ໄຟຟ້າສາຂາແຂວງວຽງຈັນເລັ່ງແກ້ໄຂໜີ້ ແລະພະລັງງານຕົກເຮ່ຍ

  ໃນໄລຍະຜ່ານມາໄຟຟ້າລາວສາຂາແຂວງວຽງຈັນໄດ້ມີຜົນງານພົ້ນເດັ່ນຫຼາຍດ້ານໂດຍສະເພາະການຂະຫຍາຍຕາຂ່າຍໄຟຟ້າອອກສູ່ເຂດຫ່າງໄກສອກຫຼີກ ແລະອື່ນໆເພື່ອເຮັດໃຫ້ປະຊາຊົນໄດ້ຊົມໃຊ້ໄຟຟ້າຢ່າງທົ່ວເຖິງຊຶ່ງປະຈຸບັນໄດ້ມີເມືອງ ແລະບ້ານໄດ້ຊົມໃຊ້ໄຟຟ້າ 100% ສ່ວນຈຳນວນຄອບຄົວໄດ້ຊົມໃຊ້ໄຟເຖິງ 99% ຂອງຈຳ ນວນຄອບຄົວທົ່ວແຂວງແນວໃດກໍດີເຖິງວ່າຈະມີຜົນສຳເລັດຫຼາຍດ້ານແຕ່ກໍຍັງມີຫຼາຍບັນຫາທີ່ຈະສືບຕໍແກ້ໄຂໃນຕໍ່ໜ້າເປັນຕົ້ນຈະເລັ່ງແກ້ໄຂໜີ້ສິນທີ່ມີສູງເຖິງ 49 ຕື້ກວ່າກີບ, ພະລັງງານຕົກເຮ່ຍມີເຖິງ 15% ແລະບັນຫາອື່ນໆຈຳນວນໜຶ່ງ.
   ທ່ານ ສັກດາວັນ ສາຍນໍລາດ ຫົວໜ້າສາຂາໄຟຟ້າລາວແຂວງວຽງຈັນໃຫ້ສຳພາດຕໍ່ນັກຂ່າວໜັງສືພິມເສດຖະກິດ-ສັງຄົມເມື່ອວັນທີ 5 ມິ ຖຸນາຜ່ານມາວ່າ: ປະຈຸ ບັນທົ່ວແຂວງວຽງຈັນມີກົມການຄຸ້ມຄອງຕາຂ່າຍແຮງກາງມີ 2 ພັນກວ່າກິໂລແມັດ, ແຮງຕໍ່າ 1,3 ພັນກິໂລແມັດ, ມີໜໍ້ແປງທີ່ຈຳໜ່າຍໃຫ້ປະຊາຊົນ 2 ພັນກວ່າໜ່ວຍ, ມີໝໍ້ນັບ ໄຟ 1,17 ແສນໜ່ວຍ ຊຶ່ງໃນນີ້ການຊົມ ໃຊ້ໄຟຟ້າໃນ 11 ເມືອງທົ່ວແຂວງແມ່ນ ໄດ້ຊົມໃຊ້ໄຟ 100% ຂອງຈຳນວນເມືອງ, ມີ 419 ບ້ານໄດ້ຊົມ ໃຊ້ໄຟ 100% ຂອງຈຳນວນບ້ານ,ຈຳນວນຄອບຄົວ 86 ພັນກວ່າຄອບຄົວໄດ້ຊົມໃຊ້ໄຟ 99% ຂອງຈຳນວນຄອບຄົວທົ່ວແຂວງຊຶ່ງໃນແຕ່ລະເດືອນແຕ່ລະປີໄດ້ມີຄອບ ຄົວເພີ່ມຂຶ້ນ.


 ທ່ານ ສັກດາວັນ ສາຍນໍລາດ ກ່າວຕື່ມວ່າ: ສຳລັບການຈຳໜ່າຍກະແສໄຟໃນເດືອນໜຶ່ງສະເລ່ຍປະມານ 28-30 ລ້ານກິໂລວັດໂມງ ຕົກເປັນເງິນປະມານ 20 ຕື້ກວ່າກີບໃນແຕ່ລະເດືອນ,ການຄຸ້ມຄອງພະລັງງານຕົກເຮ່ຍແມ່ນມີຫຼາຍປະຈຸບັນມີເຖິງ 15% ຫຼືປະມານ 5 ລ້ານກວ່າ ກິໂລວັດໂມງ ຖ້າເກີດໄຟຕົກໄຟມອດຍີ່ງເຮັດໃຫ້ເກີດພະລັງງານຕົກເຮ່ຍຫຼາຍ, ສ່ວນການເກັບກູ້ຄ່າກະແສໄຟຟ້າປະຈຸບັນມີໜີ້ຄ່າກະແສໄຟ 49 ຕື້ກວ່າກີບ ຖ້າທຽບໃສ່ການສົ່ງອອກປະມານເຄີ່ງເດືອນໂດຍໜີ້ສ່ວນໃຫຍ່ແມ່ນພັກ-ລັດບໍລິຫານແລະຊົນລະປະທານກວມເອົາກາຍເຄີ່ງໜຶ່ງ, ພາກສ່ວນອື່ນແມ່ນບໍ່ຮອດ 20%, ສຳລັບລາຍຮັບ-ລາຍຈ່າຍແມ່ນຂາດດຸນສະເລ່ຍເດືອນໜຶ່ງປະ ມານ 1 ຕື້ກວ່າກີບ.
  ແນວໃດກໍດີ ທ່ານ ສັກດາວັນ ສາຍນໍລາດ ກ່າວຕື່ມອີກວ່າ: ແຜນການປະຕິບັດວຽກງານໃນຕໍ່ໜ້າແມ່ນຈະເລັ່ງໃສ່ແກ້ໄຂພະລັງງານຕົກເຮ່ຍ, ໜີ້ສິນຄ່າກະແສໄຟຟ້າ, ຈະແກ້ໄຂໄຟດັບໄຟມອດຊຶ່ງຈະໄດ້ລົງເລີກຕື່ມໂດຍສະເພາະຈະໄດ້ປະຊາສຳພັນໃຫ້ປະຊາຊົນຜູ້ຊົມໃຊ້ໄຟເຂົ້າໃຈ, ແນະນຳພະນັກງານຈົດໃຫ້ຖືກວັນເພື່ອບໍ່ໃຫ້ມີການເຄື່ອນເໜັງຂອງກະແສໄຟຟ້າທັງນີ້ຍັງແນະນຳໃຫ້ປະຊາຊົນຜູ້ຊົມໃຊ້ໄຟປະຢັດ, ຊົມໃຊ້ໄຟຟ້າໃຫ້ເກີດຜົນປະໂຫຍດສູງສຸດ,ໃຊ້ໃນສິ່ງທີ່ຈຳເປັນເພື່ອຫຼຸດຄ່າໃຊ້ຈ່າຍຂອງປະຊາຊົນເອງ.

-------------------

ພາບ ແລະຂ່າວ: ໜັງສືພິມເສດຖະກິດ-ສັງຄົມ

แชร์