ກອງປະຊຸມທາງໄກ ເຈົ້າໜ້າທີ່ອາວຸໂສຂອບການຮ່ວມມື ແມ່ນໍ້າຂອງ-ຍີ່ປຸ່ນ ວັນທີ 10 ມິຖຸນາ 2020, ທີ່ ກະຊວງການຕ່າງປະເທດ

  ໃນວັນທີ 10 ມິຖຸນາ 2020, ເວລາ 11:30-13:30ໂມງ, ທີ່ ກະຊວງການຕ່າງປະເທດ, ທ່ານ ກິ່ງໂພແກ້ວ ພົມມະຫາໄຊ ຮັກສາການຫົວໜ້າກົມເສດຖະກິດ, ກະຊວງການຕ່າງປະເທດໃນນາມຫົວໜ້າເຈົ້າໜ້າທີ່ອາວຸໂສຂອບການຮ່ວມມືແມ່ນໍ້າຂອງ-ຍີ່ປຸ່ນ ຂອງ ສປປ ລາວ ໄດ້ເຂົ້າຮ່ວມກອງປະຊຸມທາງໄກເຈົ້າໜ້າທີ່ອາວຸໂສແມ່ ນໍ້າຂອງ-ຍີ່ປຸ່ນ, ໂດຍການເປັນປະທານຮ່ວມຂອງ ທ່ານ Kenichi KOBAYASHI, ຮອງຫົວໜ້າກົມວຽກງານອາຊີ ແລະ ໂອເຊອານີ, ກະຊວງການຕ່າງປະເທດຍີ່ປຸ່ນ ແລະທ່ານ Nguyen Van Thao, ຜູ້ຊ່ວຍລັດຖະມົນຕີ, ຫົວໜ້າກົມເສດຖະກິດ,ກະຊວງການຕ່າງປະເທດຫວຽດນາມ ແລະມີບັນດາເຈົ້າໜ້າທີ່ອາວຸໂສຈາກປະເທດສະມາຊິກອື່ນເຂົ້າຮ່ວມຢ່າງພ້ອມພຽງ.

  ​ກອງປະຊຸມ ໄດ້ທົບທວນຄວາມຄືບໜ້າໃນການຮ່ວມມືໄລຍະຜ່ານມາພ້ອມທັງໄດ້ປຶກສາຫາລືກັນກ່ຽວກັບ ການກະກຽມທາງດ້ານພາລາທິການ ແລະດ້ານເນື້ອໃນໃຫ້ແກ່ກອງປະຊຸມລັດຖະມົນຕີຕ່າງປະເທດແມ່ນໍ້າຂອງ-ຍີ່ປຸ່ນຄັ້ງທີ 13, ເຊິ່ງຍີ່ປຸ່ນ ໄດ້ສະເໜີຈັດກອງປະຊຸມດັ່ງກ່າວຂຶ້ນໃນຕົ້ນເດືອນກໍລະກົດ 2020 ທີ່ ໂຕກຽວ,​ ປະ ເທດຍີ່ປຸ່ນ.

  ພ້ອມດຽວກັນນັ້ນ, ກອງປະຊຸມກໍປຶກສາຫາລືກັນກ່ຽວກັບຮ່າງເອກະສານທີ່ຄາດວ່າຈະຮັບຮອງເອົາໃນກອງປະຊຸມລັດຖະມົນຕີຕ່າງປະເທດແມ່ນໍ້າຂອງ-ຍີ່ປຸ່ນ ຄັ້ງທີ 13 ຈໍານວນ 2 ສະບັບຄື: (1) ຮ່າງຖະແຫລງການຮ່ວມກອງປະຊຸມລັດຖະມົນຕີຕ່າງປະເທດແມ່ນໍ້າຂອງ-ຍີ່ປຸ່ນ ຄັ້ງທີ 13 (Joint Statement of the 13thMekong-Japan Foreign Ministers’ Meeting) ແລະ (2) ຮ່າງເອກະສານການຮ່ວມມືແມ່ຂອງ-ຍີ່ປຸ່ນ ເພື່ອບັນລຸການປະກັນສຸຂະພາບທຸກຖ້ວນໜ້າ ແລະເສີມສ້າງຄວາມສຳພັນດ້ານເສດຖະກິດ (Mekong-Japan Cooperation for achieving UHC and integral strengthening of Economic relations) ອີກດ້ວຍ.ກອງປະຊຸມທາງໄກເຈົ້າໜ້າທີ່ອາວຸໂສແມ່ນໍ້າຂອງ-ຍີ່ປຸ່ນ ຄັ້ງນີ້ ໄດ້ດຳເນີນ ແລະ ຈົບລົງດ້ວຍບັນຍາກາດອັນດີ ແລະ ແຕ່ລະປະເທດກໍ່ໄດ້ປະກອບຄຳເຫັນຮ່ວມກັນຢ່າງກົງໄປກົງມາ.

_____________

ພາບ ແລະຂ່າວ: ໜັງສືພິມເສດຖະກິດ-ສັງຄົມ

แชร์