ຄະນະພັກຮາກຖານພະແນກ ຖວທ ນວ ຈັດກອງປະຊຸມໃຫຍ່

 ກອງປະຊຸມໃຫຍ່ III ຂອງຄະນະພັກຮາກຖານພະແນກຖະແຫຼງຂ່າວ, ວັດທະນະທຳ ແລະທ່ອງທ່ຽວ ນະຄອນຫຼວງວຽງຈັນ ໄດ້ຈັດຂຶ້ນໃນວັນທີ 10 ມິຖຸນາ 2020 ທີ່ໂຮງແຮມແລນມາກ ນະຄອນຫຼວງວຽງຈັນ ໂດຍເປັນປະທານຂອງສະຫາຍນາງ ວິໄລວອນ ຈັນທະລາຕີ ຮັກສາການເລຂາຄະນະພັກຮາກຖານຫົວໜ້າພະແນກຖະ ແຫຼງຂ່າວວັດທະນະທຳ ແລະ ທ່ອງທ່ຽວ ນະຄອນຫຼວງວຽງຈັນ ເປັນກຽດເຂົ້າຮ່ວມຂອງ ສະຫາຍ ສີຫຸນ ສິດທິລືໄຊ ຮອງເລຂາຄະນະພັກຮອງເຈົ້າຄອງນະຄອນຫຼວງວຽງຈັນ ມີຄະນະພັກຮາກຖານ, ຄະນະໜ່ວຍພັກສະມາຊິກພັກທີ່ຖືກເຊີນເຂົ້າຮ່ວມ.

   ສະຫາຍ ນາງ ວິໄລວອນ ຈັນທະລາຕີ ໄດ້ຂຶ້ນຜ່ານບົດລາຍງານການເມືອງທັງ 2 ພາກ ຊຶ່ງໄດ້ຕີລາຄາຜົນການຈັດຕັ້ງມະຕິກອງປະຊຸມໃຫຍ່ຄັ້ງທີ II (2014-2019) ແລະທິດທາງແຜນການແຕ່ນີ້ຮອດປີ 2025 ວ່າ: ຄະນະພັກຮາກຖານພະແນກຖະແຫຼງຂ່າວ, ວັດທະນະທຳ ແລະທ່ອງທ່ຽວນະຄອນຫຼວງວຽງຈັນເປັນຄະ ນະພັກຮາກຖານໜຶ່ງທີ່ນອນຢູ່ໃນຂົງເຂດວັດທະນະທຳສັງຄົມພາຍໃຕ້ການຊີ້ນນຳ, ນຳພາກ່ຽວກັບວຽກງານພັກພະນັກງານຈາກຄະນະພັກນະຄອນຫຼວງ ແລະ ຊີ້ນຳດ້ານວິຊາການຈາກກະຊວງຖະແຫຼງຂ່າວວັດທະນະທຳ ແລະທ່ອງທ່ຽວປະຈຸບັນມີ 8 ໜ່ວຍພັກ, ມີສະມາຊິກພັກ 115 ສະຫາຍ ຍິງ 49 ສະຫາຍ ເປັນສະມາຊິກພັກສົມ ບູນ 98 ສະຫາຍ ໃນ 5 ປີຜ່ານມາສາມາດຮັກສານາມມະຍົດໜ່ວຍພັກເຂັ້ມແຂງຮູ້ນຳພາຮອບດ້ານໄດ້ 5 ໜ່ວຍພັກ 5 ປີຕິດຕໍ່ກັນຂະຫຍາຍມະຫາຊົນກ້າວໜ້າເຂົ້າເປັນສະມາຊິກພັກໄດ້ 26 ສະຫາຍ ຍິງ 13 ສະຫາຍ ທັງໄດ້ຕັ້ງສ້າງແຜນກຳນົດພະນັກງານນຳພາຄຸ້ມຄອງ ບຳລຸງສ້າງພະນັກງານຮັບປະກັນສາມຮຸ້ນສາມລະດັບ ເພື່ອສືບທອດປ່ຽນແທນໃຫ້ມີຄຸນນະພາບສົມຄູ່ກັບໜ້າທີ່ການເມືອງໃນໄລຍະໃໝ່ນອກຈາກນີ້ຍັງໄດ້ເອົາໃຈໃສ່ໃນການສ້າງຄອບຄົວຕົວແບບດ້ານຄອບຄົວວັດທະນະທຳໄດ້ 115 ຄອບຄົວ ຄອບຄົວປອດຄະດີ 100 ຄອບຄົວ ແລະຄອບຄົວແບບຢ່າງດ້ານສາທາລະນະສຸກ 89 ຄອບຄົວ.

