ດາກຈຶງຕັ້ງເປົ້າການສົ່ງອອກໃຫ້ບັນລຸ 40 ຕື້ກວ່າກີບ

  ຂະແໜງການຄ້າເມືອງດາກຈຶງວາງຄາດໝາຍປີ 2024 ຈະສູ້ຊົນສົ່ງອອກສິນຄ້າໃຫ້ບັນລຸໄດ້ຫຼາຍ 40 ຕື້ກວ່າກີບ, ທັງນີ້ກໍເນື່ອງຈາກວ່າການຜະລິດກະສິກຳເປັນສິນຄ້າທີ່ນັບມື້ນັບຂະຫຍາຍຕົວເພີ່ມຂຶ້ນຊຶ່ງຈະເປັນທ່າແຮງໃຫ້ແກ່ການສົ່ງອອກຂອງເມືອງໃນອະນາຄົດ,ຂະນະທີ່ປີ 2019 ຜ່ານມາການສົ່ງອອກ ບັນລຸໄດ້ 11 ຕື້ກວ່າກີບ ທຽບໃສ່ແຜນການເພີ່ມເທົ່າຕົວ.

  ຕາມການລາຍງານຂອງ ທ່ານ ສົມພອນ ສາຍສຸວັນ ຮອງເຈົ້າເມືອງດາກຈຶງໃຫ້ຮູ້ເມື່ອບໍ່ດົນນີ້ວ່າ: ປະຈຸບັນການຜະລິດເປັນສິນຄ້າໂດຍສະເພາະແມ່ນສິນຄ້າກະສິກຳແມ່ນພວມໄດ້ຮັບການພັດທະນາ ແລະຂະຫຍາຍຕົວຢ່າງກວ້າງຂວາງເປັນຕົ້ນແມ່ນການປູກກາເຟ, ການປູກໂສມ, ໝາກແໜ່ງ, ໝາກແຕງ ແລະ ການລ້ຽງສັດປະເພດຕ່າງໆເຫັນວ່າໄດ້ຮັບຄວາມສົນໃຈຈາກປະຊາຊົນ, ນັກທຸລະກິດພາຍໃນ ແລະຕ່າງປະເທດເຂົ້າມາລົງທຶນປູກຫຼາຍຂຶ້ນຊຶ່ງອັນນີ້ຈະເປັນພື້ນຖານໃຫ້ແກ່ການສົ່ງອອກຂອງເມືອງຫຼາຍຂຶ້ນໃນອະນາຄົດ, ຄາດຄະເນໄວ້ວ່າຈະສາມາດສົ່ງອອກໃຫ້ໄດ້ 42,5 ຕື້ກີບ ໃນປີ 2024.

  ພ້ອມດຽວກັນນີ້ເມືອງກໍຈະໄດ້ເອົາໃຈໃສ່ພັດທະນາຂະແໜງອຸດສາຫະກຳປຸງແຕ່ງ ແລະການຄ້າໃຫ້ເປັນລະບົບຕ່ອງໂສ້ໂດຍຫັນຈາກພື້ນຖານເສດຖະກິດກະສິກຳໄປສູ່ເສດຖະກິດການບໍລິການ, ປ່ຽນຈາກກະສິກຳ, ອຸດສາຫະກຳ ແລະການບໍລິການໃຫ້ກາຍເປັນເສດຖະກິດພູມປັນຍາປົກປັກຮັກສາສິ່ງແວດລ້ອມ ແລະຮັບປະກັນການພັດ ທະນາໃຫ້ມີຄວາມຍືນຍົງ.

  ແນວໃດກໍຕາມເພື່ອບັນລຸຄາດໝາຍດັ່ງກ່າວ, ທ່ານ ສົມພອນ ສາຍສຸວັນ ລະບຸວ່າ: ຂະແໜງອຸດສາຫະກໍາ ແລະການຄ້າເມືອງຕ້ອງເອົາໃຈໃສ່ໃນການປະຕິບັດໜ້າທີ່ວຽກງານວິຊາການ-ວິຊາສະເພາະ ຕາມພາລະບົດບາດ, ສິດ ແລະໜ້າທີ່ຂອງ ຕົນໃນການຄຸ້ມຄອງຂະແໜງອຸດສາຫະກຳປຸງແຕ່ງ ແລະການຄ້າໃຫ້ປອດໃສ, ຄຸ້ມຄອງລະບົບການຄ້າພາຍໃນ (ຂາຍຍົກ-ຂາຍຍ່ອຍ) ໃຫ້ເຂົ້າສູ່ລະບຽບຫຼັກການ, ກໍ່ສ້າງ ແລະປັບປຸງຕະຫຼາດຊົນນະບົດໃນບ່ອນທີ່ມີເງື່ອນໄຂ ແລະເອື້ອອຳນວຍຄວາມສະດວກແກ່ການດຳເນີນທຸລະກິດ ແລະ ການປະກອບອາຊີບຂອງປະຊາຊົນບັນດາເຜົ່າ, ທັງນີ້ກໍເພື່ອເຮັດໃຫ້ຂະແໜງອຸດສາຫະກຳ ແລະ ການຄ້າຂະຫຍາຍຕົວເພີ່ມຂຶ້ນ ແລະກາຍເປັນທ່າແຮງສຳຄັນໃນການຂັບເຄື່ອນເສດຖະກິດ, ການສ້າງວຽກເຮັດງານທຳ ແລະການແກ້ໄຂຄວາມທຸກຍາກຂອງປະຊາຊົນພາຍໃນເມືອງ.

  ທ່ານຮອງເຈົ້າເມືອງດາກຈຶງຍັງໃຫ້ຮູ້ຕື່ມວ່າ: ການສົ່ງອອກສິນຄ້າຂອງເມືອງດາກຈຶງໃນປີ 2019 ຜ່ານມາປະຕິບັດໄດ້ 11 ຕື້ກວ່າກີບທຽບໃສ່ແຜນການເພີ່ມຂຶ້ນເທົ່າຕົວຊຶ່ງໃນນີ້ສິນຄ້າສົ່ງອອກສ່ວນໃຫຍ່ແມ່ນໝາກກາເຟ 634 ໂຕນຄິດເປັນມູນຄ່າ 7,7 ຕື້ກວ່າກີບ, ງົວ-ຄວາຍ 240 ໂຕມູນຄ່າ 2 ຕື້ກວ່າກີບ, ໂສມ 9,7 ໂຕນມູນຄ່າ 291 ລ້ານກີບ; ນອກນັ້ນຍັງມີເຄື່ອງປ່າຂອງດົງ, ໝາກແໜ່ງ, ເຄືອແຫມ, ເປືອກໂບງ, ນໍ້າເຜິ້ງ, ດອກແຂມ ແລະອື່ນໆ ມູນຄ່າ 950,5 ລ້ານກີບ.

ຂຽນໂດຍ: ສັນຍາ

ພາບ ແລະຂ່າວ: ໜັງສືພິມເສດຖະກິດ-ສັງຄົມ

แชร์