ວາງສີລາລຶກໂຄງການກໍ່ສ້າງວັດເຂດວັງຕັດ ເມືອງຊານໄຊ

ໜັງສືພິມເສດຖະກິດ-ສັງຄົມ

 ເພື່ອແກ້ໄຂບັນຫາທີ່ພໍ່ປະຊາຊົນໃນເຂດຊຸມຊົນຫ່າງໄກຢູ່ເມືອງຊານໄຊ ແຂວງອັດຕະປື ຂະນະທີ່ເມື່ອແຕ່ກ່ອນກໍຄືປະຈຸບັນປະຊາຊົນພາຍໃນບ້ານຊຸມຊົນເຫຼົ່ານີ້ຍັງເຊື່ອຖືບັນພະບຸລຸດ (ເຊື່ອຖືຜີ) ອຳນາດການປົກຄອງແຂວງອັດຕະປືໄດ້ມີເຈດຈຳນົງທີ່ສະແດງເຖິງຄວາມເປັນຫ່ວງເປັນໄຍຕໍ່ຊາຕາກຳຂອງປະຊາຊົນອັນມາຊ້ານານພາຍທີ່ພັກ-ລັດໄດ້ນຳແນວທາງ, ມະຕິຄຳສັ່ງຂອງຂັ້ນເທິງລົງສຶກສາອົບຮົມ ແນວຄິດການເມືອງ,ປຸກລະດົມຊຸກຍູ້ຄວາມສາມັກຄີ, ຊີ້ນໍາ-ນໍາພາພໍ່ແມ່ປະຊາຊົນເຂົ້າໃນການພັດທະນາເສດຖະກິດ-ສັງຄົມ ແລະໃຫ້ເຂົ້າໃຈໃນຫຼັກທຳຄຳສອນຂອງພຸດທະສາສະໜາ ແລະບັນຫາອື່ນໆ ແລະປະຊາຊົນພາຍໃນບ້ານດັ່ງກ່າວຍິ່ງມີຄວາມເຫັນດີເຫັນພ້ອມ ແລະເອກະພາບກັນຢ່າງສູງຈະໄດ້ຫັນມາເຊື່ອຖື ແລະເຫຼື້ອມໃສສັດທາທາງສາດສະໜາພຸດໃຫ້ຫຼາຍຂຶ້ນຈຶ່ງໄດ້ສະເໜີມາຍັງອຳນາດການປົກຄອງຂັ້ນເມືອງແຂວງ ແລະ ກະ ຊວງຢ່າງຖືກຕ້ອງສອດຄ່ອງຕາມນະໂຍບາຍຂອງພັກ ແລະຖືກຕ້ອງຕາມກົດໝາຍຂອງລັດຈຶ່ງຕົກລົງເຫັນດີຈະກໍ່ສ້າງວັດສຸດຕະທໍາມະຣາມເພື່ອເປັນບ່ອນສັກກະລະບູຊາເປັນບ່ອນເຫຼື້ອມໃສສັດທາບ່ອນທຳບຸນກຸສົນ ແລະເປັນບ່ອນຊຸມນຸມໃນການເຮັດວຽກ ແລະກິດຈະກຳຕ່າງໆທີ່ສຳຄັນຂອງຊາວພຸດທັງຫຼາຍກໍຄືຂອງຄົນທົ່ວໄປໃນເຂດວັງຕັດນ້ອຍ.

  ພິທີວາງສີລາລືກໂຄງການກໍ່ສ້າງວັດສຸດຕະທໍາມະຣາມທີ່ບ້ານວັງຕັດ ເມືອງຊານໄຊ ມີຂຶ້ນໃນວັນ ທີ 3 ມິຖຸນາ 2020 ໄດ້ໃສ່ຊື່ເດີມວ່າ: ວັດສາມັກຄີສຸດຕະທໍາມະຣາມ ຕັ້ງຢູ່ບ້ານວັງຕັດນ້ອຍ ຫ່າງຈາກ ເທສະບານ ເມືອງຊານໄຊ ປະມານ 150 ກິໂລແມັດ, ມີເນື້ອທີ່ກໍ່ສ້າງ ທັງໝົດປະມານ 3 ເຮັກຕາ ໂດຍ ພະແນກໂຍທາທິການ ແລະຂົນສົ່ງແຂວງອັດຕະປື ໄດ້ສຳຫຼວດອອກ ແບບ ແລະຄິດໄລ່ປະເມີນລາຄາໃນມູນຄ່າ 5,58 ຕື້ກີບ ຄາດວ່າການກໍ່ສ້າງຈະໃຫ້ສຳເລັດປະມານ 5 ປີ ນັບແຕ່ມື້ວາງສີລາລຶກເປັນຕົ້ນໄປເມື່ອການກໍ່ສ້າງສໍາເລັດແລ້ວວັດດັ່ງກ່າວຈະເປັນແຫ່ງທີ 2 ຂອງເມືອງຊານໄຊ ຊຶ່ງປະກອບມີປະຕູຂົງ ແລະກຳແພງລ້ອມ,ມີຫໍແຈກ, ຫໍກອງ, ຫ້ອງນໍ້າ, ກຸດຕິ ແລະພັດທະສິມມາ.

