ເຈົ້າໜ້າທີ່ຕຳຫຼວດນະຄອນໄກສອນ ພົມວິຫານ (ໜ່ວຍງານຄະດີອາຍາ) ໄດ້ມ້າງຄະດີແກັ້ງລັກລົດຈັກພ້ອມທັງຊີງຊັບພົນລະເມືອງ (ດຶງກະເປົ໋າ), ສາມາດຈັບຕົວໄດ້ແລ້ວ 5 ຄົນ, ໃນນັ້ນພວກກ່ຽວໄດ້ຮັບສາລະພາບວ່າ: ໄດ້ຕະເວນລັກລົດຈັກ 22 ຄັ້ງ, ໄດ້ລົດຈັກ 21 ຄັນ, ນອກນັ້ນຍັງໄດ້ຮ່ວມກັນຊີງຊັບ (ດຶງກະເປົ໋າ) ຈຳນວນ 6 ຄັ້ງ, ໄດ້ໂທລະສັບມືຖື 5 ເຄື່ອງ, ແທັບເລັດ 1 ເຄື່ອງ, ເງິນສົດ 2,18ກີບ.

   ເຫດການເກີດຂຶ້ນແຕ່ເດືອນມັງກອນ ແລະເດືອນກຸມພາ ປີ 2020 ໄດ້ມີຜູ້ເສຍຫາຍມາແຈ້ງຄວາມໄວ້ວ່າ: ມີລົດຈັກເສຍຢູ່ຫຼາຍບ່ອນເປັນຕົ້ນ: ຢູ່ຫ້ອງເຊົ່າເຂດຕະ ຫຼາດຫຼັກ 8, ຫ້ອງເຊົ່າເຂດບ້ານໜອງຜື, ລົດເສຍຢູ່ແຖວຫຼັງຮ້ານອາຫານດາວຮຸ່ງສອງ, ຈາກນັ້ນກໍ່ມາລັກຢູ່ຫ້ອງເຊົ່າແຖວຕະຫຼາດຫຼັກ 8 ແລະລັກຢູ່ເຮືອນປະຊາຊົນທາງໄປຂົວມິດຕະພາບ, ນອກນັ້ນຍັງມີບ່ອນອື່ນໆອີກ, ນອກຈາກລັກລົດແລ້ວພວກກ່ຽວຍັງໄດ້ຮ່ວມກັນຊີງຊັບ (ດຶງກະເປົ໋າ) ນຳອີກເປັນຕົ້ນ: ດຶງກະເປົ໋າແມ່ຍິງທີ່ຍ່າງອອກກຳລັງກາຍຢູ່ແຖວເສັ້ນ A1 ທາງເຂົ້າສະໜາມບິນ, ດຶງກະເປົ໋າຄົນທີ່ນັ່ງຂາຍເລກຢູ່ແຄມທາງເສັ້ນ A1 ແຖວອານຸສາວະລີປະທານໄກສອນ ພົມວິຫານ, ຈາກນັ້ນ ຍັງໄດ້ພາກັນໄປດຶງກະເປົ໋າຢູ່ເສັ້ນທາງແຄມຂອງຕໍ່ໜ້າໂຮງຮຽນວິທະຍາສາດສຸຂະພາບ(ໂຮງຮຽນແພດ) ແລະດຶງກະເປົ໋າແຖວຫ້ວຍລົງກົງນຳອີກ.

 ພາຍຫຼັງໄດ້ຮັບແຈ້ງຄວາມຈາກຜູ້ຖືກເສຍຫາຍແລ້ວ, ເຈົ້າໜ້າທີ່ໜ່ວຍງານສືບຂ່າວຄະດີອາຍາ ປກສ ນະຄອນໄກສອນ ພົມວິຫານ ໄດ້ສົມທົບກັບພາກສ່ວນທີ່ກ່ຽວຂ້ອງລົງຄັດຈ້ອນເປົ້າໝາຍແລ້ວຂຶ້ນບັນຊີຈຶ່ງສາມາດຮູ້ຕົວຜູ້ກໍ່ເຫດ, ດັ່ງນັ້ນມາໃນວັນທີ 3 ມີນາ 2020 ຈຶ່ງສາມາດກັກຕົວພວກກ່ຽວໄດ້ຈຳນວນ 5 ຄົນ, ຊຶ່ງປະກອບດ້ວຍ: 1/ ທ້າວ ໄຊຍະເວດ (ເປີ້ນ) ອາຍຸ 22 ປີ, ຢູ່ບ້ານສະພານເໜືອ ຊຶ່ງຜູ້ກ່ຽວເປັນຫົວໜ້າແກັ້ງ, ຊຶ່ງເຄີຍເຂົ້າຄຸກຄະດີລັກຊັບມາແລ້ວ, ພໍພົ້ນໂທດອອກມາກໍ່ມາເຮັດຄື ເກົ່າ. 2/ ທ້າວ ສາຍ (ແບັກ) ອາຍຸ 35 ປີ, ບ້ານສະພານເໜືອ, 3/ ທ້າວ ເພັດ ສະໝອນ (ຕ່າຍ) ອາຍຸ 19 ປີ, ບ້ານ ໂພນສະອາດ, 4/ ທ້າວ ແສງດາລາ (ໂຈ້ນ) ອາຍຸ 22 ປີ,ບ້ານດົງດຳດວນ, 5/ ທ້າວ ວັນນາ (ສຸ່ຍ) ອາຍຸ 19 ປີ, ບ້ານດົງດຳດວນ (ທັງ 5 ຄົນ ເປັນຄົນຢູ່ນະຄອນໄກສອນ ພົມວິຫານ ແຂວງສະຫວັນນະເຂດ).

   ຜ່ານການສອບສວນຂອງເຈົ້າໜ້າທີ່ທັງ 5 ຄົນ ໄດ້ຮັບສາລະພາບວ່າ: ໄດ້ຮ່ວມກັນລັກຊັບ ແລະຊີງຊັບຂອງພົນລະເມືອງແທ້. ດັ່ງນັ້ນ, ທາງເຈົ້າໜ້າທີ່ຈຶ່ງໄດ້ດຳເນີນຄະດີຕໍ່ພວກກ່ຽວໃນຂໍ້ຫາຮ່ວມກັນລັກຊັບ ແລະຊີງຊັບພົນລະເມືອງ.

  ຖ້າຜູ້ໃດຖືກເສຍຫາຍໃຫ້ນຳເອົາຫຼັກຖານເຂົ້າພົວພັນນຳເຈົ້າໜ້າທີ່ ປກສ ນະຄອນໄກສອນ ພົມວິຫານ,ໃນຂະນະນີ້,ກຳລັງຕິດຕາມນຳເອົາຂອງກາງຄະດີທີ່ພວກກ່ຽວຊີງໄປນັ້ນກັບມາຄືນເຈົ້າຂອງ.

แชร์