ໂຮງງານຊີມັງວັງວຽງ ຫຼັງ III, 5 ເດືອນຜະລິດຊີມັງອອກສູ່ຕະຫຼາດໄດ້ 1,8 ແສນໂຕນ

  ໂຮງງານຊີມັງວັງວຽງຫຼັງ III ໃນປີນີ້ມີແຜນການຜະລິດຊີມັງຄຸນນະພາບອອກຮັບໃຊ້ສັງຄົມທັງໝົດ 3,5 ແສນໂຕນ ໂດຍຜ່ານການຜະລິດໃນໄລຍະ 5 ເດືອນຜ່ານມາສາມາດຜະລິດໄດ້ 1,8 ແສນໂຕນ ຊຶ່ງເຫັນວ່າກາຍ 50% ຂອງແຜນການປີທັງນີ້ທາງໂຮງງານແມ່ນຈະສູ້ຊົນຜະລິດຊີມັງໃຫ້ບັນລຸແຜນການ.

  ທ່ານ ບົວສອນ ແກ້ວປະເສີດ ຜູ້ອຳນວຍການໂຮງງານຊີມັງວັງວຽງຫຼັງ III ບໍລິສັດຊີມັງລາວວັງວຽງຈຳກັດໃຫ້ສຳພາດວ່າ: ໂຮງງານຊີມັງວັງວຽງຫຼັງ III ໄດ້ລິເລີ່ມສ້າງຕັ້ງຂຶ້ນໃນປີ 2013 ແລະມີການຜະລິດທົດລອງໃນປີ 2015 ເປົ້າໝາຍການຜະລິດແມ່ນເພື່ອແນໃສ່ບັນດາໂຄງການຕ່າງໆຂອງລັດຖະບານ ແລະຂອງເອກະຊົນເນື່ອງຈາກວ່າໂຮງງານຊີມັງຫຼັງ III ສ້າງຕັ້ງຂຶ້ນໃນທ່າມກາງທີ່ປະເທດຊາດກຳລັງມີການພັດທະນາ, ຄວາມຮຽກຮ້ອງຕ້ອງການຊີມັງໃນທ້ອງຕະຫຼາດມີສູງແຕ່ການຜະ ລິດພາຍໃນຍັງບໍ່ຕອບສະໜອງໄດ້, ຊຶ່ງມີກຳລັງການຜະລິດປະມານ 1 ລ້ານ ໂຕນຕໍ່ປີ, ຕະຫຼອດໄລຍະຜ່ານມາພວກເຮົາກໍໄດ້ເອົາໃຈໃສ່ເຮັດການຜະລິດເພື່ອອອກມາຮັບໃຊ້ສັງຄົມແຕ່ຊ່ວງໄລຍະຫຼັງໆເຫັນວ່າສະພາບຊີມັງໃນທ້ອງຕະຫຼາດມີສູງຈຶ່ງເຮັດໃຫ້ກຳລັງການຜະລິດຂອງພວກເຮົາບໍ່ສາມາດແລ່ນໄດ້ເຕັມສ່ວນຄືຜະລິດໄດ້ແຕ່ 20-30% ຂອງປະລິມານການຜະລິດທັງໝົດເນື່ອງຈາກວ່າຊີມັງໄດ້ມີການເກີດຂຶ້ນຫຼາຍຢູ່ໃນປະເທດຂອງພວກເຮົາ.

   ເຖິງຢ່າງໃດກໍຕາມພາຍໃຕ້ການຊີ້ນຳ-ນຳພາຂອງຂັ້ນເທິງ, ຄະນະອຳນວຍການຂອງບໍລິສັດໃຫຍ່ ແລະພາຍໃຕ້ຄວາມເອົາໃຈໃສ່ໃນການຮ່ວມມືກັນລະຫວ່າງສອງຝ່າຍລາວ-ຈີນເນື່ອງຈາກວ່າເປັນໂຮງງານຮ່ວມມືກັບເອກະຊົນຈີນໂດຍທີ່ຝ່າຍຈີນຖືຮຸ້ນ 60% ແລະຝ່າຍລາວ 40% ພວກເຮົາກໍໄດ້ເອົາໃຈໃສ່ສູ້ຊົນຜ່ານຜ່າບັນດາຂໍ້ຫຍຸ້ງຍາກຕ່າງໆຈຶ່ງເຮັດໃຫ້ສາມາດຜະລິດຊີມັງໄດ້ຈຳນວນໜຶ່ງຊຶ່ງສະແດງອອກໃນ 5 ເດືອນຜ່ານມານີ້ສາມາດຜະລິດ ແລະຈຳໜ່າຍຊີມັງໄດ້ 183.962 ໂຕນໂດຍໃນປີນີ້ພວກເຮົາວາງແຜນໄວ້ 3,5 ແສນໂຕນປະຈຸບັນຖືວ່າກາຍ 50% ຂອງແຜນການທີ່ໄດ້ວາງໄວ້ແລ້ວ.