  ທ່ານ ອຸ່ນຫຼ້າ ໄຊຍະສິດ ຮອງເຈົ້າ ແຂວງອັດຕະປື ໃຫ້ຮູ້ວ່າ:ຄວາມໄຝ່ຝັນໃນການຢາກມີວັດຢູ່ ໃນດິນແດນເຂດບ້ານວັງຕັດ ນີ້ແມ່ນມີມາເປັນເວລາດົນນານສົມຄວນ ແລະເກີດເປັນຄວາມຈິງຂຶ້ນມາໄດ້ ແລ້ວເມື່ອສ້າງສຳເລັດວັດດັ່ງກ່າວກໍຈະກາຍເປັນວັດສຸດຕະທໍາມະຣາມແຫ່ງທຳອິດຢູ່ໃນດິນແດນແຫ່ງນີ້ ແລະເປັນບ່ອນສັງເວສະນີຍະສະຖານອັນສັກສິດດັ່ງນັ້ນ ຮຽກຮ້ອງມາຍັງຜູ້ທີ່ມີຈິດໃຈເຫຼື້ອມໃສສັດທາພຸດທະສາດສະໜາຢູ່ພາຍໃນແຂວງຕ່າງແຂວງ ແລະຕ່າງປະເທດເພື່ອສົມທົບທຶນການກໍ່ສ້າງວັດດັ່ງກ່າວໃຫ້ສຳເລັດຕາມກຳນົດເວລາຊຶ່ງບ້ານວັງຕັດນ້ອຍເປັນບ້ານໜຶ່ງທີ່ຕັ່ງຢູ່ເຂດເນີນສູງລຽບຕາມຕີນພູທີ່ຂຶ້ນກັບເມືອງຊານໄຊ ແຂວງອັດຕະປື ມີຄອບຄົວທັງໝົດ 122 ຄອບຄົວ, ພົນລະເມືອງ 612 ຄົນ, ຍິງ 311 ຄົນ, ມີຊົນເຜົ່າດຽວຄືເຜົ່າແຢະການດຳລົງ ຊິວິດແມ່ນຢຶດຖືການເຮັດໄຮ່ເຮັດສວນປູກຝັງລ້ຽງສັດ ພ້ອມນີ້ຍັງມີສະຖານທີ່ທ່ອງທ່ຽວໃນຫຼາຍແງ່ມູມ ແລະອາດຈະສ້າງຄວາມສົນໃຈແກ່ນັກທ່ອງທ່ຽວໃນອະນາຄົດຢ່າງບໍ່ຕ້ອງສົງໄສ.

   ໃນພິທີອັນມີຄວາມໝາຍນັ້ນຍັງໄດ້ພ້ອມກັນຈັດພິທີກຳທາງສາດສະໜາເພື່ອໃຫ້ເປັນສິລິມຸງຄຸນໃຫ້ແກ່ບ້ານຈາກນັ້ນ ທ່ານ ອຸ່ນຫຼ້າໄຊຍະສິດ ຮອງເຈົ້າແຂວງອັດຕະປື ໄດ້ໃຫ້ກຽດລັ່ນຄ້ອງ 9 ບາດ ແລະໄດ້ຮ່ວມກັນກັບພາກສ່ວນກ່ຽວຂ້ອງຕັດແຖບຜ້າເລີ່ມການກໍ່ສ້າງວັດສາມັກຄີສຸດຕະທໍາມະຣາມບ້ານວັງຕັດນ້ອຍຢ່າງເປັນທາງການຊຶ່ງມີອົງການພຸດທະສາສະໜາ, ມີບໍລິສັດວັງຕັດຂຸດຄົ້ນບໍ່ແຮ່ຈໍາກັດ, ອຳນາດການປົກຄອງເມືອງ, ປະຊາຊົນພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

 

 

แชร์