ພະຍາດໝາກແດງລະບາດໃນຟິລິບປິນເສຍຊີວິດ 26 ຄົນ

ສະຖານະການການແພ່ລະບາດຂອງພະຍາດໝາກແດງກຳລັງຮຸນແຮງໃນຟິລິບປິນ ໂດຍມີຜູ້ເສຍຊີວິດແລ້ວ 26 ຄົນສະເພາະເດືອນມັງກອນພຽງເດືອນດຽວ.

 ຕາມຂ່າວຕ່າງປະເທດລາຍງານໃນທ້າຍອາທິດທີ່ຜ່ານມາວ່າກະຊວງສາທາລະນະສຸກຂອງຟິລິບປິນອອກຖະແຫຼງການວ່າພົບຜູ້ເສຍຊີວິດຈາກພະຍາດໝາກແດງຢ່າງໜ້ອຍ 26 ຄົນ ສະເພາະໃນເດືອນມັງກອນທີ່ຜ່ານມາຂະນະທີ່ຈຳນວນຜູ້ຕິດເຊື້ອພະຍາດດັ່ງກ່າວເພີ່ມຂຶ້ນຈາກ 791 ຄົນ ໃນປີ 2017 ເປັນ 5.120 ຄົນ ໃນປີທີ່ຜ່ານມາແຕ່ສະຖິຕິຕິດເຊື້ອສະເພາະເດືອນມັງກອນທີ່ຜ່ານມາຢູ່ທີ່ 1.813 ຄົນ ແລະເສຍຊີວິດແລ້ວ 26 ຄົນ ຊຶ່ງພື້ນທີ່ທີ່ອັນຕະລາຍທີ່ສຸດຄືນະຄອນຫຼວງມະນີລາຊຶ່ງພົບຜູ້ຕິດເຊື້ອພະຍາດຫຼາຍທີ່ສຸດ, ຢ່າງໃດກໍຕາມສິ່ງທີ່ໜ້າເປັນຫ່ວງທີ່ສຸດຄືຜູ້ຕິດເຊື້ອແລະຜູ້ເສຍຊີວິດສ່ວນໃຫຍ່ເປັນເດັກນ້ອຍ ຕາມການລາຍງານຫຼ້າສຸດຂອງລັດຖະບານຟິລິບປິນພົບວ່າຍັງມີເດັກນ້ອຍຫຼາຍກວ່າ 2,4 ລ້ານຄົນ ຍັງ ບໍ່ທັນໄດ້ຮັບວັກແຊງ.

  ທັງນີ້ພະຍາດໝາກແດງເປັນພະຍາດທີ່ຕິດຕໍ່ກັນໄດ້ງ່າຍເນື່ອງຈາກແພ່ກະຈາຍໄດ້ຜ່ານມາທາງອາກາດຈາກການໄອ ແລະ ຈາມຕະຫຼອດກັບການສຳພັດນໍ້າລາຍ ຫຼື ຂີ້ມູກຂອງຄົນເຈັບເບື້ອງຕົ້ນຜູ້ຕິດເຊື້ອຈະມີອາການໄຂ້,ຖ້າຫາກບໍ່ໄດ້ຮັບການຮັກສາຢ່າງຖືກຕ້ອງຫຼາຍກວ່າ 1 ອາທິດອາດເກີດພາວະແຊກຊ້ອນທີ່ລວມເຖິງສະໝອງອັກເສບ, ປອດອັກເສບ ແລະ ຕາບອດ.

แชร์