ລາວຊໍາຊຸງ ມອບໂທລະພາບມູນຄ່າ 260 ລ້ານກີບ ໃຫ້ ສທຄ

  ບໍລິສັດ ລາວຊໍາຊຸງອີເລັກໂທຣນິກ ຈໍາກັດຜູ້ດຽວມອບໂທລະພາບ Samsung ຈໍານວນ 5 ໜ່ວຍ ໃຫ້ກັບສະຖາບັນການທະນາຄານ (ສທຄ) ເພື່ອນໍາໃຊ້ເຂົ້າໃນວຽກ ງານພັດທະນາການສຶກສາໃນຂົງເຂດການຮຽນ-ການສອນຂອງ ສທຄ ລວມມູນຄ່າທັງໝົດ 260.000.000 ກີບ ແລະພິທີມອບ-ຮັບ ໄດ້ຈັດຂຶ້ນໃນວັນທີ 9 ມິຖຸນາ 2020 ສທຄ ໂດຍຕາງໜ້າມອບຂອງທ່ານ ນາງ ມັງກອນທອງ ໄຊຍະສິດ ການຕະຫຼາດຜະລິດຕະພັນເຄື່ອງໃຊ້ໄຟຟ້າ ແລະ ຕາງໜ້າ ສທຄ ຮັບໂດຍທ່ານ ປອ. ນາງ ດ່ຽງຄໍາ ແສງແກ້ວມີໄຊ ຮອງຫົວໜ້າ ສທຄ ພ້ອມດ້ວຍພະນັກງານຂອງ 2 ພາກສ່ວນ.
  ທ່ານ ປອ ນາງ ດ່ຽງຄໍາ ແສງແກ້ວມີໄຊ ໄດ້ສະແດງຄວາມຮູ້ບຸນຄຸນມາຍັງບໍລິສັດດັ່ງກ່າວທີ່ໄດ້ເຫັນຄວາມສໍາຄັນຂອງການພັດທະນາການສຶກສາທີ່ສາມາດເປັນເຄື່ອງມືອໍານວຍຄວາມສະດວກໃນການຮຽນ-ການສອນຂອງຄູ-ອາຈານ ແລະນັກສຶກສາຂອງສະຖາບັນ ແລະເປັນການຍົກລະດັບເທັກໂນໂລຊີເຂົ້າໃນຫຼັກສູດການຮຽນການສອນໃຫ້ທັນສະໄໝຂຶ້ນຊຶ່ງໂທລະພາບດັ່ງກ່າວຈະຕິດຕັ້ງໄວ້ດ້ານໜ້າສະໂມສອນໃຫຍ່ 1 ໜ່ວຍ, ຫ້ອງສະໝຸດ 1 ໜ່ວຍ, ທະນາຄານຈໍາລອງ 1 ໜ່ວຍ, ຫ້ອງຂ່າວສານ 1 ໜ່ວຍ ແລະຫ້ອງປະຊຸມຂອງຄະນະບໍລິຫານງານ 1 ໜ່ວຍ.
 ທ່ານ ວິໄລຄໍາ ປ້ອງພິມຄໍາ ຮອງຫົວໜ້າ ສທຄ ໄດ້ຢືນຢັນວ່າ: ການຊ່ວຍເຫຼືອຂອງບໍລິສັດດັ່ງກ່າວໃນຄັ້ງນີ້ເປັນນິມິດໝາຍທີ່ດີຊຶ່ງຈະກາຍເປັນສື່ກາງໃນການຖ່າຍທອດ ແລະນໍາສະເໜີວຽກງານຕ່າງໆຂອງ ສທຄ ທີ່ຈະນໍາຮູບພາບ, ບັນດາຂໍ້ມູນ ທີ່ຈະສ່ອງແສງລະຫວ່າງຄະນະຜູ້ບໍລິຫານ, ຄູອາຈານ ແລະນັກສຶກສາຮູ້ທັນເຫດການ ທັງເປັນການປະຊາສໍາພັນບັນຫາການຮຽນ-ການສອນແບບໃໝ່ໃນເງື່ອນໄຂທີ່ປະເທດເຮົາກໍ່ຄື ສທຄ ຮັບການພັດທະນາຫຼັງໂຄວິດ-19, ການສອບເສັງ, ການຝຶກອົບຮົມ; ນອກນີ້, ຍັງຈະໄດ້ນໍາໃຊ້ເຂົ້າໃນຫ້ອງສະໝຸດເພື່ອຊອກຫາຂໍ້ມູນ, ຊອກຫາບົດຄົ້ນຄວ້າ ແລະບັນຫາຕ່າງທີ່ຕິດພັນກັບການສຶກສາຂອງນັກສຶກສາໄດ້ຢ່າງວ່ອງໄວ; ຂະນະ ດຽວກັນ, ສທຄ ຍັງກໍາລັງພັດທະນາໜ່ວຍງານທີ່ເຮັດໜ້າທີ່ຂໍ້ມູນຂ່າວສານ, ພັດທະນາການຮຽນ-ການສອນ, ຕັດຕໍ່ຮູບ, ອອກແບບ. ການສະໜັບສະໜູນຂອງບໍລິສັດດັ່ງກ່າວຕໍ່ ສທຄ ເປັນການປະກອບສ່ວນສ້າງຄຸນປະໂຫຍດອັນລວມບໍ່ສະເພາະແຕ່ອົງກອນແຕ່ຍັງສ້າງເງື່ອນໄຂໃຫ້ຄູ-ອາຈານ ແລະນັກສຶກສາໄດ້ຊົມໃຊ້ເຄື່ອງດັ່ງກ່າວເຂົ້າໃນການພັດທະນາວຽກງານຂອງຕົນໃຫ້ກ້າວໜ້າຢ່າງບໍ່ຢຸດຢັ້ງ.

_____________

ຂຽນໂດຍ: ຣັດສະໝີ ດວງສັດຈະ 

ພາບ ແລະຂ່າວ: ໜັງສືພິມເສດຖະກິດ-ສັງຄົມ

แชร์