ນາຊາລົງສຳຫຼວດເກາະເກີດໃໝ່ຂອງໂລກ

   ນັກວິທະຍາສາດນາຊາລົງສຳຫຼວດໜຶ່ງໃນເກາະເກີດໃໝ່ຫຼ້າສຸດຂອງໂລກເປັນເທື່ອທຳອິດຫຼັງຈາກເກີດຂຶ້ນມາໄດ້ 4 ປີ ໂດຍຄົ້ນພົບຫຼາຍສິ່ງທີ່ໜ້າສົນໃຈມີທັງຂີ້ຕົມ, ມີລະບົບນິເວດທີ່ໜ້າປະຫຼາດໃຈ.

  ເວັບໄຊຊີເອັນເອັນ ເປີດເຜີຍເລື່ອງລາວທີ່ໜ້າສົນໃຈກ່ຽວກັບເກາະຮັງກາຕອງກາ (Hunga Tonga) ຕັ້ງຢູ່ມະຫາສະໝຸດປາຊິຟິກໃກ້ກັບປະເທດຕອງກາເກາະແຫ່ງນີ້ເກີດຂຶ້ນຈາກການປະທຸຂອງພູໄຟໃຕ້ນໍ້າໃນເດືອນທັນວາປີ 2014 ຊຶ່ງໄດ້ສ້າງຄວາມປະຫຼາດໃຈໃຫ້ກັບທີມງານນັກວິທະຍາສາດເນື່ອງຈາກປົກກະຕິແລ້ວເກາະທີ່ເກີດໃນລັກສະນະນີ້ຈະຖືກເຊາະ ແລະຈົມຫາຍໄປໃນທະເລພາຍໃນເວລາບໍ່ເທົ່າໃດເດືອນແຕ່ເກາະຮັງກາຕອງກາສາມາດຢູ່ມາໄດ້ເຖິງ 4 ປີ ແລະ ເປັນພຽງ 1 ໃນ 3 ເກາະໃໝ່ຂອງໂລກໃນຮອບ 150 ປີທີ່ ຢູ່ລອດມາໄດ້ ແລະເມື່ອບໍ່ດົນມານີ້ນາຊາ ແລະສະຖາບັນວິໄຈທະເລໄດ້ມີໂອກາດລົງໄປສຳຫຼວດເກາະແຫ່ງນີ້ເປັນເທື່ອທຳອິດໃນເດືອນທັນວາ ປີ 2018 ກ່ອນຈະມາເປີດເຜີຍໃນ ວັນທີ 30 ມັງກອນຜ່ານມາ, ໂດຍການສຳຫຼວດຄັ້ງນີ້ເຮັດໃຫ້ທີມນັກວິທະຍາສາດຕື່ນເຕັ້ນ ແລະປະຫຼາດໃຈພາຍຫຼັງພົບວ່າໃນເກາະທີ່ກຳເນີດຈາກພູໄຟມີລະບົບນິເວດທີ່ສົມບູນ, ມີການເຕີບໂຕຂອງພືດ, ມີດອກໄມ້, ມີນົກ, ຫາດຊາຍໃນເກາະແຫ່ງນີ້ມີກ້ອນຫີນຂະໜາດເທົ່າໃນໝາກຖົ່ວແທນທີ່ຈະເປັນຊາຍ, ມີຂີ້ຕົມສີສະຫວ່າງທີ່ມີຄວາມໝື່ນ ຊຶ່ງພວກເຂົາເອງກໍສົງໄສວ່າມັນມາຈາກໃສເພາະບໍ່ມີຂີ້ເຖົ່າຖ່ານຈາກພູໄຟ.

   ຈາກການວິໄຈຂອງນາຊາໃນ ປີ 2016 ພົບວ່າ ເກາະແຫ່ງນີ້ຢູ່ລອດມາໄດ້ຢ່າງໜ້າປະຫຼາດໃຈ ແລະຄາດວ່າຈະຢູ່ຕໍ່ໄປໄດ້ອີກ 6-30 ປີ ຢ່າງໃດກໍຕາມພາຍຫຼັງລົງພື້ນທີ່ໄປສຳຫຼວດທາງນັກວິທະຍາສາດເປີດເຜີຍວ່າ ເກາະແຫ່ງນີ້ຖືກເຊາະໄວກວ່າໄລຍະທຳອິດທີ່ພົບເນື່ອງຈາກຝົນ ແລະຄື້ນລົມແຮງໂດຍສະເພາະພື້ນທີ່ບໍລິເວນແຄມຝັ່ງທາງໃຕ້.

แชร์