  ຄຽງຄູ່ກັນນີ້ຍັງໄດ້ເອົາໃຈໃສ່ຈັດຕັ້ງປະຕິບັດວຽກງານຖະແຫຼງຂ່າວວັດທະນະທຳ ແລະທ່ອງທ່ຽວໂດຍສະເພາະໜັງສືພິມວຽງຈັນໃໝ່-ວຽງຈັນທຸລະກິດສັງຄົມ, ວິທະ ຍຸໂທລະພາບ ນວ ໃຫ້ໄດ້ຮັບການປັບປຸງຍົກສູງຄຸນນນະພາບດີຂຶ້ນເທື່ອລະກ້າວຕອບສະໜອງຕາມຄວາມຮຽກຮ້ອງຕ້ອງການໃນການນຳເອົາແນວທາງນະໂຍບາຍຂອງພັກ-ລັດໄປສູ່ປະຊາຊົນຄື:ຈັດພິມໜັງສືພິມວຽງຈັນໃໝ່ແຕ່ລະວັນ 4,3 ພັນສະບັບ ວຽງຈັນທຸລະກິດສັງຄົມ 300 ສະບັບຕໍ່ອາທິດ, ອອກຂ່າວເວັບໄຊ ແລະອອນລາຍມີຜູ້ເຂົ້າຊົມ 1 ລ້ານກວ່າ ເທື່ອຄົນມີແຟນເຟສ 5.320 ເທື່ອຄົນພ້ອມນີ້ນະຄອນຫຼວງມີ 2 ຄື້ນຄື: FM 105,5 FM 98,8 ແຕ່ລະຄື້ນອອກອາກາດ 18 ຊົ່ວໂມງຕໍ່ມື້ ແລະມີສະຖານທີໂທລະພາບ ນວ (VTE) ສາມາດກະຈາຍໄປທົ່ວປະເທດ ແລະປະເທດໃກ້ຄຽງຈຳນວນໜຶ່ງສຳລັບວຽກງານວັດທະນະທຳສາມາດສ້າງຄອບຄົວວັດ ທະນະທຳໄດ້ 142.159 ຄອບຄົວ ເທົ່າກັບ 89,73% ຂອງຄອບຄົວທັງໝົດບ້ານວັດທະນະທຳໄດ້ 468 ບ້ານ ເທົ່າກັບ 97,29% ຂອງບ້ານທັງໝົດສ່ວນວຽກ ງານທ່ອງທ່ຽວໄດ້ຮັບການຊຸກຍູ້ສົ່ງເສີມ ແລະຂະຫຍາຍຕົວຢ່າງແຂງແຮງປະກອບສ່ວນສ້າງລາຍຮັບໃຫ້ງົບປະມານສັງຄົມ ແລະແກ້ໄຂວຽກເຮັດງານທຳໄດ້ເປັນຢ່າງດີໃນ 5 ປີຜ່ານມາມີນັກທ່ອງທ່ຽວທັງພາຍໃນ ແລະຕ່າງປະເທດເຂົ້າມາຫຼາຍກວ່າ 10 ລ້ານເທື່ອຄົນ.

  ສຳລັບທິດທາງແຜນການຈຸດສຸມໃນຕໍ່ໜ້າແມ່ນໄດ້ວາງວິໄສທັດ ແລະຍຸດທະສາດເນັ້ນສືບຕໍ່ພັດທະນາວຽກງານຖແຫຼງຂ່າວໃຫ້ມີຄຸນນະພາບຢ່າງຮອບດ້ານປັບປຸງການບໍລິການດ້ານສື່ມວນຊົມໃຫ້ມີຄວາມຫຼາກຫຼາຍທັນສະໄໝສາມາດເຂົ້າເຖິງຂໍ້ມູນໄດ້ຢ່າງວ່ອງໄວອະນຸຮັກປົກປັກຮັກສາຟືນຟູ ແລະເສີມຂະຫຍາຍມູນເຊື້ອຄຸນຄ່າມໍລະດົກວັດທະນະທຳອັນດີງາມຂອງຊາດໃຫ້ຍືນຍົງພັດທະນາ ແລະສົ່ງເສີມການທ່ອງທ່ຽວໃຫ້ກາຍເປັນອຸດສາຫະກຳທັນສະໄໝຄົບວົງຈອນ ແລະ ເປັນຂະແໜງເສດຖະກິດທີ່ສຳຄັນຂອງ ນວ ແລະອື່ນໆ.

