ຕລຊລ ຍ້ອງຍໍບໍລິສັດຈົດທະບຽນທີ່ເປີດເຜີຍຂໍ້ມູນປີ 2019

  ຕະຫຼາດຫຼັກຊັບລາວ (ຕລຊລ) ໄດ້ຈັດຕັ້ງການມອບ-ຮັບລາງວັນເປີດເຜີຍຂໍ້ມູນຂອງບໍລິສັດຈົດທະບຽນຕະຫຼອດປີ 2019 ໃນວັນທີ 12 ມິຖຸນາ 2020 ທີ່ອາຄານ ຕລຊລ ໂດຍການໃຫ້ກຽດເຂົ້າຮ່ວມຂອງ ທ່ານ ນາງ ສາຍສະໝອນ ຈັນທະຈັກ ຫົວໜ້າສຳນັກງານຄະນະກຳມະການຄຸ້ມຄອງຫຼັກຊັບ, ທ່ານ ອ໊ອດ ພົນຊຽງດີ ຜູ້ອຳ ນວຍການໃຫຍ່ ຕລຊລ, ທ່ານ EuiCheon Hwang ຮອງຜູ້ອຳນວຍການໃຫຍ່ ຕລຊລ ແລະມີພາກສ່ວນກ່ຽວຂ້ອງເຂົ້າຮ່ວມ.

  ທ່ານ ທະນູສິດ ແສງມະນີພອນ ຮອງຫົວໜ້າພະແນກຈົດທະບຽນ ແລະເປີດເຜີຍຂໍ້ມູນ ຕລຊລ ໄດ້ເປີດເຜີຍວ່າ: ການມອບ-ຮັບລາງວັນໃຫ້ບັນດາບໍລິສັດຈົດທະບຽນແມ່ນໄດ້ຜ່ານຫຼາຍເງື່ອນໄຂມາດຖານຊຶ່ງບໍ່ເຄີຍຕົກຢູ່ໃນກໍລະນີຂອງການຖືກຖອນຈົດທະບຽນຮຸ້ນຕາມລະບຽບການໃນປີ 2019; ບໍ່ຖືກກຳນົດໃຫ້ເປັນບໍລິສັດຈົດທະ ບຽນທີ່ເປີດເຜີຍຂໍ້ມູນບໍ່ຄົບມາດຖານຕາມລະບຽບການທີ່ກ່ຽວຂ້ອງ; ເປັນບໍລິສັດຈົດທະບຽນໃນ ຕລຊລ ຄົບໄລຍະປີ 2019 ໝາຍຄວາມວ່າຄົບປີ; ບໍ່ເຄີຍມີປະຫວັດຂໍ້ຂັດແຍ່ງດ້ານຄະດີຄວາມຕິດພັນກັບຂອດການດຳເນີນທຸລະກິດຂອງຕົນ; ບໍ່ມີປະຫວັດການການປະຕິບັດບໍ່ຖືກຕ້ອງກ່ຽວກັບມາດຕະຖານບັນຊີ ຫຼືປອມແປງຂໍ້ມູນບັນຊີ; ບໍ່ຕົກໃນກໍລະນີການລົ້ມລະລາຍຂອງວິສາຫະກິດຕາມກົດໝາຍທີ່ກ່ຽວຂ້ອງ; ຮຸ້ນຂອງບໍລິສັດຈົດທະບຽນຕ້ອງບໍ່ເຄີຍຖືກໂຈະການຊື້-ຂາຍພາຍໃນປີ ແລະເງື່ອນໄຂອື່ນໆທີ່ຕິດພັນກັບພັນທະການເປັນບໍລິສັດຈົດທະບຽນ ແລະການເປີດເຜີຍຂໍ້ມູນ.

