ກຳມະບານທະນາຄານແຫ່ງ ສປປ ລາວ ບໍລິຈາກເລືອດ

   ຄະນະສະຫະພັນກໍາມະບານທະນາຄານແຫ່ງ ສປປ ລາວ (ທຫລ) ໄດ້ຈັດຕັ້ງການບໍລິຈາກເລືອດຂອງຄະນະນໍາ ແລະສະມາຊິກກໍາມະບານທົ່ວຂະແໜງການທະນາ ຄານໃຫ້ແກ່ສູນເລືອດແຫ່ງຊາດອົງການກາແດງລາວໃນວັນທີ 11 ມິຖຸນາ 2020 ທີ່ສໍານັກງານໃຫຍ່ທະນາຄານສົ່ງເສີມກະສິກໍາ ນະຄອນຫຼວງວຽງຈັນ ໂດຍການນໍາພາຂອງ ສະຫາຍ ຄໍາສິງ ແສງແກ້ວມະຫາວົງ ຄະນະສະຫະພັນກໍາມະບານ ທຫລ ແລະ ມີທ່ານ ດຣ. ຈັນທະລາ ສຸກສາຄອນ ຫົວໜ້າສູນເລືອດແຫ່ງຊາດພ້ອມດ້ວຍຄະນະແພດ ແລະກໍາມະບານ ທຫລ ເຂົ້າຮ່ວມທັງນີ້ກໍ່ເພື່ອເປັນການສ້າງຜົນງານຂໍ່ານັບຮັບຕ້ອນກອງປະຊຸມໃຫຍ່ຜູ້ແທນຄັ້ງທີ IVຂອງອົງຄະນະພັກ ທຫລ ແລະກອງປະຊຸມໃຫຍ່ຄັ້ງທີ VIII ຂອງສະ ຫະພັນກໍາມະບານ ທຫລ ທີ່ຈະເປີດຂຶ້ນໃນຕໍ່ໜ້ານີ້.

  ການບໍລິຈາກເລືອດຄັ້ງນີ້ກໍ່ຢູ່ໃນທ່າມກາງທີ່ທົ່ວທັງໂລກພວມຢູ່ໃນໄລຍະທີ່ມີການແຜ່ລະບາດຂອງພະຍາດໂຄວິດ-19 ແລະຢູ່ໃນໄລຍະທີ່ ສປປ ລາວ ປອດເຊື້ອພະຍາດດັ່ງກ່າວ ທັງເປັນວັນຜູ້ບໍລິຈາກເລືອດໂລກ (ວັນທີ 14 ມິຖຸນາ) “World Blood Dono Day” ໂດຍມີຄະນະນໍາ ແລະສະມາຊິກກໍາມະບານເຂົ້າກວດເລືອດຕົວຈິງ 150 ສະຫາຍ ໃນນີ້ເດັ່ນກວ່າໝູ່ແມ່ນທະນາຄານການຄ້າຕ່າງປະເທດລາວມະຫາຊົນ (ຈໍາພົນເຂົ້າຮ່ວມ 50 ສະຫາຍ) ແລະມີຜູ້ທີ່ສາມາດບໍລິຈາກເລືອດຕົວຈິງທັງໝົດ 111 ສະຫາຍ ຊຶ່ງເປັນການບໍລິຈາກທີ່ບໍລິສຸດ, ບໍ່ຫວັງຜົນຕອບແທນທັງເປັນການບໍລິຈາກເລືອດ ແລະຜະລິດຕະພັນເລືອດທີ່ປອດໄພເພື່ອເປັນການຊ່ວຍຊີວິດຂອງຄົນເຈັບໃຫ້ປອດໄພ ແລະ ເປັນການປູກຈິດສໍານຶກໃຫ້ສັງຄົມມີການປະກອບສ່ວນໃນການບໍລິຈາກເລືອດຫຼາຍຂຶ້ນເຮັດໃຫ້ສັງຄົມມີຄວາມສະຫງົບເປັນສັງຄົມທີ່ມີຈິດ ໃຈເອື້ອເຟື້ອເພື່ອແຜ່ມີຄວາມສາມັກຄີ ແລະມີສຸຂະພາບທີ່ດີ.

  ໃນໂອກາດດັ່ງກ່າວ; ສະຫາຍ ຄໍາສິງ ແສງແກ້ວມະຫາວົງ ຄະນະສະຫະພັນກໍາມະບານ ທຫລ ໄດ້ຢືນຢັນວ່າ: ການບໍລິຈາກເລືອດຂອງສະມາຊິກກໍາມະບານໃນເທື່ອນີ້ເປັນການຊ່ວຍເຫຼືອເພື່ອນມະນຸດດ້ວຍກັນເນື່ອງຈາກປະຈຸບັນມີຄົນຈໍານວນບໍ່ໜ້ອຍທີ່ເຈັບປ່ວຍທີ່ພວມລໍຖ້າຄວາມຊ່ວຍເຫຼືອຈາກພວກເຮົາ, ຖ້າບໍ່ມີໃຜສົນໃຈຕໍ່ວຽກ ງານນີ້ບຸກຄົນເຫຼົ່ານັ້ນຍັງລໍຄອຍຂໍຄວາມຊ່ວຍເຫຼືອກໍ່ຈະບໍ່ມີຊີວິດຢູ່ຕໍ່ໄປໄດ້ເພາະການໃຫ້ເລືອດຄືການໃຫ້ຊີວິດ ແລະພວກເຮົາໄດ້ພ້ອມກັນຈັດຕັ້ງປະຕິບັດໃນການບໍລິຈາກເລືອດມາເປັນເວລາຫຼາຍປີກາຍເປັນປະເພນີຂອງຄະນະກໍາມະບານຂອງພວກເຮົາ.

_____________

ຂຽນໂດຍ: ຣັດສະໝີ ດວງສັດຈະ

ພາບ ແລະຂ່າວ: ໜັງສືພິມເສດຖະກິດ-ສັງຄົມ

แชร์