ການຂະຫຍາຍພັນ ໄມ້ໃຫ້ໝາກ

  ການຂະຫຍາຍພັນໄມ້ໃຫ້ໝາກຄືການເພີ່ມຈໍານວນຕົ້ນໃຫ້ຫຼາຍຂຶ້ນ ແລະຍັງຄົງຮັກສາລັກສະນະຄຸນສົມບັດຄຸນນະພາບຂອງພືດໄວ້ຈໍາໜ່າຍປູກທົດແທນ ຫຼືປັບປຸງພັນໃຫ້ມີລັກສະນະທີ່ດີຂຶ້ນ.

  ການໂທມງ່າ: ການໂທມງ່າຄືການເຮັດໃຫ້ງ່າ ຫຼື ຕົ້ນເກີດຮາກຢູ່ກັບຕົ້ນແມ່ຈະເຮັດໃຫ້ພືດໃໝ່ທີ່ມີລັກສະນະທາງສາຍພັນຄືກັບຕົ້ນແມ່ທຸກປະການຂັ້ນຕອນເຮັດດັ່ງນີ້: 1) ເລືອກງ່າ ງ່າແກ່ງ່າອ່ອນ (ກໍາລັງຈະປ່ຽນເປັນ ສີນໍ້າຕານ) ປາສະຈາກໂລກ-ແມງໄມ້ລົບກວນ.2) ປາດງ່າລອກເອົາເປືອກອອກຍາວປະມານ 2-3 ຊັງຕີແມັດ ແລ້ວຂູດເອົາເຍື່ອທີ່ເປັນເມືອກອອກ. 3) ເອົາຖົງຢາງທີ່ໃສ່ຟອຍໝາກພາວ (ຟອຍໝາກພາວແຊ່ນໍ້າ 48 ຊົ່ວໂມງ ແລ້ວບີບໝາດໆຢັດລົງໃນຖົງຢາງມັດປາກຖົງໃຫ້ແໜ້ນ) ມາຜ່າຕາມຄວາມຍາວແລ້ວໄປຫຸ້ມຮອຍແຜຂອງງ່າຕອນມັດດ້ວຍເຊືອກທາງເທິງ ແລະ ທາງລຸ່ມຮອຍແຜ. 4) ເມື່ອງ່າຕອນມີຮາກງອກອອກມາ ແລະ ລີ່ມແກ່ເປັນສີເຫຼືອງ-ສີນໍ້າຕານປາຍຮາກມີສີຂຽວ ແລະມີຈໍານວນຫຼາຍພໍຈຶ່ງຕັດງ່າຕອນອອກໄປໄດ້. 5) ນໍາງ່າຕອນໄປຊໍາໃນຖັງ ຫຼືຖົງຢາງເພື່ອລໍການປູກຕໍ່ໄປ

  ອີງຕາມຂໍ້ມູນຈາກສູນພັດທະນາ ແລະບໍລິການດ້ານການກະເສດຫ້ວຍຊອນ-ຫ້ວຍຊົ້ວໃຫ້ຮູ້ວ່າ: ການຂະຫຍາຍພັນໄມ້ໃຫ້ໝາກລວມມີຂັ້ນຕອນດັ່ງນີ້: ການທາບງ່າ: ການທາບງ່າ ຄືການນໍາເອົາພືດ 2 ຕົ້ນມາທາບເປັນ ຕົ້ນ ດຽວກັນໂດຍສ່ວນຂອງຕົ້ນຕໍທີ່ນໍາເອົາທາບກິ່ງຈະມີໜ້າທີ່ເປັນລະບົບຮາກນໍາອາຫານໃຫ້ກັບຕົ້ນພັນດີ ໂດຍມີ ຂັ້ນຕອນດັ່ງນີ: 1) ເລືອກງ່າແກ່ ຫຼື ງ່າອ່ອນ(ກໍາລັງຈະປ່ຽນເປັນສີນໍ້າຕານ) ທີ່ສົມບູນປາສະຈາກໂລກ-ແມງໄມ້. 2) ປາດກິ່ງພັນເປັນຮູບໂລຍາວປະມານ 1 ຫາ 2 ນິ້ວ. 3) ຕັດຕົ້ນຕໍໃຫ້ເປັນຮູບປາກປາສະຫຼາມ. 4) ປະກົບແຜຕົ້ນຕໍເຂົ້າກັບກິ່ງພັນດີ ແລະພັນດ້ວຍພະລັດສະຕິກ (ເທບຄຽນ) ໃຫ້ແໜ້ນແລ້ວມັດຕົ້ນຕໍກັບກິ່ງພັນດ້ວຍເຊືອກ ຫຼື ລວດ. 5) ປະມານ 6 ຫາ 7 ອາທິດແຜຈະຕິດກັນດີຮາກຕົ້ນຕໍຈະງອກແທງຜ່ານຟອຍໝາກພາວ ແລະເລີ່ມມີສີນໍ້າຕານປາຍຮາກມີສີຂາວ ແລະມີຈໍານວນຫຼາຍພໍຈຶ່ງຕັດໄປຊໍາໄດ້. 6) ໃສ່ລົງໃນຖັງກ້າເບ້ຍພ້ອມປັກລັກຄໍ້າເພື່ອປ້ອງກັນຕົ້ນລົ້ມ.