 ສຳລັບການຕີລາຄາ ແລະການໃຫ້ຄະແນນໄດ້ພິຈາລະນາໂດຍຊອກຫາຄ່າສະເລ່ຍຂອງການເປີດເຜີຍຂໍ້ມູນແຕ່ລະປະເພດທີ່ບໍລິສັດສາມາດປະຕິບັດໄດ້ສູງກວ່າຄ່າສະເລ່ຍກໍ່ຈະໄດ້ຄະແນນທີ່ສູງກວ່າກໍລະນີເປີດເຜີຍບໍ່ຄົບຖ້ວນຫຼືບໍ່ຖືກຕ້ອງຈະຖືກຕັດຄະແນນຕາມແຕ່ລະກໍລະນີຊຶ່ງຄະແນນລວມແມ່ນ 100 ຄະແນນໃນນັ້ນ,ໄດ້ແບ່ງຄະແນນຕາມແຕ່ ລະປະເພດຂອງການເປີດເຜີຍຂໍ້ມູນຄຸນລັກສະນະ, ເຫດຜົນ ແລະຈຸດພິເສດຂອງການພິຈາລະນາຜ່ານການຕິດຕາມຕົວຈິງ ແລະການໃຫ້ຄະແນນຕະຫຼອດປີ 2019 ແລະ ຕລຊລ ໄດ້ໃຫ້ກຽດຍ້ອງຍໍການເປີດເຜີຍຂໍ້ມູນດີເດັ່ນປະເພດ 1 ແກ່ທະນາຄານການຄ້າຕ່າງປະເທດລາວມະຫາຊົນ; ບໍລິສັດຜະລິດ-ໄຟຟ້າລາວ ມະຫາ ຊົນ; ບໍລິສັດລາວເວີນມະຫາຊົນ; ບໍລິສັດສຸວັນນີ ໂຮມເຊັນເຕີມະຫາຊົນແລະບໍລິສັດມະຫະທຶນເຊົ່າສິນເຊື່ອມະຫາຊົນ, ຍ້ອງຍໍການເປີດເຜີຍຂໍ້ມູນດີເດັ່ນປະເພດ 2-3 ໃຫ້3 ບໍລິສັດ ຕາມລໍາດັບ ແລະຍ້ອງຍໍການເປີດເຜີຍຂໍ້ມູນແບບສະ ໝັກໃຈດີເດັ່ນ 1 ບໍລິສັດ, ການພິຈາລະນາມອບລາງວັນຖືເປັນຄັ້ງທຳອິດຂອງ ຕລຊລ ແລະເພື່ອເປັນປັດໄຈຊຸກຍູ້ໃຫ້ບໍລິສັດຈົດທະບຽນສືບຕໍ່ຮັກສາ ແລະຍົກສູງມູນເຊື້ອອັນດີງາມໃນການປະຕິບັດພັນທະບັດການເປີດເຜີຍຂໍ້ມູນ, ສຳລັບການຈັດພິທີມອບຮັບລາງວັນປະຈຳປີ 2020 ແລະຕໍ່ໆໄປ, ຕລຊລ ຈະໄດ້ຄັດເລືອກເອົາພຽງ 1 ຫຼື 2 ບໍລິສັດທີ່ສາມາດເປີດເຜີຍຂໍ້ມູນທີ່ໂດດເດັ່ນທີ່ສຸດມາເປັນຕົວແບບ ແລະ ໄດ້ຮັບລາງວັນອັນຊົງກຽດຂອງ ຕລຊລ.

  ທ່ານ ອ໊ອດ ພົນຊຽງດີ ຜູ້ອຳນວຍການໃຫຍ່ ຕລຊລ ໄດ້ກ່າວວ່າ: ການຈັດງານມອບ-ຮັບລາງວັນໃນມື້ນີ້ເປັນການເບີກທາງໄປສູ່ການມອບລາງວັນຂອງ ຕລຊລ (LSX Award 2020) ທີ່ຈະ ເປັນການສະຫຼຸບຕີລາຄາຄືນຜົນງານຂອງບັນດາບໍລິສັດຈົດທະບຽນ ແລະບໍລິສັດ ຫຼັກຊັບທີ່ຈະຈັດຂຶ້ນພາຍໃນງານສະເຫຼີມສະຫຼອງຄົບຮອບ 10 ປີ ຂອງຕລຊລ ແລະ ວຽກງານເປີດເຜີຍຂໍ້ມູນເປັນຫົວໃຈຫຼັກໜຶ່ງຂອງ ຕລຊລ ເພາະຂໍ້ມູນຂ່າວສານທີ່ປິ່ນອ້ອມ ແລະ ຕິດພັນກັບການເຄື່ອນໄຫວຂອງບໍລິສັດຈົດ ທະບຽນໃນ ຕລຊລ ບໍ່ວ່າຈະເປັນທີ່ມີມູນຄວາມຈິງ ຫຼືຂ່າວລືທີ່ເປັນຂໍ້ມູນດ້ານຕັ້ງໜ້າ ຫຼືດ້ານຫຍໍ້ທໍ້ກໍ່ລ້ວນແລ້ວແຕ່ມີຜົນຕໍ່ການຕັດສິນໃຈຂອງຜູ້ລົງທຶນທີ່ຈະສະທ້ອນໃຫ້ ເຫັນ ໂດຍຜ່ານການຊື້-ຂາຍ ແລະເປັນປັດໄຈກະທົບຕໍ່ລາຄາຕະຫຼາດໃນແຕ່ລະວັນໂດຍອີງຕາມອຸປະສົງ-ອຸປະທານຂອງຜູ້ລົງທຶນໃນແຕ່ລະໄລຍະ. ຫວັງວ່າທຸກທ່ານຈະມີຄວາມເຂົ້າໃຈ ແລະເອົາໃຈໃສ່ປະກອບສ່ວນຮ່ວມມືກັນຢ່າງໃກ້ຊິດເພື່ອເຮັດໃຫ້ສະພາບແວດລ້ອມການລົງທຶນໃນຮຸ້ນຢູ່ ຕລຊລ ມີທ່າກ້າວພັດທະນາສາມາດຍາດໄດ້ຜົນ ສຳເລັດໃໝ່ທີ່ໃຫຍ່ຫຼວງກວ່າເກົ່າໃນອະນາຄົດ.

_______________

ຂຽນໂດຍ: ຣັດສະໝີ ດວງສັດຈະ

ພາບ ແລະຂ່າວ: ໜັງສືພິມເສດຖະກິດ-ສັງຄົມ

แชร์