 ກອງປະຊຸມຄັ້ງນີ້ໄດ້ບ່ອນບັດເລືອກເອົາຄະນະພັກຮາກຖານພະແນກຖະແຫຼງຂ່າວວັດທະນະທຳ ແລະທ່ອງທ່ຽວນະຄອນຫຼວງວຽງຈັນຊຸດໃໝ່ລົງສະໝັກ 9 ສະຫາຍ, ເລືອກເອົາ 7 ສະຫາຍ ຜ່ານການປ່ອນບັດເຫັນດີເປັນເອກກະສັນເລືອກເອົາສະຫາຍ ນາງ ວິໄລວອນ ຈັນທະລາຕີ ເປັນເລຂາຄະນະພັກຮາກຖານ, ສະຫາຍ ຄຳຄູນ ໃບລາຕີ ເປັນຮອງເລຂາ, ສະຫາຍ ພອນຈັນ ແພງພູວັນ ສະຫາຍ ບົວລີ ແກ້ວມະນີວັນ, ສະຫາຍ ວຽງຄຳ ສີສຸວົງ ສະຫາຍ ແກ້ວວິໄລສັກ ແສນສັກດາ, ສະຫາຍ ນາງ ແກ້ວຊ້ອນ ຈັນທະນາມ ເປັນກຳມະການພັກຮາກຖານໃນນັ້ນໄດ້ເລືອກເອົາ ສະຫາຍ ບົວລີ ແກ້ວມະນີວັນ ເປັນປະທານກວດກາພັກ, ສະຫາຍ ວຽງຄຳ ສີສຸວົງ ແລະສະຫາຍ ແກ້ວວິໄລສັກ ແສນສັກດາ ເປັນຮອງປະທານກວດກາພັກ.

  ໂອກາດນີ້ສະຫາຍ ສີຫຸນ ສິດທິລືໄຊ ໄດ້ຂຶ້ນເປັນກຽດໂອ້ລົມໂດຍເນັ້ນໃຫ້ຄະນະພັກຮາກຖານຊຸດໃໝ່ເອົາໃຈໃສ່ສືບຕໍ່ຄົ້ນຄວ້າເຊື່ອມຊືມແນວທາງນະໂຍບາຍຂອງພັກໄປຜັນຂະຫຍາຍເຂົ້າໃນວຽກງານຂອງຕົນໃຫ້ປາກົດຜົນເປັນຈິງສ້າງກົນໄກ ແລະລະບຽບການເຄື່ອນໄຫວວຽກງານໃຫ້ຫັດກຸມເພີ້ມທະວີຄວາມສາມັກຄີເປັນເອກະພາບໃຫ້ເປັນປຶກແຜນແໜ້ນໜາເພື່ອສ້າງປອດພັກປອດໄສເຂັ້ມແຂງ ແລະໜັກແໜ້ນສືບຕໍ່ປັບປຸງແຜນວິທີເຮັດວຽກໃຫ້ລວມສູນປະຊາທິປະໄຕ ແລະມີການປະສານກັນຢ່າງກົມ ກຽວສືບຕໍ່ນຳພາສະມາຊິກພັກພະນັກງານຕີຖອຍທຸກປາກົດການຫຍໍ້ທໍ້ ແລະການສວຍໃຊ້ໜ້າທີ່ຕໍາແໜ່ງໄປໃນທາງທີ່ບໍ່ຖືກຕ້ອງສົ່ງເສີມຜູ້ທີ່ມີຜົນງານມີຫົວຄິດປະດິດສ້າງເດັ່ດດ່ຽວປະຕິບັດວິໄນຕໍ່ຜູ້ລະເມີດລະບຽບກົດໝາຍຢ່າງເຄັ່ງຄັດ.

_______________

ໜັງສືພິມເສດຖະກິດ-ສັງຄົມ

แชร์