ໄຊທານີ ມີຄອບຄົວວັດທະນະທໍາ 32 ພັນກວ່າຄອບຄົວ

  ວຽກງານການສ້າງຄອບຄົວ ແລະບ້ານວັດທະນະທໍາຢູ່ເມືອງໄຊທານີ ນະຄອນຫຼວງວຽງຈັນ ນັບແຕ່ໄລຍະຜ່ານມາຈົນເຖິງປະຈຸບັນສາມາດປະຕິບັດໄດ້ທັງໝົດ 92 ບ້ານ ແລະ32 ພັນກວ່າຄອບຄົວ.

  ອີງຕາມຂໍ້ມູນຈາກຫ້ອງການຖະແຫຼງຂ່າວວັດທະນະທໍາ ແລະທ່ອງທ່ຽວເມືອງໄຊທານີໃຫ້ຮູ້ວ່າ: ເມືອງໄຊທານີ ມີທັງໝົດ 104 ບ້ານ, 43.535ຄອບຄົວ,ມີພົນລະ ເມືອງ 217.819 ຄົນ, ລວມມີ 19 ຊົນເຜົ່າ, ຊຶ່ງໃນໄລຍະຜ່ານມາຫ້ອງການ ຖວທ ເມືອງໄຊທານີໄດ້ເອົາໃຈໃສ່ຊຸກຍູ້ວຽກງານວັດທະນະທໍາຢ່າງເປັນປົກກະຕິໂດຍ ສະເພາະການສ້າງຄອບຄົວ-ບ້ານວັດທະນະທຳທັງໄດ້ກຳນົດເປົ້າໝາຍບ້ານເພື່ອສ້າງເປັນບ້ານວັດທະນະທຳໃໝ່,ບ້ານແບບຢ່າງທາງດ້ານວັດທະນະທຳ,ໂດຍໃນປີ 2019 ທົ່ວເມືອງສາມາດສ້າງບ້ານວັດທະນະທຳໄດ້ 12 ບ້ານທຽບໃສ່ປີ 2018 ເພີ່ມຂຶ້ນ 15%,ທຽບໃສ່ແຜນການປະຕິບັດໄດ້ 110%,ສ້າງຄອບຄົວວັດທະນະທຳໄດ້ 614 ຄອບຄົວ ທຽບໃສ່ປີ 2018 ເພີ່ມຂຶ້ນ 1,19% ທຽບໃສ່ແຜນ ການປະຕິບັດໄດ້ 87,71%;  ພ້ອມ ນີ້ຍັງໄດ້ອະນຸຍາດ ແລະຕໍ່ອະນຸຍາດ ດ້ານວັດທະນະທໍາຈໍານວນ 75 ຫົວໜ່ວຍ, ລົງຕິດຕາມກວດກາ ການຈັດງານບຸນປະເພນີ, ການສະແດງສີລະປະວັນນະຄະດີ ແລະກິດຈະກໍາຕ່າງໆພາຍໃນເມືອງ; ປະຈຸບັນທົ່ວເມືອງມີບ້ານວັດທະນະທໍາທັງຫມົດ 92 ບ້ານ ແລະຄອບຄົວວັດທະນະທໍາ 32.680 ຄອບຄົວ.

 ສໍາລັບທິດທາງ 5 ປີຕໍ່ໜ້າ, ເມືອງໄຊທານີ ຈະສືບຕໍ່ສ້າງບ້ານວັດທະນະທຳທີ່ຂັ້ນເທິງຮັບຮອງໃຫ້ສຳເລັດ, ສູ້ຊົນລົງຊຸກຍູ້ການສ້າງຄອບຄົວວັດທະນະທຳໃຫ້ໄດ້ 85% ຂຶ້ນໄປ ແລະບ້ານວັດທະນະທໍາໃຫ້ ສໍາເລັດ, ລົງຊຸກຍູ້ຕິດຕາມ-ກວດ ກາປະເມີນຜົນຄືນການສ້າງຄອບຄົວ, ບ້ານວັດທະນະທຳທີ່ປະກາດຮັບຮອງຜ່ານມາ, ເອົາໃຈໃສ່ຊຸກຍູ້ ການເຄື່ອນໄຫວດ້ານສີລະປະ-ວັນນະຄະດີ ໃຫ້ເປັນຂະບວນກວ້າງຂວາງ, ຈັດຕັ້ງງານບຸນປະເພນີເພື່ອສີມຂະຫຍາຍມູນເຊື້ອວັດທະນະທໍາຂອງແຕ່ລະບ້ານດ້ວຍການອະນຸລັກຮັກສາຮີດຄອງປະເພນີອັນດີງາມ.

-----------

ໜັງສືພິມເສດຖະກິດ-ສັງຄົມ

แชร์