ສຶກສາຈໍາປາສັກ ສ້າງຂະບວນການ ຕ້ອນຮັບກອງປະຊຸມໃຫຍ່ອົງຄະນະພັກແຂວງ

  ໃນວັນທີ 5 ມິຖຸນາ 2020 ທີ່ສະໜາມກີລາຫຼັກ 2 ພະແນກສຶກສາທິການ ແລະກີລາແຂວງ ຈໍາປາສັກສ້າງຂະບວນການອອກແຮງງານຕ້ອນຮັບກອງປະຊຸມໃຫຍ່ອົງຄະນະພັກແຂວງຄັ້ງທີ VIII ໂດຍມີຄະນະພັກ, ຄະນະພະແນກສຶກສາທິການ ແລະກີລາ, ພະນັກງານຄູ-ອາຈານ ແລະນ້ອງນັກຮຽນຈາກ 5 ຫຼັງໂຮງຮຽນຄືມັດ ທະຍົມສົມບູນປາກເຊ, ມສ ໂພນໄຊ, ມສ ຊົນເຜົ່າ, ມສ ຂົວຕະພານ ແລະມສ ພອນສະຫວັນ ເຂົ້າຮ່ວມຢ່າງຫຼວງຫຼາຍ.

  ທ່ານ ໄພວອນ ຜາບຸນມີ ຮອງຫົວໜ້າພະແນກສຶກສາທິການ ແລະ ກີລາແຂວງຜູ້ຮັບຜິດຊອບຂະບວນການໃຫ້ສໍາພາດວ່າ: ຂະບວນການອອກແຮງງານຄັ້ງນີ້, ບັນດາພະນັກງານຄູ-ອາຈານ ແລະນັກຮຽນໄດ້ສາມັກຄີກັນເກັບຂີ້ເຫຍື້ອ,ປັດກວາດ ແລະຊ້ວານດິນອອກຈາກທາງອ້ອມຂ້າງດ້ານນອກຂອງສະໜາມກີລາ, ຖາງຫຍ້າ ແລະປັບໜ້າດິນໃຫ້ຮາບພຽງເພື່ອກະກຽມໃຫ້ແກ່ການປູກຕົ້ນໄມ້ ແລະເຮັດສວນດອກໄມ້, ຜ່ານການອອກແຮງງານຢ່າງຫ້າວຫັນຂອງແຕ່ລະພາກສ່ວນໄດ້ເຮັດໃຫ້ສະຖານທີ່ດັ່ງກ່າວທີ່ຮົກເຮື້ອໃນເມື່ອກ່ອນມີຄວາມສະອາດຈົບງາມຂຶ້ນກ່ວາເກົ່າ.

  ທ່ານ ໄພວອນ ຜາບຸນມີ ຮອງຫົວໜ້າພະແນກສຶກສາທິການ ແລະກີລາແຂວງຈໍາປາສັກ ກ່າວອີກວ່າ: ຂະບວນການອອກແຮງງານທີ່ສະໜາມກີລາໃນຄັ້ງນີ້ນອກຈາກ ເພື່ອສ້າງຜົນງານ ແລະຂະບວນການຕ້ອນຮັບກອງປະຊຸມໃຫຍ່ຂອງອົງຄະນະພັກແຂວງ, ການກຽມປູກຕົ້ນໄມ້ສະເຫຼີມສະຫຼອງ ວັນປູກຕົ້ນໄມ້ແຫ່ງຊາດທີ 1 ມິຖຸນາ, ຊົມເຊີຍກອງປະຊຸມໃຫຍ່ຄະນະພັກຮາກຖານພະແນກສຶກສາທິການ ແລະກີລາແຂວງ ແລະວັນສໍາຄັນຕ່າງໆ ຂອງພັກຂອງຊາດແລ້ວຍັງເປັນການປະຕິບັດແຜນການປັບ ປຸງ ແລະພັດທະນາສະໜາມກີລາຫຼັກ 2 ໃຫ້ມີຄວາມສະອາດສວຍງາມ, ສ້າງໃຫ້ມີສະພາບ ແວດລ້ອມທີ່ດີ ແລະມີໃບໜ້າໃໝ່.

---------

ໜັງສືພິມເສດຖະກິດ-ສັງຄົມ

 

แชร์