ໂຮງຮຽນລ້ຽງເດັກອະນຸບານຄຳຮູ້ ສະຫຼອງວັນເດັກນ້ອຍສາກົນ ແລະວັນປູກຕົ້ນໄມ້ແຫ່ງຊາດ

   ວັນທີ 5 ມິຖຸນາ ຜ່ານມາທີ່ໂຮງຮຽນລ້ຽງເດັກອະນຸບານຄຳຮູ້ແຂວງຫຼວງນໍ້າທາ ໄດ້ເປີດພິທີສະເຫຼີມສະຫຼອງວັນເດັກນ້ອຍສາກົນ ແລະ ວັນປູກຕົ້ນໄມ້ແຫ່ງຊາດໂດຍ ການເປັນປະທານທ່ານ ອຸທອນມະນີວັນ ຮອງອຳນວຍການໂຮງຮຽນລ້ຽງເດັກອະນຸບານຄຳຮູ້ເຂົ້າຮ່ວມ ທ່ານ ບຸນຮ່ວມ ໂຈມບໍລິບູນຮອງ ຫົວໜ້າຫ້ອງການສຶກສາທິການ ແລະກີລາເມືອງ, ມີພໍ່ແມ່ຜູ້ປົກຄອງ ເດັກຄູ-ອາຈານຕະຫຼອດຮອດຫຼານນ້ອຍນັກຮຽນເຂົ້າຮ່ວມ.

  ໃນໂອກາດນີ້ກໍ່ໄດ້ຫວນຄືນປະຫວັດຄວາມເປັນມາຂອງວັນເດັກນ້ອຍສາກົນແມ່ນມີຄວາມຫມາຍຄວາມສຳຄັນທັງເປັນການປົກປ້ອງ ແລະສັນລະເສີນເດັກໃນທົ່ວໂລກ; ຍ້ອນເຫັນໄດ້ຄວາມສໍາຄັນຂອງເດັກທີ່ເປັນໜໍ່ແໜງແຫ່ງຊີວິດໃນມື້ນີ້ເພື່ອກາຍເປັນອະນາຄົດອັນແຈ່ມໃສຂອງປະເທດຊາດໃນມື້ຫນ້າ,ເພື່ອຮັບປະກັນການຢູ່ລອດ, ການພັດທະນາ, ການປົກປ້ອງ ແລະ ການມີສ່ວນຮ່ວມຂອງເດັກລາວບັນດາເຜົ່າໃຫ້ມີໄວເດັກທີ່ເຕັມໄປດ້ວຍຄວາມຜາສຸກ, ຄວາມອົບອຸ່ນ ແລະການດູແລເບິ່ງແຍງເປັນຢ່າງດີຈາກພໍ່-ແມ່, ຍາດຕິພີ່ນ້ອງ ໃນຄອບຄົວ, ສັງຄົມ ແລະການຈັດຕັ້ງທຸກຂັ້ນ, ນອກຈາກນັ້ນວັນເດັກສາກົນ (ວັນທີ 1 ມິຖຸນາ)ຍັງເປັນວັນທີ່ທຸກພາກສ່ວນກ່ຽວຂ້ອງໄດ້ເຮັດໜ້າທີ່ໃນການສຳຫຼວດກວດກາຄືນຄວາມຮັບຜິດຊອບຂອງຕົນໃນວຽກງານການເບິ່ງແຍງດູແລ ແລະການໃຫ້ບໍລິການຕໍ່ແມ່ ແລະ ເດັກໃນການປົກປ້ອງ ແລະ ປ້ອງ ກັນເດັກຈາກສິ່ງຫຍໍ້ທໍ້ ແລະໄພສັງຄົມທີ່ບໍ່ເພິ່ງປາດຖະໜາທັງຫຼາຍ,ທັງເປັນວັນທີ່ຕ້ອງໄດ້ຄຳນຶງເຖິງກຸ່ມເດັກທີ່ດ້ອຍໂອກາດເຊັ່ນວ່າ: ເດັກພິການ,ເດັກກຳພ້າກຳພອຍ, ເດັກທີ່ຖືກປະຖິ້ມ,ເດັກຂ້າງຖະໜົນ,ເດັກທີ່ຢູ່ໃນກຸ່ມສ່ຽງ, ເດັກຢູ່ເຂດທຸກຍາກ ແລະເຂດຫ່າງໄກສອກຫຼີກໃຫ້ໄດ້ຮັບຜົນປະໂຫຍດ ແລະການມີສ່ວນຮ່ວມຢ່າງເຕັມສ່ວນໃນທຸກກິດຈະກໍາການເຄື່ອນ ໄຫວປົກກະຕິຂອງເດັກໃນຂອບເຂດທົ່ວປະເທດເພື່ອຮັບປະກັນ ການພັດທະນາ ແລະການຂະຫຍາຍຕົວຢ່າງແຂງແຮງຕາມເສດຖະກິດຂອງຊາດ ແລະໄປທົ່ວເຖິງເດັກທຸກຄົນໃນສັງຄົມ.

  ໂຮງຮຽນລ້ຽງເດັກອະນຸບານ ຄຳຮູ້ມີຄູສອນທັງໝົດ 13 ຄົນ, ມີຫ້ອງລ້ຽງເດັກ 3 ຫ້ອງ, ຫ້ອງອະນຸບານ 3 ຫ້ອງ ແລະຫ້ອງ ປ1 ມີ 1 ຫ້ອງ, ຜູ້ປົກຄອງທ່ານໃດຫາກມີຄວາມສົນໃຈຢາກຈະນໍາເອົາລູກຫຼານຂອງທ່ານໄປຝາກຢູ່ທີ່ໂຮງຮຽນລ້ຽງເດັກອະນຸບານຄຳຮູ້ຕັ້ງຢູ່ບ້ານໄຊສົມບຸນ ແຂວງຫຼວງນໍ້າທາ ສາມາດເອົາມາຝາກໄດ້ເພາະທາງ ໂຮງຮຽນມີກິດຈະກໍາຫຼາຍຢ່າງໃນ ການພັດທະນາການຈະເລີນເຕີບໂຕຕາມໄວຂອງເດັກຢ່າງມີຄຸນນະພາບ .

  ໂອກາດດັ່ງກ່າວຍັງໄດ້ມອບໃບຍ້ອງຍໍໃຫ້ຄູ-ອາຈານຜູ້ທີ່ມີຜົນງານດີເດັ່ນ ແລະນ້ອງນັກຮຽນຜູ້ທີ່ຮຽນດີຮຽນເກັ່ງ ແລະຄຳຮູ້ເພື່່ອເປັນການຊຸກຍູ້ສົ່ງເສີມກຳລັງໃຈຂອງຄູ-ຈານກໍຄືນ້ອງນັກຮຽນໃຫ້ຫ້າວຫັນໃນການຊອກຮູ້ຮໍ່າຮຽນໃຫ້ດີຂຶ້ນກວ່າເກົ່າໃນພິທີຍັງມີການສະແດງສິລະປະ-ວັນນະຄະດີ, ຫຼິ້ນກິດຈະກໍາ ແລະ ປະກວດຊຸດປະຈໍາຊົນເຜົ່າຂອງນ້ອງນັກຮຽນຕື່ມອີກ.

--------------

ໂດຍ: ກິ່ນາລົມ

ພາບ ແລະຂ່າວ: ໜັງສືພິມເສດຖະກິດ-ສັງຄົມ

แชร์