ປະຊາຊົນ 4 ເຂດ 3 ເມືອງ ແຂວງໄຊຍະບູລີ ໄດ້ໃຊ້ນໍ້າປະປາ

  ພິທີມອບ-ຮັບການນໍາໃຊ້ນໍ້າປະປາ 4 ເຂດຄື: ເຂດບ້ານນາຫີນ ເມືອງແກ່ນທ້າວ, ເຂດສຸວັນນະພູມ ເມືອງປາກລາຍ, ເຂດບ້ານຕາກແດດ ເມືອງປາກລາຍ ແລະເຂດບ້ານບໍ່ແຕນ ເມືອງບໍ່ແຕນ ແຂວງໄຊຍະບູລີ ໄດ້ຈັດຂຶ້ນໃນວັນທີ່ 11 ມິຖຸນາ 2020 ນີ້ ທີ່ຫ້ອງປະຊຸມເມືອງແກ່ນທ້າວ ແຂວງໄຊຍະບູລີ, ໂດຍໃຫ້ກຽດເຂົ້າຮ່ວມມີ ທ່ານ ນາງ ວິໄລຄໍາ ໂພສາລາດ ຮອງລັດຖະມົນຕີກະຊວງໂຍທາທິການ ແລະຂົນສົ່ງ,ທ່ານ ເພັງນິລັນ ຄໍາພັນເພັງ ຮອງເຈົ້າແຂວງໄຊຍະບູລີ,ມີຫົວໜ້າກົມ,ຮອງກົມ, ຫົວໜ້າພະແນກ,ຮອງພະແນກ,ຫົວໜ້າ,ຮອງຫົວໜ້າຫ້ອງການ,ມີຕາງໜ້າມູນນິທິອິດມິດເວດປະຈໍາລາວ ແລະຜູ້ໃຫ້ທຶນຈາກ KO ICA ແລະ Charity Water ພ້ອມດ້ວຍອໍານາດການປົກຄອງນາຍບ້ານໃນ 4 ເຂດເຂົ້າຮ່ວມ.

