ຫຼາຍເມືອງແຂວງຫຼວງພະບາງປະເຊີນບັນຫາສັດຕູພືດລະບາດ

  ໃນປີ 2020 ນີ້ ແຂວງຫຼວງພະບາງຍັງມີຫຼາຍເມືອງທີ່ໄດ້ປະເຊີນບັນຫາການລະບາດຂອງແມງໄມ້ສັດຕູພືດໂດຍສະເພາະແມ່ນຕັກແຕນຝຸງໄມ້ປ່ອງ ແລະບົ້ງຝູງສາລີ ຊຶ່ງໄດ້ເລີ່ມລະບາດມາແຕ່ເດືອນມີນາເປັນຕົ້ນມາເຮັດໃຫ້ເນື້ອທີ່ການຜະລິດຜົນລະປູກຂອງປະຊາຊົນເສຍຫາຍສົມຄວນ.


  ທ່ານ ສີວອນ ວົງຄໍາຈັນ ຫົວໜ້າພະແນກກະສິກໍາ ແລະປ່າໄມ້ແຂວງຫຼວງພະບາງ ໄດ້ໃຫ້ສໍາພາດຕໍ່ສື່ຂ່າວສັງຄົມພວກເຮົາວ່າງບໍ່ດົນນີ້ວ່າ: ມາຮອດຊ້ວງທ້າຍການຜະ ລິດລະດູແລ້ງກ້າວເຂົ້າສູ່ລະດູຝົນປີ 2020 ນີ້ມີຫຼາຍເມືອງໄດ້ປະເຊີນບັນຫາການລະບາດຂອງແມງໄມ້ສັດຕູພືດໂດຍສະເພາະແມ່ນຕັກແຕນຝູງໄມ້ປ່ອງ ແລະບົ້ງຝູງສາ ລີ. ສໍາລັບການລະບາດຂອງຕັກແຕນຝູງໄມ້ປ່ອງທີ່ລະບາດແມ່ນເລີ່ມມາແຕ່ທ້າຍເດືອນມີນາ ປະກອບມີ 6 ເມືອງ ຄື: ເມືອງວຽງຄໍາ, ໂພນທອງ, ງອຍ, ນໍ້າບາກ, ປາກແຊງ ແລະເມືອງໂພນໄຊກວມເອົາ 42 ບ້ານ, ລະບາດຢູ່ 87 ຈຸດ, ເນື້ອທີີ່ລະບາດ 2.242 ເຮັກຕາ, ໃນນີ້ລະບາດຢູ່ເຂດປ່າໄມ້ປ່ອງ 703 ເຮັກຕາ, ເຂດທໍາການຜະ ລິດ 290 ເຮັກຕາ, ເຮັດໃຫ້ເຂົ້າໄຮ່ປະຊາຊົນເສຍຫາຍຢູ່ 4 ບ້ານ, 33 ຄອບຄົວ, ເນືອທີ່ຖືກກະທົບ 30 ເຮັກຕາ, ເນື້ອທີ່ເສຍຫາຍ 8 ເຮັກຕາ ແລະການລະບາດບົ້ງຝຸງແມ່ນເລີ່ມມີການລະບາດຫຼາຍມາແຕ່ທ້າຍເດືອນເມສາ 2020 ນີ້ລວມມີ 7 ເມືອງຄື: ເມືອງຊຽງເງິນ, ໂພນທອງ, ງອຍ, ວຽງຄໍາ, ພູຄູນ, ຈອມເພັດ ແລະເມືອງປາກແຊງ ກວມເອົາ 12 ບ້ານ, 80 ຄອບຄົວ, ເນື້ອທີ່ການລະບາດທັງໝົດ 49 ເຮັກຕາ.


 ທ່ານກ່າວຕື່ມອີກວ່າສໍາລັບການລົງແກ້ໄຂໃນໄລຍະຜ່ານມາໄດ້ແນະນໍາໃຫ້ພະນັກງານວິຊາການກະສິກໍາ ແລະປ່າໄມ້ເມືອງພ້ອມດ້ວຍພໍ່ແມ່ປະຊາຊົນຢູ່ບັນເມືອງທີ່ມີການລະບາດລົງແກ້ໄຂໂດຍການຊີດຢາເຄມີປາບຕັກແຕນຢູ່ 5 ບ້ານ, ມີ 6 ຈຸດ, ມີ 17 ຄອບຄົວ, ເນື້ອທີ່ຊີດຢາ 23 ເຮັກຕາ, ໃຊ້ໄຟຈູດອູດໄລ່ຕັກແຕນມີ 5 ບ້ານ, ມີ 19 ຈຸດ, ເນື້ອທີ່ 55 ເຮັກຕາ ແລະສືບຕໍ່ແກ້ໄຂຈຸດທີ່ຍັງເຫຼືອ.

______________

ຂຽນໂດຍ: ສີສຸວັນ    

ພາບ ແລະຂ່າວ: ໜັງສືພິມເສດຖະກິດ-ສັງຄົມ

แชร์