ບົວລະພາຮ່ວມເມືອງເຟືອງຈັດກິດຈະກຳປູກຕົ້ນໄມ້

   ບໍ່ດົນຜ່ານມານີ້ບໍລິສັດບົວລະພາກະສິກໍາປ່າໄມ້ຈໍາກັດຮ່ວມກັບອໍານາດປົກຄອງເມືອງເຟືອງແຂວງວຽງຈັນ ແລະ ພໍ່ແມ່ປະຊາຊົນໄດ້ຈັດກິດຈະກໍາປູກຕົ້ນໄມ້ຈໍານວນ 1 ພັນເບ້ຍ ໃນໂອກາດວັນທີ 1 ມິຖຸນາ 2020 ທີ່ໂຮງຮຽນ ມສ ເມືອງເຟືອງ ເພື່ອສ້າງຂະບວນການຮັກສາສິ່ງແວດລ້ອມ.

  ເຂົ້າຮ່ວມໃນພິທີມີ ທ່ານ ຄໍາເພັດ ຈັນສົມພູ ເຈົ້າເມືອງໆເຟືອງ, ທ່ານ ຊູຊາດ ໄຊຍະກຸມມານ ຫົວໜ້າກົມປ່າໄມ້ທ່ານ ນາງ ສຸໄພວັນ ທ່ຽງຈັນໄຊ ຮອງອໍານວຍການບໍ ລິສັດບົວລະພາກະສິກໍາປ່າໄມ້ຈໍາກັດພ້ອມດ້ວຍເຈົ້າໜ້າທີ່ກ່ຽວຂ້ອງຕະຫຼອດຮອດພໍ່ແມ່ປະຊາຊົນ ແລະນັກຮຽນເຂົ້າຮ່ວມ.

  ທ່ານ ຄໍາເພັດ ຈັນສົມພູ ກ່າວວ່າ: ກິດຈະກໍາຄັ້ງນີ້ເພື່ອຈັດຕັ້ງປະຕິບັດກົດໝາຍປ່າໄມ້ທີ່ລັດຖະບານວາງໄວ້ການປູກຕົ້ນໄມ້ບໍ່ສະເພາະແຕ່ປູກໃນວັນທີ 1 ມິຖຸນາ ເທົ່ານັ້ນຄວນສືບຕໍ່ປູກໄປເລື້ອຍໆ ຈົນໝົດລະດູຝົນສໍາລັບເມືອງເຟືອງໄດ້ພ້ອມກັນຈັດຕັ້ງປະຕິບັດເພື່ອສົ່ງເສີມຂະຫຍາຍເນື້ອທີ່ປ່າໄມ້ຄືນໃໝ່ຢູ່ເຂດທ້ອງຖິ່ນໃຫ້ມີຄວາມສົມ ບູນ ແລະດຸນດ່ຽງເພື່ອຮັບປະກັນຕອບສະໜອງວັດຖຸດິບປ້ອນໂຮງງານອຸດສາຫະກຳປຸງແຕ່ງ ແລະເປັນສິນຄ້າສົ່ງອອກ.

  ທ່ານ ນາງ ສຸໄພວັນ ທ່ຽງຈັນໄຊ ກ່າວວ່າ: ການປູກໄມ້ໃນຄັ້ງນີ້ມີຈໍານວນ 1 ພັນເບ້ຍ ຊຶ່ງເປັນຈຸດປະສົງຂອງບໍລິສັດໃນການປະກອບສ່ວນເພື່ອເຮັດໃຫ້ເປົ້າໝາຍການປົກຫຸ້ມປ່າໄມ້ຂອງລັດ ຖະບານໄດ້ 70% ແຜນການຂອງບໍລິ ສັດບໍລິສັດບົວລະພາວາງເປົ້າປູກໄມ້ໃນ ເນື້ອທີ 60 ພັນເຮັກຕາ ເພື່ອປ້ອນໂຮງງານປຸງແຕ່ງໄມ້ຫຼັງທີ 1 ຢູ່ເມືອງໄຊທານີ, ປ້ອນໂຮງຫຼັງທີ 2 ຊຶ່ງເປັນໂຮງງານໄມ້ອັດຢູ່ເມືອງຫີນເຫີບຊຶ່ງພວມກໍ່ສ້າງຄາດວ່າກາງປີ 2021 ຈະສໍາເລັດບໍ່ພຽງເທົ່ານັ້ນບໍລິສັດຍັງມີແຜນສ້າງໂຮງງານອຸດສາຫະກຳລະລາຍເຍື່ອໄມ້ເພື່ອມາຜະລິດເປັນແຜ່ນແພ, ເຫຼົ້າ 90 ແລະ ຈະໄດ້ຜະລິດຕະພັນຫຼາກຫຼາຍຢ່າງຈາກໂຮງງານອຸດສາຫະກໍາຫຼັງຕໍ່ໄປນີ້ຖ້າວັດຖຸດິບພຽງພໍກໍ່ຈະເລີ່ມສ້າງຕັ້ງ.

  ທ່ານກ່າວວ່າ: ໃນປີ 2018 ບໍລິສັດຮ່ວມມືກັບທີມງານຈາກກະຊວງກະສິກໍາ ແລະປ່າໄມ້, ພະແນກກະສິກໍາແຂວງວຽງຈັນພ້ອມກັນສໍາຫຼວດປ່າຊຸດໂຊມຂອງແຂວງໄດ້ທັງໝົດ 7.809 ເຮັກຕາ ໂດຍໃຊ້ທຶນຂອງບໍລິສັດຢູ່ໃນເມືອງເຟືອງ ມີ 3.729 ເຮັກຕາຢູ່ໃນ 5 ບ້ານເຊັ່ນ: ບ້ານຫ້ວຍເດື່ອ, ບ້ານນາລັງ, ບ້ານນໍ້າໄຮ, ບ້ານໂພນຫີນແຮ່ ແລະບ້ານແສນໄຊ ໃນເດືອນເມສາ 2019 ລັດຖະບານອະນຸຍາດໃຫ້ບໍລິສັດທົດລອງປູກກ່ອນ 2 ພັນເຮັກຕາ ໃນນີ້ຢູ່ເມືອງເຟືອງ  266 ເຮັກຕາ,ຊຶ່ງຈະໃຫ້ສໍາເລັດປູກໃນທ້າຍເດືອນສິງຫາທີ່ຈະມາເຖິງ.

  ຜ່ານການເຄື່ອນໄຫວຕົວຈິງໃນການກະກຽມພື້ນທີ່ເຫັນວ່າຕ່າງຝ່າຍຕ່າງໄດ້ຮັບຜົນປະໂຫຍດ ແລະໄດ້ນໍາເອົາຜົນປະໂຫຍດມາສູ່ປະຊາຊົນ ແລະປະຊາຊົນສ່ວນຫຼາຍມີຄວາມສົນໃຈດີໃຈທີ່ຕົນເອງ ແລະຄອບຄົວໄດ້ມີໂອກາດໃນການພັດທະນາຄືແນວນີ້.

แชร์