  ທ່ານ ສົມປອງ ສິດທິວົງ ຫົວໜ້າກົມນໍ້າປະປາໄດ້ໃຫ້ຮູ້ວ່າ: ໂຄງການກໍ່ສ້າງນໍ້າປະປາ 4 ເຂດຂອງແຂວງໄຊຍະບູລີ ເປັນໂຄງການທີ່ນໍາໃຊ້ງົບປະມານຂອງມູນນິທິອິດມິດເວດງົບປະມານຂອງແຂວງ ແລະຂອງເອກະຊົນມີທັງໝົດ 1 ລ້ານ 441,062 ໂດລາສະຫະລັດ ໃນນີ້ທຶນຂອງລັດສົມທົບ 60 ພັນໂດລາ, ທຶນຂອງມູນນິທິອິດມິດ ເວດ 277.000 ໂດລາ ແລະ ທຶນຂອງເອກະຊົນລົງທຶນ 1 ລ້ານ 109,062 ໂດລາ; ໂຄງການດັ່ງກ່າວມີປະຊາຊົນໄດ້ຮັບຜົນປະໂຫຍດມີ 16 ບ້ານ, 1987 ຄົນ ແລະມີ3.897 ຄົວເຮືອນ, ໂຄງການກໍ່ ສ້າງນໍ້າປະປາໃນ 4 ເຂດແມ່ນເລີ່ມມາແຕ່ເດືອນມີນາ 2019 ມາຮອດເດືອນມີນາ 2020 ແມ່ນສໍາເລັດໃຊ້ເວລາກໍ່ສ້າງ 1 ປີ; ໃນນີ້ເຂດບ້ານນາຫີນ ເມືອງແກ່ນທ້າວ ມີມູນຄ່າກໍ່ສ້າງ356.427 ໂດລາ, ມີກໍາລັງການຜະລິດ 30m3 ຕໍ່ຊົ່ວໂມງ, ມີປະຊາກອນໄດ້ຊົມໃຊ້ 4.247 ຄົນມີ 4 ບ້ານຄື: ບ້ານນາຫີນ, ບ້ານກ້ວຍແຂ້, ບ້ານດົງສາມແສນ ແລະບ້ານສາມຊົງຕິດຕັ້ງກົງເຕີແລ້ວ 134 ກົງເຕີ ໂດຍແມ່ນບໍລິສັດລັດວິສາຫະກິດນໍ້າປະປາແຂວງເປັນຜູ້ຮັບເໝົາກໍ່ສ້າງ, ເຂດສຸວັນນະພູມ ເມືອງປາກລາຍ ມີກໍາລັງການຜະລິດ 75m3 ຕໍ່ຊົ່ວໂມງ ປະຊາຊົນໄດ້ຮັບຜົນປະໂຫຍດມີ 9.204 ຄົນ, ມີ 1689 ຫຼັງຄາເຮືອນ, ມີ 5 ບ້ານຄື: ບ້ານສຸບັນນະພູມ,ຫາດດ້າຍ,ບ້ານກາງ, ບ້ານທ່າປໍ ແລະ ບ້ານໂພນໄຊຕິດຕັ້ງກົງເຕີແລ້ວ 1.200 ກົງເຕີ ຊຶ່ງແມ່ນທ່ານ ໄຊຍາແສງ ກັນນາລີ ເປັນຜູ້ຮັບເໝົາກໍ່ສ້າງໃນມູນຄ່າກໍ່ສ້າງທັງໝົດ 511,681 ໂດລາສະຫະລັດ,ເຂດບ້ານຕາກແດດເມືອງປາກລາຍມີກໍາລັງການຜະລິດ 30m3/ ຊົ່ວໂມງປະຊາຊົນໄດ້ຮັບຜົນປະໂຫຍດມີ 3.427 ຄົນ, ມີ 3 ບ້ານຄື: ບ້ານຕາກແດດ, ບ້ານບຸ່ງມ່າ ແລະບ້ານແກ້ງສາວໂດຍບໍລິສັດສີປະເສີດກໍ່ສ້າງຂົວທາງເຄຫາສະຖານເປັນຜູ້ກໍ່ສ້າງມູນຄ່າ 294,727 ໂດລາສະຫະລັດ, ຕິດຕັ້ງກົງເຕີແລ້ວ 550 ກົງເຕີ, ເຂດບ້ານບໍ່ແຕນມີກໍາລັງການຜະລິດ 30m3/ຊົ່ວໂມງປະຊາຊົນໄດ້ຮັບຜົນປະໂຫຍດ 3.093 ຄົນ, ມີ 4 ບ້ານຄື: ບ້ານບໍ່ແຕນ,ບ້ານດອນສະຫວ່າງ,ບ້ານເຕົາເກືອ ແລະບ້ານໃຫຍ່ໂດຍແມ່ນບໍລິສັດສີວິໄລກໍ່ສ້າງເປັນຜູ້ຮັບເໝົາກໍ່ສ້າງກໍ່ມູນຄ່າ 288,277 ໂດລາ ຕິດຕັ້ງກົງເຕີແລ້ວ 175 ກົງເຕີ. ຈາກນັ້ນທ່ານ ນາງ ວິໄລຄໍາ ໂພສາລາດ ຮອງລັດຖະມົນຕີກະຊວງໂຍທາທິການ ແລະຂົນສົ່ງໄດ້ໃຫ້ກຽດກ່າວມອບໂຄງການນໍ້າປະປາໃນ 4 ເຂດ ໃຫ້ກຽດກ່າວຮັບຂອງທ່ານ ເພັງນິລັນ ຄໍາພັນເພັງ ຮອງເຈົ້າແຂວງໄຊຍະບູລີ ພ້ອມທັງຮ່ວມກັນຕັດແຖບຜ້າ ແລະເປີດໃຊ້ນໍ້າປະປາ 4 ເຂດຂອງ ແຂວງໄຊຍະບູລີ ຢ່າງເປັນທາງ ການ.

_______________

ຂຽນໂດຍ: ບຸນທີ

ພາບ ແລະຂ່າວ: ໜັງສືພິມເສດຖະກິດ-ສັງຄົມ

แชร์