  ການຕິດຕາ: ຄືການເຊື່ອມປະສານສ່ວນຂອງຕົ້ນພືດເຂົ້າຫາກັນເພື່ອໃຫ້ຈະເລີນເປັນພືດຕົ້ນດຽວກັນໂດຍການນໍາແຜ່ນຕາຈາກກິ່ງພັນດີໄປຕິດຕົ້ນຕໍມີຂັ້ນຕອນປະຕິ ບັດດັ່ງນີ້: 1) ເລືອກຕົ້ນຕໍໃນສ່ວນທີ່ເປັນສີຂຽວປົນນໍ້າຕານແລ້ວຂີດພຕົ້ນຕໍຈາກເທິງລົມລຸ່ມ 2 ຮອຍຮາງກັນປະມານ 1 ໃນ 3 ລວງຂວາງຂອງຕົ້ນຕໍຄວາມຍາວປະ ມານ 6 ຫາ 7 ຊັງຕີແມັດ 2) ຕັດຂວາງຮອບຂີດເບື້ອງເທິງແລ້ວລອກເປືອກອອກຈາກດ້ານເທິງລົງລຸ່ມຕັດເປືອກທີ່ລອກອອກໃຫ້ຄືກັບດ້ານລຸ່ມຍາວປະມານ 1 ຊັງຕີ ແມັດ 3) ປາດແຜນຕາຍາວປະມານ 7 ຫາ 10 ຊັງ ຕີແມັດ ລອກເນື້ອໄມ້ອອກແລ້ວຕັດແຜນຕາດ້ານລຸ່ມຖິ້ມ. 4) ສອດແຜນຕາລົງໄປໃນເປືອກຕົ້ນຕໍໂດຍໃຫ້ຕາຕັ້ງຂຶ້ນແລ້ວພັນດ້ວຍພະລາດສະຕິກໃຫ້ແໜ້ນ, ປະມານ 7 ຫາ 10 ວັນ ຈຶ່ງເປີດພະລາສະຕິກອອກແລ້ວພັນໃໝ່ໂດຍເວັ້ນຊ່ອງວ່າງໃຫ້ຕາພົ້ນອອກມາປະໄວ້ປະມານ 2 ຫາ 3 ອາທິດ ຈຶ່ງຕັດຍອດເດີ່ມແລ້ວຈີກພະລາສະຕິກອອກ.

ການສຽບຍອດ: ຄືການສຽບປະສານເນື້ອເຍືອຂອງຕົ້ນພືດ 2 ຕົ້ນເຂົ້າດ້ວຍກັນເພື່ອໃຫ້ຈະເລີນເຕີບໂຕເປັນຕົ້ນດຽວກັນໂດຍມີຂັ້ນຕອນການປະຕິບັດດັ່ງນີ້: 1) ຕັດຍອດຕົ້ນຕໍໃຫ້ສູງຈາກລະດັບພື້ນດິນປະມານ 10 ຊັງຕີແມັດ ແລ້ວພ່າກາງລໍ້າຕົ້ນຂອງຕົ້ນຕໍໃຫ້ເລິກປະມານ 3 ຫາ 4 ຊັງຕີແມັດ. 2) ປາດຍອດພັນດີເປັນຮູບຫຼິ້ມຍາວປະ ມານ 3 ຫາ 4 ຊັງຕີແມັດ. 3) ສຽບຍອດພັນດີລົງໃນປາກບາດຂອງຕົ້ນຕໍໃຫ້ຮອຍປາກບາດເຄ່ງກັນແລ້ວໃຊ້ເຊືອກມັດດ້ານເທິງລະຫວ່າງປາກບາດໃຫ້ແໜ້ນ, 4) ຄຸມຕົ້ນທີ່ສຽບຍອດດ້ວຍພະລາສະຕິກຫຼືນໍາໄປເກັບໄວ້ໃນເຮືອນພະລາສະຕິກ. 5) ປະມານ 5 ຫາ 7 ອາທິດຮອຍປາກບາດຈະຕິດກັນດີແລ້ວນໍາອອກມາພັກໄວ້ໃນເຮືອນກ້າເບ້ຍເພື່ອລໍການປູກ.

  ການຕັດຊໍາ: ຄືການນໍາສ່ວນຕ່າງໆຂອງພືດພັນດີເຊັ່ນ: ໃບ, ຮາກມາຕັດ ແລະປັກຊໍາໃນວັດຖຸເພາະຊໍາເພື່ອໃຫ້ໄດ້ພືດຕົ້ນໃໝ່ຈາກສ່ວນທີ່ນໍາມາຕັດຊໍາໂດຍມີຂັ້ນຕອນການປະຕິບັດດັ່ງນີ້: 1) ຕັດງ່າໃຫ້ໃກ້ຂໍ້ຍາວປະມານ 15 ຫາ 20 ຊັງຕີແມັດ ໂດຍຕັດເປັນຮູບປາກປາສະຫຼາມ ແລະຕັດປາຍເບື້ອງເທີງໃຫ້ເໜືອຕາປະມານ 1 ຊັງຕີແມັດ. 2) ໃຊ້ມີດປາຍແຫຼ້ມຂີດບໍລິເວນຮອບງ່າຊໍາດ້ານລຸ່ມປະມານ 1 ຫາ 1,5 ຊຕມ ປະມານ 2 ຫາ 3 ຮອຍ. 3) ປັກກິ່ງຊໍາລົງໃນວັດຖຸເພາະຊໍາໃຫ້ເຫຼືອປະມານ 2,5 ຫາ 5 ຊັງຕີແມັດ. 4) ນໍາເຂົ້າໂຮງອົບ (ຄຸມດ້ວຍພະລາສະຕິກ) ຫຼື ຖົງພະລາສະຕິກຂະໜາດໃຫຍ່. 5 ) ປະມານ 25 ຫາ 30 ວັນ ງ່າຕັດຊໍາຈະເກີດຍອດອ່ອນພ້ອມອອກຮາກເມື່ອຮາກມີຈໍານວນຫຼາຍພໍຈຶ່ງຍ້າຍໄປປູກຕໍ່ໄປ.

_____________

ຂ່າວ: ທ. ສອນເພັດ ສຸລິພອນ

แชร์