂຄສະນາເຜີຍແຜ່ມະຕິ ແລະເອກະສານສໍາຄັນຕ່າງໆທີ່ຕິດພັນກັບວຽກງານແມ່ຍິງ-ເດັກນ້ອຍ ແລະຄວາມສະເໝີພາບຍິງ-ຊາຍ, ສ້າງກິດຈະກໍາຕ່າງໆ; ສໍາຄັນໄດ້ບໍລິຈາກເລືອດ 300 ກວ່າເທື່ອຄົນ ແລະບໍລິຈາກວັດຖຸ,ປັດໄຈຊ່ວຍເຫຼືອນາຍ ແລະພົນທະຫານທີ່ຢູ່ເຂດທຸລະກັນດານ,ຫ່າງໄກສອກຫຼີກ, ຜູ້ທີ່ດ້ອຍໂອກາດໃນສັງຄົມເປັນມູນຄ່າ 320 ລ້ານກີບ.


   ໃນຕະຫຼອດໄລຍະ 5 ປີຜ່ານມາພາຍໃຕ້ການຊີ້ນໍາ-ນໍາພາຂອງ ສມຍ-ທຫລ ໄດ້ເອົາໃຈໃສ່ປັບປຸງການຈັດຕັ້ງຂອງ ສມຍ ຊຶ່ງສາມາດຂະຫຍາຍຮາກຖານ ສມຍ ເພີ່ມ ຂຶ້ນ 2 ຮາກຖານ; ຂະຫຍາຍສະມາຊິກແມ່ຍິງເພີ່ມຂຶ້ນ 429 ສະຫາຍ; ຄົ້ນຄວ້າສ້າງນິຕິກໍາທີ່ຈໍາເປັນເພື່ອເປັນບ່ອນອີງໃນການເຄື່ອນໄຫວວຽກງານແມ່ຍິງ; ໄດ້ສ້າງຖານຂໍ້ມູນ ແລະ ເກັບກໍາສະຖິຕິແຍກເພດເພື່ອໝູນໃຊ້ເຂົ້າໃນການກໍານົດນະໂຍບາຍກ່ຽວກັບວຽກງານແມ່ຍິງພາຍໃນຂະແໜງການທະນາຄານ ແລະ ລາຍງານໃຫ້ ສສຍລ ຜ່ານການປະຕິບັດ ຄືດັ່ງກ່າວເຮັດໃຫ້ກົງຈັກການຈັດຕັ້ງແມ່ຍິງ ທຫລ ຂະຫຍາຍຕົວກວ້າງຂວາງ ແລະ ໜັກແໜ້ນເຂັ້ມແຂງທາງດ້ານແບບແຜນວິທີເຮັດວຽກແລະວິທີນໍາພາ, ມີແບບແຜນການຕິດຕາມກວດກາຢ່າງເປັນລະບົບສາມາດປະກອບສ່ວນເຂົ້າໃນການເຮັດສໍາເລັດວຽກງານວິຊາສະເພາະດ້ວຍດີສະເໝີມາກອງປະຊຸມຍັງສະເໜີຂໍ້ຄົງຄ້າງ, ວິທີການແກ້ໄຂໃນຜ່ານມາ ແລະທິດທາງແຜນການໃນ 5 ປີຕໍ່ໜ້າ.
  ກອງປະຊຸມໃຫຍ່ຍັງພ້ອມກັນໃຊ້ສິດປະຊາທິປະໄຕເລືອກເອົາຄະນະບໍລິຫານງານ ສມຍ -ທຫລປະກອບດ້ວຍ 15 ສະຫາຍ ເພື່ອເປັນແກນນໍາໃນການຊີ້ນໍາ-ນໍາພາໃນການຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນ ສມຍ-ທຫລ ຄັ້ງທີ X ໃຫ້ປະກົດຜົນເປັນຈິງ ແລະນໍາພາວຽກງານແມ່ຍິງຂະແໜງການທະນາຄານກ້າວເຂົ້າສູ່ຄວາມສໍາເລັດໃໝ່ຍິ່ງໃຫຍ່ກວ່າເກົ່າ ແລະກອງປະຊຸມໄດ້ເປັນເອກະສັນເລືອກເອົາສະຫາຍ ນາງ ສາຍສະໝອນ ຈັນທະຈັກເປັນປະທານ ສມຍ-ທຫລ; ເລືອກເອົາຮອງປະທານປະກອບດ້ວຍ ສະຫາຍ ນາງ ໄກສອນ ໄຊຍະພອນ, ສະຫາຍ ນາງ ຄໍາເຜີຍ ວໍລະເດດ ແລະ ສະຫາຍ ນາງ ໄພທູນ ກິ່ງແກ້ວ ທັງເປັນປະທານກວດກາ.
  ກອງປະຊຸມໃຫຍ່ໄດ້ຮັບຟັງການໂອ້ລົມຈາກສະຫາຍປະທານຄະນະບໍລິຫານງານ ສສຍລ ແລະສະຫາຍເລຂາຄະນະພັກ ທຫລ ຊຶ່ງທັງ 2 ສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ການຊີ້ນໍາ-ນໍາພາຂອງຄະນະບໍລິຫານງານ ສມຍ-ທຫລ ຊຸດເກົ່າທີ່ໄດ້ຊີ້ນໍາ-ນໍາພາ ສະມາຊິກແມ່ຍິງໃນທົ່ວຂະແໜງການທະນາຄານປະຕິບັດໜ້າທີ່ການເມືອງສາມາດຍາດໄດ້ຜົນງານໃນຫຼາຍໆດ້ານ. ພ້ອມນັ້ນ, ການນໍາທັງ 2 ສະຫາຍຍັງໃຫ້ທິດຊີ້ນໍາອັນມີຄຸນຄ່າໃຫ້ແກ່ການເຄື່ອນໄຫວຊີ້ນໍາ-ນໍາພາຂອງຄະນະບໍລິ ຫານງານ ສມຍ-ທຫລ ຊຸດໃໝ່ໃນຊຸມປີຕໍ່ໜ້າ ແລະ ຮຽກຮ້ອງມາຍັງຄະນະບໍລິຫານງານ ສມຍ ຂັ້ນຕ່າງໆ ພ້ອມດ້ວຍສະມາຊິກແມ່ຍິງທັງໝົດຈົ່ງພ້ອມກັນຄົ້ນຄວ້າເຊື່ອມຊຶມເນື້ອໃນຈິດໃຈຂອງມະຕິກອງປະຊຸມຄັ້ງນີ້ໄປຈັດຕັ້ງຜັນຂະຫຍາຍເປັນແຜນງານ-ໂຄງການລະອຽດຂອງຕົນ ແລະຈັດຕັ້ງປະຕິບັດໃຫ້ປະກົດຜົນເປັນຈິງ.

________________

ຂຽນໂດຍ: ຣັດສະໝີດວງສັດຈະ

ພາບ ແລະຂ່າວ: ໜັງສືພິມເສດຖະກິດ-ສັງຄົມ

แชร์