ຍົກລະດັບການຢັ້ງຢືນມາດຕະຖານເຮືອນພັກແຮມປະຊາຊົນອາຊຽນຂັ້ນແຂວງຫຼວງພະບາງ

 ເພື່ອເຮັດໃຫ້ແຂວງຫຼວງພະບາງເປັນຈຸດໝາຍປາຍທາງໃນການພັກແຮມຂອງບັນດານັກທ່ອງທ່ຽວໃນທົ່ວໂລກທີ່ມາທ່ອງທ່ຽວຢູ່ ສປປ ລາວ ກໍຄືແຂວງຫຼວງພະບາງ ໂດຍເນັ້ນຂອດການບໍລິການໃຫ້ໄດ້ຕາມມາດຕະຖານຂອງອາຊຽນນັ້ນທາງກົມພັດທະນາການທ່ອງທ່ຽວ, ກະຊວງຖະແຫຼງຂ່າວ, ວັດທະນະທຳ ແລະທ່ອງທ່ຽວໄດ້ຈັດຊຸດອົບຮົມເພື່ອຍົກລະດັບຄະນະກຳມະການຄັດເລືອກ, ຮັບຮອງ, ຢັ້ງຢືນມາດຕະຖານ ແລະປະເມີນຜົນມາດຕະຖານເຮືອນພັກແຮມປະຊາຊົນອາຊຽນຂັ້ນແຂວງສໍາເລັດໃນວັນ ທີ 9 ມິຖຸນາ 2020 ນີ້.

  ຈຸດປະສົງຊຸດອົມຮົມຄັ້ງນີ້ຜູ້ເຂົ້າຮ່ວມແມ່ນໄດ້ຮຽນຮູ້ຫຼັກການ, ເງື່ອນໄຂ, ຂັ້ນຕອນ, ວິທີການປະເມີນ, ການຄິດໄລ່ ແລະສັງລວມຕໍ່ກັບມາດຕະຖານເງື່ອນໄຂຂອງບັນດາເຮືອນພັກແຮມປະຊາຊົນອາຊຽນຊຶ່ງປະກອບດ້ວຍການເປັນເຈົ້າພາບທີ່ດີ,ທີ່ພັກເຊົາຕ້ອງສະອາດປອດໄພ,ຕ້ອງມີກິດຈະກຳທ່ີເໝາະສົມ,ການບໍລິຫານຄຸ້ມຄອງ,ທີ່ຕັ້ງຕ້ອງເໝາະສົມ, ດ້ານສຸຂະອະນາໄມ ແລະຄວາມສະອາດ,ຄວາມປອດໄພ ແລະການຮັກສາຄວາມປອດໄພ,ການຕະຫຼາດ ແລະການໂຄສະນາ, ຫຼັກການໃນການພັດ ທະນາແບບຍືນຍົງ ແລະອື່ນໆ.      

  ສໍາລັບແຂວງຫຼວງພະບາງ ໄດ້ກຳນົດເອົາ 2 ບ້ານຄື: ບ້ານນາຍາງເໜືອເມືອງນໍ້າບາກ ແລະບ້ານຈ່ານ ເໜືອ ເມືອງຈອມເພັດ ເປັນຈຸດທົດລອງ, ພ້ອນີ້ແມ່ນໄດ້ເລືອກເອົາບ້ານຈ່ານເໜືອເປັນຈຸດລົງທົດລອງປະເມີນມາດຕະຖານເຮືອນພັກແຮມປະຊາຊົນອາຊຽນເພື່ອເປັນການໃຫ້ຄວາມຮູ້ແກ່ຄະນະກຳມະການຄັດເລືອກ,ຮັບຮອງ,ຢັ້ງຢືນມາດຕະຖານ ແລະປະເມີນຜົນມາດ ຕະຖານເຮືອນພັກແຮມປະຊາຊົນອາຊຽນຄວນປະຕິບັດແບບໃດ.

   ກອງປະຊຸມດັ່ງດ່າວໄດ້ຈັດຂຶ້ນໃນລະຫວ່າງວັນທີ 8-9 ມິຖຸນານີ້ ຈັດໂດຍກົມພັດທະນາການທ່ອງທ່ຽວ, ກະຊວງຖະແຫຼງຂ່າວ, ວັດທະນະທຳ ແລະທ່ອງທ່ຽວຮ່ວມກັບພະແນກ ຖວທ ແຂວງຫຼວງພະບາງ ໂດຍການເຂົ້າຮ່ວມຂອງທ່ານ ນາງ ສຸດາພອນ ຄົມທະວົງ ຫົວໜ້າພະແນກ ຖວທ ແຂວງ, ທ່ານ ອາລຸນ ບຸນມີໄຊ ຫົວໜ້າກົມພັດທະນາການທ່ອງທ່ຽວກະຊວງ ຖວທ, ມີຄູຝຶກຈາກກະຊວງ ຖວທ ແລະຄະນະກຳມະການຄັດເລືອກຂັ້ນແຂວງເຂົ້າຮ່ວມ.

____________

ໂດຍ: ສີສຸວັນ

แชร์