ກະສິກໍາເນັ້ນການປູກພືດສະບຽງອາຫານ ແລະພືດອຸດສາຫະກໍາເປັນສິນຄ້າ

  ພະແນກກະສິກໍາ ແລະປ່າໄມ້ ແຂວງຫຼວງພະບາງ ເນັ້ນໃຫ້ພໍ່ແມ່ປະຊາຊົນ, ຊາວກະສິກອນປູກພືດສະບຽງອາຫານແລະພືດອຸດສາຫະກໍາຂາຍເປັນສິນຄ້າເພື່ອກະຕຸ້ນເຮັດໃຫ້ຄອບຄົວມີລາຍຮັບທີ່ດີສາມາດສະໜອງສະບຽງອາຫານໃຫ້ທ້ອງຕະຫຼາດຢູ່ພາຍໃນ, ກ້າວໄປສູ່ຄອບຄົວຕົວແບບ ແລະ ມີການພັດທະນາສ້າງລາຍຮັບໃຫ້ເສດຖະ ກິດຂອງຄອບຄົວດີຂຶ້ນເທື່ອລະກ້າວ.

  ທ່ານ ສີວອນ ວົງຄໍາຈັນ ຫົວໜ້າພະແນກກະສິກໍາ ແລະປ່າໄມ້ ແຂວງຫຼວງພະບາງ ໄດ້ໃຫ້ສໍາພາດຕໍ່ສື່ຂ່າວເສດຖະກິດ-ສັງຄົມ ແຂວງຫຼວງພະບາງ ວ່າງບໍ່ດົນນີ້ວ່າ: ເພື່ອກະຕຸ້ນເຮັດໃຫ້ຄອບຄົວ ມີລາຍຮັບທີ່ດີສາມາດສະໜອງສະບຽງອາຫານໃຫ້ທ້ອງຕະຫຼາດຢູ່ພາຍໃນ, ກ້າວໄປສູ່ຄອບຄົວຕົວ ແບບ ແລະມີການພັດທະນາສ້າງລາຍຮັບໃຫ້ເສດຖະກິດຂອງຄອບຄົວດີຂຶ້ນເທື່ອລະກ້າວນັ້ນ, ທາງພະແນກກະສິກໍາແຂວງໄດ້ວາງແຜນການປູກພືດລະດູແລ້ງທັງໝົດ 6.109 ເຮັກຕາ, ຜົນຜະລິດ31.125 ໂຕນ, ຜ່ານການຈັດຕັ້ງປະຕິບັດການຊຸກຍູ້ສົ່ງເສີມປູກຕົວຈິງມີເນື້ອທີ່ປູກທັງໝົດ 7.370 ເຮັກຕາ, ຜົນຜະລິດ 41.103 ໂຕນ, ທຽບໃສ່ແຜນການລື່ນ 32,06% ໃນນີ້ເນື້ອທີ່ປູກພືດສະບຽງອາຫານປະເພດຜັກຕ່າງໆ 5.797 ເຮັກຕາ, ຜົນຜະລິດ36.205 ໂຕນ, ເນື້ອທີ່ປູກພືດອຸດສາຫະກໍາເປັນສິນຄ້າ 1.385 ເຮັກຕາ, ຜົນຜະລິດ 3.884 ໂຕນ, ເນື້ອທີ່ປູກພືດທາດແປ້ງ 154 ເຮັກຕາ, ຜົນຜະລິດ 984 ໂຕນ, ເນື້ອທີ່ປູກດອກ ດາວເຮືອງ 34 ເຮັກຕາ, ຜົນຜະລິດ 30 ໂຕນ, ພົ້ນເດັ່ນກວ່າໝູ່ແມ່ນຢູ່ເມືອງນໍ້າບາກມີເນື້ອທີ່ 2.361 ເຮັກຕາ, ນະຄອນຫຼວງພະບາງ ມີເນື້ອທີ່ 873 ເຮັກຕາ, ເມືອງຈອມເພັດ 770 ເຮັກຕາ.

  ສໍາລັບແຜນໃນຕໍ່ໜ້າຈະໄດ້ລະດົມໃຫ້ພໍ່ແມ່ປະຊາຊົນປູກພືດອຸດສາຫະກໍາເພີ່ມຂຶ້ນເປັນຕົ້ນແມ່ນປູກໝາກເດືອຍ, ໝາກງາ, ສາລີ, ປໍສາ ແລະອື່ນໆອີກໃຫ້ໄດ້ໃນເນື້ອທີ່ 32.072 ເຮັກຕາ ແລະພືດສະບຽງອາຫານປະເພດຕ່າງໆໃຫ້ໄດ້ 10.110 ເຮັກຕາເພື່ອໃຫ້ສາມາດສະໜອງໃຫ້ທ້ອງຕະຫຼາດພຽງພໍ.

______________

ຂຽນໂດຍ: ສີສຸວັນ

ພາບ ແລະຂ່າວ: ໜັງສືພິມເສດຖະກິດ-ສັງຄົມ

แชร์