  ທ່ານ ບົວສອນ ແກ້ວປະເສີດ ກ່າວຕື່ມວ່າ: ສຳລັບຂໍ້ສະດວກຂອງໂຮງງານແມ່ນຕັ້ງຢູ່ທ້ອງຖິ່ນທີ່ປະກອບມີແຫຼ່ງວັດຖຸດິບຈຳນວນຫຼວງຫຼາຍເປັນຕົ້ນແມ່ນຫີນປູນ, ດິນໜຽວແດງ,ດິນຊາຍພູ, ດິນໜຽວຂາວທີ່ມີພ້ອມໃນການສະໜອງໃຫ້ແກ່ການຜະລິດນອກນັ້ນຍັງໄດ້ນຳໃຊ້ຖ່ານຫີນ, ຫີນກາວເຫັນວ່າວັດຖຸດິບຈຳນວນຫຼາຍແມ່ນນອນໃນເມືອງວັງວຽງສິ່ງທີ່ສຳຄັນແມ່ນອຳນາດການປົກຄອງທ້ອງຖິ່ນ, ພັກ-ລັດຖະບານໄດ້ໃຫ້ຂໍ້ສະດວກແກ່ໂຮງງານເປັນຢ່າງດີຄຽງຄູ່ກັນນັ້ນພວກເຮົາກໍມີຂໍ້ຫຍຸ້ງຍາກຈຳ ນວນໜຶ່ງໂດຍສະເພາະແມ່ນສະພາບການຈຳໜ່າຍຊີມັງຖືວ່າບໍ່ສາມາດບັນລຸເປົ້າຈຶ່ງເຮັດໃຫ້ພວກເຮົາໄດ້ຫຼຸດກຳລັງການຜະລິດລົງຍ້ອນຊີມັງຢູ່ບ້ານເຮົາເຫີດຂຶ້ນຫຼາຍ ເຮັດໃຫ້ປະລິມານການຜະລິດຫຼາຍຊຶ່ງບໍ່ທັນສົມຄູ່ກັບກຳລັງການຊົມໃຊ້ຢູ່ ໃນປະຈຸບັນ.

 ທ່ານ ບົວສອນ ແກ້ວປະເສີດ ກ່າວຕື່ມອີກວ່າ: ໃນປີ 2020 ນີ້ພວກເຮົາວາງແຜນການຜະລິດໄວ້ 3,5 ແສນໂຕນ ຈະສູ້ຊົນເຮັດໃຫ້ການຜະລິດບັນລຸຄາດໝາຍ ແລະລື່ນຄາດໝາຍພ້ອມນັ້ງຈະສືບຕໍ່ຄຸ້ມຄອງເອົາໃຈໃສ່ຮັບປະກັນທາງດ້ານຄຸນນະພາບໃຫ້ແກ່ລູກຄ້າຊຶ່ງຕະຫຼອດໄລຍະຜ່ານມາຄຸນນະພາບຂອງພວກເຮົາສາມາດບັນລຸໄດ້ 100% ແລະໃນຕໍ່ໜ້າພວກເຮົາຍິ່ງມີຄວາມເອົາໃຈໃສ່ເນື່ອງຈາກວ່າໂຄງການທີ່ນຳໃຊ້ຊີມັງພວກເຮົາລ້ວນແຕ່ເປັນໂຄງການໃຫຍ່ໆ ຂອງລັດຖະບານເປັນຕົ້ນໂຄງການທາງດ່ວນ, ໂຄງການກໍ່ສ້າງທາງລົດໄຟ, ໂຄງການກໍ່ສ້າງເຂື່ອນໄຟຟ້າ, ໂຄງການກໍ່ສ້າງສະໜາມກີລາຕ່າງໆ,ໂດຍສະເພາະໂຄງການສ້າງສະໜາມກິລາຊຽງຂວາງແມ່ນນຳໃຊ້ຊີມັງວັງວຽງຫຼັງ III 100% ນີ້ແມ່ນຜົນງານໜຶ່ງທີ່ໄດ້ປະກອບສ່ວນໃຫ້ແກ່ການສ້າງສາພັດທະນາປະເທດຊາດຂອງພວກເຮົາໃນໄລຍະຜ່ານມາ.

แชร์