ແຂວງວຽງຈັນ ເລັ່ງແກ້ໄຂຂໍ້ຂັດແຍ່ງເລື່ອງທີ່ດິນ ແລະໂຄງການເຊົ່າສຳປະທານ

  ຕະຫຼອດໄລຍະຜ່ານມາພະແນກຊັບພະຍາກອນທຳມະຊາດແລະສິ່ງແວດລ້ອມ ແຂວງວຽງຈັນໄດ້ເອົາໃຈໃສ່ໃນການຈັດຕັ້ງປະຕິບັດວຽກງານຂອງຕົນຢ່າງຕໍ່ເນື່ອງ ແລະມີຜົນສຳເລັດໂດຍສະເພາະການຈັດສັນທີ່ດິນ, ການເກັບກຳຂໍ້ ມູນທີ່ດິນ, ການອອກໃບຕາດິນ ແລະ ອື່ນໆຄຽງຄູ່ນັ້ນກໍຍັງມີຫຼາຍບັນຫາທີ່ຈະໄດ້ສືບຕໍ່ແກ້ໄຂເປັນຕົ້ນການຄຸ້ມຄອງທີ່ດິນໂຄງການເຊົ່າສຳປະທານ, ການອອກໃບຕາດິນ, ຂໍ້ຂັດແຍ່ງເລື່ອງທີ່ດິນ, ການຫັນປ່ຽນປະເພດດິນ, ການປ່ຽນຊື່ ແລະການລັກໂອນກຳມະສິດຊຶ່ງເຮັດໃຫ້ມີໃບຕາດິນຊໍ້າຊ້ອນ ແລະບັນຫາອື່ນໆ.

  ທ່ານ ກອງຄຳ ອິນໄພຍະລາດ ຫົວໜ້າພະແນກຊັບພະຍາກອນທຳມະຊາດ ແລະສິ່ງແວດລ້ອມແຂວງວຽງຈັນໃຫ້ສຳພາດວ່າ: ໃນໄລຍະຜ່ານມາແມ່ນໄດ້ເອົາໃຈໃສ່ປະຕິບັດແຜນການ 5 ປີ ຂອງ ແຂວງວຽງຈັນ ຊຶ່ງປີນີ້ແມ່ນປີມ້ວນທ້າຍຂອງແຜນການສຳລັບການອອກໃບຕາດິນແຜນແມ່ນ 30 ພັນຕອນ ມາຮອດທ້າຍປີຜ່ານມາປະຕິບັດໄດ້ 21 ພັນກວ່າ ຕອນສະເພາະປີ 2019 ປະຕິບັດໄດ້ 8.747 ຕອນ ເທົ່າກັບ 125% ສ້າງລາຍຮັບໄດ້ເກີນແຜນ 100 ລ້ານກວ່າກີບ, ຮອດປະຈຸບັນທົ່ວແຂວງໄດ້ອອກໃບຕາດິນແລ້ວ 1,14 ແສນຕອນ ໃນນັ້ນມີດິນປຸກສ້າງ ແລະດິນກະສິກຳ, ມີໃບແຈ້ງເສຍພາສີທີ່ດິນທັງໝົດ 2,25 ແສນຕອນ.

 ສຳລັບວຽກຈັດສັນທີ່ດິນແມ່ນໄດ້ສຸມໃສ່ຢູ່ 3 ເມືອງຄື: ເມືອງວັງວຽງ, ກາສີ ແລະເມືອງເຟືອງແມ່ນໄດ້ສຳເລັດການເກັບກຳຂໍ້ມູນ, ສ່ວນການຄຸ້ມຄອງດິນລັດໃນປະຈຸບັນທົ່ວແຂວງມີ 3.600 ກວ່າຕອນລວມມີດິນປຸກສ້າງແລະດິນກະສິກຳ, ດ້ານການເຊົ່າສຳປະທານຕາມບັນຊີທີ່ໄດ້ຄຸ້ມຄອງໃນໄລຍະຜ່ານມາມີ 69 ໂຄງການແຕ່ໃນປີ 2018 ໄດ້ມອບວຽກໃຫ້ກັບພະແນກການເງິນເພື່ອຄຸ້ມຄອງທາງດ້ານສັນຍາ, ໂດຍລວມແລ້ວວຽກເຊົ່າສຳປະທານເປັນວຽກໜຶ່ງທີ່ສັບສົນໂດຍໄດ້ມີຫຼາຍໂຄງການທີ່ມີບັນຫາບາງໂຄງການມີແຕ່ຊື່, ມີຕົວຕົນແຕ່ບໍ່ເຄື່ອນໄຫວສະເພາະແຂວງວຽງຈັນມີເຖິງ 90 ກວ່າໂຄງການ.

 ທ່ານກອງຄຳອິນໄພຍະລາດກ່າວຕື່ມວ່າ: ສຳລັບການແກ້ໄຂຂໍ້ຂັດແຍ່ງເລື່ອງທີ່ດິນພວກເຮົາກໍໄດ້ລົງໄປສົມທົບກັບພະແນກຍຸຕິທຳເພື່ອແກ້ໄຂກ່ຽວກັບໃບຕາດິນເສຍຫາຍ, ເຮັດສຳເນົາຄືນໃໝ່ ແລະອື່ນໆໄດ້ແກ້ໄຂມີ 126 ຕອນ, ລົງແກ້ໄຂເຂດແດນ 35 ຕອນ, ເຂົ້າຮ່ວມປະຕິບັດຄຳຕັດສິນຂອງສານ 18 ຕອນ, ຊຶ່ງຜ່ານການຈັດຕັ້ງປະຕິ ບັດໃນໄລຍະຜ່ານມາແມ່ນຍັງມີຄວາມຫຍຸ້ງຍາກຫຼາຍຢ່າງແນວໃດກໍດີທາງພະແນກຈະສືບຕໍ່ເອົາໃສ່ຕື່ມໂດຍສະເພາະຈະເລັ່ງໃສ່ການແກ້ໄຂຂໍ້ຂັດແຍ່ງເລື່ອງທີ່ດິນ, ການຫັນປ່ຽນປະເພດດິນ, ການປ່ຽນຊື່, ການຈຳເງິນ, ລັກໂອນກຳມະສິດ, ໃບຕາດິນຊໍ້າຊ້ອນ, ດິນກະສິກຳເປັນດິນບໍລິການ ແລະປຸກສ້າງໂດຍສະເພາະດິນຕອນທີ່ຢູ່ໃກ້ໂຄງ ການພັດທະນາຕ່າງຊຶ່ງນີ້ແມ່ນວຽກໜຶ່ງທີ່ຈະໄດ້ສຸມໃສ່ໃນຕໍ່ໜ້າ.

____________

ຂຽນໂດຍ: ແຂວງວຽງຈັນ

ພາບ ແລະຂ່າວ: ໜັງສືພິມເສດຖະກິດ-ສັງຄົມ

แชร์